“Amube Abukkale Buli Kabotu Lyoonse Akati Kabamasi”

1. Nkaambo nzi ncociyandika kuti lyoonse tube abukkale buli kabotu twanooli kumuswaangano wacooko uboola?

¹ Mwaka amwaka nokuli muswaangano, tupa kuti banamaleya babikkile maano kuzintu nzyotucita, aboobo cilayandika kwiiminina Jehova ngotukomba kwiinda mukulilemeka kwesu. (Lev. 20:26) Kulilemeka kwesu kubotu alimwi akusama kabotu kweelede kutondezya kabotu-kabotu kuti tuli basikutobela Kristo beni-beni. Twanooli kumuswaangano wacooko naa wamasi, mbuti mbotukonzya ‘kuba abukkale buli kabotu lyoonse akati kabamasi’ alimwi akupa kuti Taateesu wakujulu alemekwe?—1 Pe. 2:12.

2. Ino nzyoolwe nzi nzyotunoojisi zyakutondezya bukkale bwa Bunakristo kumuswaangano wacooko?

² Amutondezye Bube bwa Bunakristo: Luyando ndotutondezya kuli umwi aumwi alimwi ambotubabona ‘bantu bakunze’ luliindene kapati amuuya wanyika uudumide. (Kol. 3:10; 4:5; 2 Ti. 3:1-5) Tweelede kukkazika moyo akuba alubomba nokuba kuti kwabuka mazwanga twanooli ababelesi bamuhotela naa bamu mucintoolo musambalilwa zyakulya. Bukkale bubotu bweelede kutukulwaizya kubapa mali naaceya babelesi batulanganya aakutondezya kulumba.

3. Ino nciyeekezyo nzi ncobapegwa bazyali, alimwi nkaambo nzi?

³ Bazyali beelede kubikkila maano kulanganya bana babo nobali abusena bwakuswaanganina, muzintoolo musambalilwa zyakulya alimwi amumahotela. (Tus. 29:15) Mupati wamulimo muhotela limwi wakaamba boobu kubanabukwetene bamwi: “Tulamuyanda kapati nywebo nobantu. Mikwasyi yanu alimwi abana banu balalilemeka alimwi balaambaula cabulemu. Babelesi boonse bali kumwaamba alimwi twali kulombozya kuti kubota nomwali kukkala ookuno lyoonse.”

4. Twanooli kumuswaangano wacooko, ino nzintu nzi nzyotweelede kubikkila maano kujatikizya mbotuboneka?

⁴ Kusama Cabulemu: Lyamuswaangano wacooko, tweelede kusama kabotu alimwi cabulemu, ikutali nsamino zitali kabotu zidumide munyika. (1 Ti. 2:9) Noliba leelyo notunjila naa notuzwa muhotela alimwi anotulyookezya kaitanatalika naa noyamana pulogilamu, tuyanda kweeleba nsamino izitapi bulemu. Aboobo tuyookkomana kusama kabbaaji kamuswaangano alimwi tatukafwi nsoni twaakujana coolwe cakupa bumboni. Mbotunooboneka alimwi ambotunoolilemeka twanooli amuswaangano ngotulangila kuyookwela bantu babombe myoyo kumulumbe wamu Bbaibbele uupa buumi alimwi akukkomanisya Jehova.—Zef. 3:17.

Malailile aa Muswaangano Wacooko wa 2014

◼ Ciindi Camapulogilamu: Ku Maanda Aakucitila Miswaangano Mipati, milyango inoojalulwa aciindi ca 07:00hrs. Nyimbo zya Bwami zinootalika kulila aciindi ca 08:20hrs mumazuba oonse otatwe. Aciindi eeci, toonse tweelede kukkala mumasena eesu kutegwa mapulogilamu kaatalika cabulemu. Mubuzuba bwakusaanguna alimwi abwabili, pulogilamu iyoomana aciindi ca 15:55hrs, mpoonya mubuzuba bwatatu iyoomana aciindi ca 15:10hrs.

◼ Miswaangano Yamasi: Mumasena amwi kuyooba miswaangano yamasi. Amuzyibe kuti ofesi yamutabi noyakamana kulanga-langa mbozili zinji zyuuno, kwakusiya myootokala alimwi amaluumu aamumahotela, yakatamba mbungano zimwi alimwi abasikuswaangana bazwa muzisi zimbi. Kuti basikumwaya bajanika kumuswaangano wamasi nkobatakatambwa inga capa kuti bantu baindile kuvwula. Ikuti bukkale kabuzumizya kujanika kumuswaangano uutali wambungano yanu, inga mwasala kujanika kumuswaangano umbi pele ikutali wamasi.

◼ Kwakusiya Myootokala: Mumasena oonse aakuswaanganina motweendelezya aakusiya myootokala, masena anoopegwa kuli basimuswaangano kweelana ambobatobelana ciindi nobasika. Mbwaanga kanji-kanji busena inga mbusyoonto, aabo bajisi myootokala minji beelede kumvwana kubelesya mootokala omwe kuti kacikonzyeka. Mwalombwa kuti mukaatobele malailile abasikugwasyilizya balanganya bweende bwamyootokala naa bantu.

