Malailile aa Muswaangano Wacooko
Ciindi Camapulogilamu: Mumasena Aakucitila Miswaangano Mipati, milyango inoojalulwa aciindi ca 07:00hrs. Nyimbo zyamalimba zinootalika kulila aciindi ca 08:20hrs mazuba oonse otatwe. Aciindi eeci, toonse tweelede kukkala mumasena eesu kutegwa mapulogilamu kaatalika cabulemu. Mubuzuba bwakusaanguna alimwi abwabili, pulogilamu iyoomana aciindi ca 16:00hrs, mpoonya mubuzuba bwatatu iyoomana aciindi ca 15:00hrs.
‘Amumutembaule Jehova Munyimbo’: Bantu ba Leza bansiku bakali kumutembaula Jehova kwiinda munyimbo, alimwi kwiimba kwazumanana kuba cibeela ciyandika kapati mubukombi bwakasimpe mazuba aano. (Int. 28:7) Cibeela cimwi acimwi camuswaangano wesu wacooko cilatalika anyimbo zyamalimba. Eezyi tazili nyimbo zyakuswiilila buyo pe, pele zibambilidwe kuti zitugwasye kwiiya akumukomba Jehova. Aboobo, ciindi sicuuno naambilizya kuti nyimbo zyamalimba zilaafwaafwi kutalika, tweelede kukkala ansi alimwi akuswiilila ikutondezya kuti tulalumba muciindi cakuzumanana kwiizya. Kucita boobo citondezya kuti tulabalumba kapati baimbi ba Watchtower orchestra akaambo kamulimo ngobacita. Ziindi zyobilo amwaka, bakwesu abacizyi aaba balabelesya mali aabo kuunka ku Patterson, New York, kutegwa bakaimbe nyimbo zibotu zyakuti katuswiilila. Twamana kuswiilila nyimbo zyamalimba, toonse tweelede kutola lubazu kutembaula Jehova kwiinda mukwiimba nyimbo zya Bwami.
Kwakusiya Myootokala: Mumasena oonse aakuswaanganina motujisi kwakusiya myootokala, masena anoopegwa kuli basimuswaangano kweelana ambobatobelana kusika. Mbwaanga kanji-kanji masena inga masyoonto, aabo bajisi myootokala minji beelede kumvwana kubelesya mootokala omwe kuti kacikonzyeka. Mweelede kubelekela antoomwe abaabo basalidwe kutondezya kwakusiya myootokala alimwi abubambe buli boonse bwakusiya macinga.
Kujatila Masena: Buzuba bumwi abumwi, tumulomba kuti mutanoobalikili kumasena ngomuyandisya kapati kukkala mbuli kuti muzundana buya abakwesu. Muuya wakulyaaba weelede kutupa kucitila bantu zintu zibotu. Eeci citupa kubonwa kuti tuli Banakristo beni-beni alimwi cipa baabo ibatulangilila kutembaula Leza. (Joh. 13:34, 35; 1Kor. 13:4, 5; 1Pet. 2:12) Zyuuno naa busena bwakukkala inga mwazijatila buyo baabo mbomukkala limwi, naa mbomwaboola limwi mumootokala naa aabo mbomuyiisya Bbaibbele. Amubabikkile maano bamwi ikuti naa mwajula ambulela alimwi atwaanda twakupanga cimvwule. Amusale busena buli kabotu. Amulibuzye kuti: Sena nzyondicita zipa kuti bamwi kabataboni zicitika kumbele alimwi akutaukkomanina muswaangano? Kwabambwa busena nkobakonzya kukkala aabo bacembeede alimwi abaciswa. Mbwaanga busena oobu mbusyoonto, sikugwasyilizya bacembeede naa baciswa, omwe naa bobilo buyo inga bakkala ambabo.
Kusama Cabulemu: Lyamuswaangano wacooko, tweelede kusama kabotu alimwi cabulemu, ikutali nsamino zitali kabotu zidumide munyika. (1Tim. 2:9) Ciindi notulyookezya kaitanatalika naa noyamana pulogilamu, atweelebe nsamino izitali kabotu. Aboobo tuyookkomana kusama kabbaaji kamuswaangano alimwi tatukafwi nsoni twaakuba acoolwe cakupa bumboni. Mbotunooboneka alimwi ambotunoolilemeka twanooli amuswaangano ngotulangila kuyoopa kuti bantu babombe myoyo bakwelelezyegwe kumulumbe wamu Bbaibbele uupa buumi alimwi akukkomanisya Jehova.—Zef. 3:17.
Amutubelesye Kabotu Tuncini Twanu: Tulakonzya kutondezya kuti tulilemeka kabotu ciindi camapulogilamu kwiinda mukusetiŋa mafooni eesu naa tuncini tumwi aawo mpotutakonzyi kunyonganya bamwi. Ikuti katubelesya kkamela, kancini kalekkooda vidiyo, ka tablet naa kancini kamwi ikali mbuli tootu, atubabikkile maano bamwi kwiinda mukutabanyonganya naa kubasinkila. Alimwi tulakonzya kutondezya kuti tulilemeka kabotu kwiinda mukutalemba tugwalo twaafooni ciindi camapulogilamu.
