Kulilemeka Kabotu Ikupa Bulemu Kuli Leza
1. Nkaambo nzi Bakamboni ba Jehova ncobafwambaana kuzyibwa ciindi nobali kumuswaangano wacooko?
1 Ciindi notuli kumiswaangano yacooko, ncuuba-uba kubantu kuzyiba kuti tuli kumuswaangano. Mumadolopo manji mucitilwa miswaangano yacooko, basimubweza twaambo bakubusena ooko balabazyibya bantu kujatikizya muswaangano wesu. Mumahotela alimwi amumaanda aakulida kanji-kanji inga mobali basimuswaangano, alimwi bantu bakkala mucilawo balabona kuti beenzu banji inga basamide mabbaaji aamuswaangano. Twaambo tuli ansi aawa nziyeekezyo iziyootugwasya kutondezya bulemu kuli Leza kwiinda mukulilemeka kabotu ciindi notuli kubusena bwamuswaangano.—1 Pe. 2:12.
2. Mbuti mbotukonzya kumulemeka Leza kwiinda munsamino yesu ciindi notuli kubusena bwamuswaangano?
2 Kusama Cabulemu: Bantu batulangilila kanji-kanji balabotelwa akaambo kansamino yesu yabulemu ciindi notuli kumuswaangano. Nokuba boobo, mbotusama zimwi ziindi—ciindi notusika kuhotela, notulya mumasena aakulida, notuula zyintu, alimwi aziindi zimwi—bantu balajatikizyigwa kapati ambobatubona. Nokuba kuti tatuyandiki kusama zisani nzyotusama kumiswaangano, nzyotusama zyeelede kuti kaziboneka kabotu, alimwi zyabulemu. Bantu batulangilila beelede kubona kuti tuliindene abantu batali basyomi. (Lom. 12:2) Kuyungizya waawo, tweelede kusama mabbaaji aamuswaangano wesu nkaambo eeci ciyoozibya bantu kuti tujisi muswaangano, ciyoosololela kuzyoolwe zyakupa bumboni, alimwi akupa kuti basimuswaangano bambi batuzyibe.
3. Ino inga twakutondezya buti kukkazyika moyo alimwi abulemu?
3 Kukkazyika Moyo Akutondezya Bulemu: Ciindi bantu banji munyika nobalibikkila buyo maano lwabo beni alimwi akutalumba, kukkazyika moyo kwesu alimwi akutondezya bulemu kuyoobakatalusya bantu batulangilila, mbuli baabo babelekela muhotela alimwi amumaanda aakulida. (2 Ti. 3:1-5) Ciindi notubambila bamwi masena aakukkala naa notwiima mumulaini kutegwa tubweze mabbuku mapya, tweelede kuyandisya kugwasya bamwi ikutali buyo kuligwasya lwesu tobeni. (1 Ko. 10:23, 24) Naakamana kujanika kumuswaangano wacooko ciindi cakusaanguna, mwaalumi umwi wakajisi luyandisisyo wakaamba kuti: “Kunyina makani aali woonse ngondiyeeyede aakakananwa buzuba buya, pele kulilemeka kwa Bakamboni kwakandikkomanisya kapati.”
4. Nkaambo nzi ncotweelede kugwasyilizya kumuswaangano wacooko ikuti bukkale bwesu kabutuzumizya?
4 Basikulisungula Balyaabide: Muuya wakulisungula ncitondezyo ca Banakristo bakasimpe. (Int. 110:3) Sena inga mwalisungula kuyoogwasyilizya kumuswaangano wacooko? Kubusena bumwi bucitilwa muswaangano wacooko, bakwesu abacizyi babalilwa ku 600 bakagwasyilizya kusalazya busena kautanatalika muswaangano. Babelesi bakubusena ooku bakaamba kuti: “Eeci ncintu cigambya ncotutanabwene! Cilagambya kubona kuti bantu boonse aaba mbaasikugwasyilizya buyo.” Tulangila kumbele kumiswaangano yacooko yamu 2013 alimwi acoolwe ncotunoojisi kutali buyo cakuswiilila akwiiya kuli Leza pele alimwi acoolwe cakumulemeka.