◼ Kujatila Masena: Ciindi milyango noyajalulwa buzuba bumwi abumwi, tumulomba kuti mutanoobalikili kumasena ngomuyandisya kapati kukkala mbuli kuti muzundana buya. Muuya wakulyaaba weelede kutupa kucitila bantu zintu zibotu. Eeci citupa kubonwa kuti tuli Banakristo beni-beni alimwi cipa baabo ibatulangilila kutembaula Leza. (Joh. 13:34, 35; 1 Ko. 13:4, 5; 1 Pe. 2:12) Zyuuno naa busena bwakukkala inga mwabujatila buyo baabo mbomukkala limwi, naa mbomwaboola limwi mumootokala naa aabo mbomuyiisya Bbaibbele. Kwabambwa busena nkobakonzya kukkala aabo bacembeede alimwi abaciswa. Mbwanga busena mbusyoonto, sikugwasyilizya bacembeede naa baciswa omwe naa bobilo inga bakkala ambabo.

◼ Cakulya Camasyikati: Mwalombwa kuti mukaletelezye cakulya camasyikati muciindi cakuti mukazwe abusena bwamuswaangano kuyakuula cakulya aciindi cakulyookezya. Kujatikizya miswaangano iicitilwa mumabbuwa aazisobano aajisi zyuuno, inga mwabelesya mitaanga iitali mipati naa kabbeeke kakunyamwida zyakulya nkomukonzya kubikka kunsi acuuno. Zyakunyamwida cakulya zipati-pati alimwi azyakunyamwida zipangidwe agilazi tazizumizyidwe abusena bwamuswaangano.

◼ Kusanga: Tulakonzya kutondezya kulumba kujatikizya bubambe bwamuswaangano kwiinda mukusanga cakuliyandila kumulimo wanyika yoonse kumuswaangano wacooko. Macceki oonse aasangwa ayelede kulembwa kuti: “Watch Tower Society.”

◼ Busilisi: Ikuti naa kuli musamu ngomunywa ngobakamulembela kucibbadela, mweelede kuuletelezya, mbwaanga taunooliko amuswaangano wacooko. Manyeleti aa Diabetes ayelede kusowegwa kabotu nkaambo alakonzya kuleta ntenda, aboobo taayelede kusowegwa muzyakusowela tombe zili amuswaangano naa kuhotela. Zintu zili boobo zyeelede kuyobolwa kabotu abaabo ibazibelesya akuyoozisowela kuŋanda.

◼ Kulikwabilila Kuntenda: Mwalombwa kuti mubikkile maano zintu zikonzya kupa bantu kulicisa akaambo kakutezemuka naa kulileba. Mwaka uuli woonse bantu balalicisa akaambo kamabbusu ngobasama, kwaambisya mabbusu malamfwu. Cilayandika kusama mabbusu aali kabotu, aatukkwana kabotu aayootugwasya kweenda kabotu mumasena aatali kabotu, mumasiteepu, mumasena mwakwiinda muyalidwe tubulo ansi, alimwi amumasena aambi.

◼ Twakukubila Bana naa Zyuuno Zyakupeta: Eezi mulakonzya kuzibelesya mumasena aazumizyidwe amiswaangano iicitikila muminzi naa muma assembly halls. Ooko muswaangano nkoucitilwa mubbuwa lyazisobano mubikkidwe kale zyuuno, twakukubila bana alimwi azyuuno zyakupeta tazyeelede kuletwa kubusena bucitilwa muswaangano. Nokuba boobo zyuuno zipa bana kukkala kabotu zilazumizyigwa lilikke kuti zyabikkwa kabotu acuuno cili afwaafwi amuzyali. Mwalombwa kuti mubuzye baalu bambungano kujatikizya malailile mbwaabede kubusena nkomukkala.

◼ Mafwuta Aanunkilila Kapati: Atutondezye luyando kuli bamwi kwiinda mukutabelesya mafwuta aanunkilila kapati naa mapefyuumu aakonzya kunyonganya baabo baciswa bulwazi bwakufwundilila naa malwazi amwi.—1 Ko. 10:24.

◼ Mafoomu aa Amuzumanane a Muntu Ooyu (S-43): Foomu ya Amuzumanane a Muntu Ooyu yeelede kubelesyegwa kupa twaambo tujatikizya muntu iwatondezya luyandisisyo akaambo kabukambausi bwamukwiizya mbotucita ciindi camuswaangano. Mafoomu ngomwalemba alakonzya kutolwa ku Dipatimenti Iilanganya Mabbuku naa kumulembi wambungano yanu mwaakupiluka.

◼ Mulimo Wakuliyandila: Aabo bayanda kucita mulimo ooyu beelede kulilembya ku Dipatimenti Yamulimo Wakuliyandila amuswaangano wacooko. Bana bajisi myaka yakuzyalwa iitasiki ku 16 abalo balakonzya kubeleka kabeendelezyegwa amuzyali naa uubalela naba muntu umbi mupati uuzumizyidwe amuzyali.