Cakulya Camasyikati: Mwalombwa kuti mukaletelezye cakulya camasyikati muciindi cakuti mukazwe abusena bwamuswaangano kuyakuula cakulya ciindi cakulyookezya masyikati. Mulakonzya kubelesya mutaanga musyoonto naa kabbeeke kakunyamwida zyakulya nkomukonzya kubikka kunsi acuuno. Zyakunyamwida cakulya zyamagilazi tazizumizyidwe abusena bwamuswaangano. Amuyeeye kuzibwezelezya zyakulya izyasyaala alimwi azintu zitajisi mulimo zyoonse.
Kusanga: Tulakonzya kutondezya kulumba kujatikizya bubambe bwamuswaangano kwiinda mukusanga cakuliyandila kumulimo wanyika yoonse kumuswaangano wacooko. Macceki oonse aasangwa ayelede kulembwa kuti: “Watchtower Society.”
Busilisi: Ikuti naa kuli musamu ngomunywa ngobakamulembela kucibbadela, mweelede kuuletelezya, mbwaanga taunooliko amuswaangano wacooko. Manyeleti aabelesyegwa kusilika bulwazi bwasyuga ayelede kusowegwa kabotu nkaambo alakonzya kuleta ntenda, aboobo taayelede kusowegwa muzyakusowela tombe zili amuswaangano.
Kulikwabilila Kuntenda: Mwalombwa kuti mubikkile maano kuzintu zikonzya kubapa kulicisa bantu akaambo kakutezemuka naa kulileba. Mwaka amwaka bantu balalicisa akaambo kamabbusu ngobasama, kwaambisya mabbusu malamfwu. Cilayandika kusama mabbusu aali kabotu, aakkwana kabotu aayoomugwasya kweenda kabotu mumasena aatali kabotu. Bazyali beelede kubikkila maano kubana babo kubona kuti balikwabilidwe alimwi akuti nzyobacita bana babo tazikonzyi kucisa bamwi. Beelede kumulaya ikuti kacita zintu zinyonganya bamwi.
Twakukubila Bana Alimwi Azyuuno Zyakupeta: Twakukubila bana alimwi azyuuno zyakupeta zyeelede kubelesyegwa buyo anze aatakwe zyuuno. Nokuba boobo zyuuno zipa bana kukkala kabotu zilazumizyigwa kuti zyabikkwa kabotu acuuno cili afwaafwi amuzyali.
Mafwuta Aanunkilila Kapati: Atutondezye luyando kuli bamwi kwiinda mukutabelesya mafwuta aanunkilila kapati naa mapefyuumu aakonzya kunyonganya baabo baciswa bulwazi bwakufwundilila naa malwazi amwi.—1Kor. 10:24.
Mafoomu aa Amuzumanane a Muntu Ooyu (S-43): Foomu ya Amuzumanane a Muntu Ooyu yeelede kubelesyegwa kupa twaambo tujatikizya muntu uuli woonse iwatondezya luyandisisyo akaambo kabukambausi bwamukwiizya ibucitwa ciindi camuswaangano. Mafoomu ngomwalemba alakonzya kutolwa ku Ofesi Iitambwidwa Mabbuku naa kumulembi wambungano yanu mwaakupiluka.
Mumaanda Aakulida, Mumantoolo Alimwi Amumasena Aamwi: Amulemeke zina lya Jehova kwiinda mukulilemeka kabotu mumaanda aakulida alimwi amumantoolo. Amukkazike moyo alimwi akutondezya bulemu ciindi nomukkwela zyakweendela zyabuleya, nomweenzya mootokala alimwi anomweenda munzila. Amusame munzila iimutondezya kuti muli mubelesi Munakristo.
Lubbapatizyo: Lubbapatizyo lwa Bunakristo talweelede kupa kuti bantu batalike kulwanina buya kukkopa zifwoto. Alimwi tacili cintu cakukkomanisya bana. Aabo ibajanika kulubbapatizyo beelede kwiimina kulaale alimwi akucita zintu munzila yabulemu. Ikuti naa bana kabaliko, bazyali babo naa ibabalela beelede kuba antoomwe ambabo kutegwa babalanganye.
Mulimo Wakulisungula: Aabo bayanda kucita mulimo ooyu beelede kulilembya ku Dipatimenti Yamulimo Wakulisungula amuswaangano wacooko. Bana ibajisi myaka yakuzyalwa iitasiki ku 16 abalo balakonzya kubeleka kabeendelezyegwa amuzyali naa uubalela naba muntu uumbi mupati uuzumizyidwe amuzyali naa ooyo uubalela.