Miswaangano Yacooko—Ciindi Cakukomba Kukkomanisya

1. Ino mbuti miswaangano yesu yacooko mbwiikozyenye amapobwe aakali kucitwa abana Israyeli?

¹ Josefa a Mariya abana babo alimwi abantu bamwi bakali kuunka ku Jerusalemu kumapobwe aamwaka. Aziindi eezyi, balo abakombinyina bakali kuzibikka ambali zyintu zyakali kubalibilisya mubuumi akubikkila maano kuzyintu zyakumuuya zyakali kuyandika kapati mubuumi bwabo. Mapobwe aaya akali kubapa coolwe cakuyeeya akubandika twaambo tujatikizya bubotu bwa Jehova akwiiya Mulawo wakwe. Mbubwenya buyo, tuyakuba acoolwe cakukomba Jehova cakukondwa kumiswaangano yacooko.

2. Ino ncinzi ncotweelede kucita kutegwa tulibambile muswaangano wacooko?

² Kulibambila Kulayandika: Banamukwasyi ba Jesu bakali kweenda musinzo uutandila kumakilomita aali 192 kuzwa ku Nazareta akujoka. Nokuba kuti tatuzyi naa bakali bongaye banabokwabo Jesu, inga twayeeyela buyo kupakasya nkobakajisi ba Josefa a Mariya nobakali kulibambila. Sena mwalibambila kale kutegwa mukajanike kumuswaangano ooyu wacooko mazuba oonse otatwe? Kutegwa mucite boobo, mweelede kubweza ciindi cakulyookezya naa kulomba kuli basikumulemba mulimo naa kubandika abayi bamwanaanu kutegwa bamupe ciindi cakuyakujanika kumuswaangano. Sena mwalibambila kale kujatikizya nkomuyakoona alimwi ambomuya kweenda? Kuti kamukonzya, amugwasye muntu umwi mumbungano uuyandika lugwasyo kuya kumuswaangano wacooko.—1 Joh. 3:17, 18.

3. Ino mbuti mapobwe aamu Israyeli mbwaakali kubapa coolwe cakuyanzana akukulwaizyanya?

³ Kuyanzana Kukulwaizya: Eelo kaka cakali coolwe cipati ku Bamajuda abakombinyina kuyanzana akukulwaizyanya ciindi camapobwe. Cakutadooneka, Jesu abanamukwasyi bakali kulangila kuyakubonana abeenzinyina. Alimwi bakalijisi coolwe cakuba abalongwe bapya akati kamakamu aa Bamajuda abasikusanduka kuba Bamajuda ibakali kujanika naa basimweendanzila bakali kuunka naa kujoka kuzwa ku Jerusalemu.

4. Ino mbuti mbotukonzya kutondezya kuti tulalubikkila maano lukamantano luliko akati kesu Tobanakristo?

⁴ Kamwi kaambo kapa kuti baciinga camuzike musyomesi uucenjede kababikka bubambe bwakuti katuswaangana antoomwe akuswiilila makani amiswaangano yacooko muciindi cakwaalemba buyo mumabbuku, nkakuti katukulwaizyanya. (Heb. 10:24, 25) Aboobo mweelede kuti kamufwambaana kusika kumuswaangano wacooko buzuba abuzuba kutegwa kamwiizya abamwi sicuuno katanaamba kuti nyimbo zitaalile zitondezya kuti tweelede kukkala. Muciindi cakuzwa abusena buswaanganinwa kuyakuula cakulya camasyikati, tukulwaizyigwa kuletelezya cakulya kutegwa katwiizya abaabo mbotuli limwi. Lukamantano luliko akati kesu Tobanakristo ncipego cizwa kuli Jehova alimwi tweelede kucibikkila maano.—Mik. 2:12.

5. Ino ncinzi ciyakutugwasya kutegwa tugwasyigwe amakani aayakupegwa?

⁵ Ciindi Cakwiiya: Kuzwa kubwana, Jesu wakali kujanika kumapobwe kutegwa aiye kujatikizya Usyi wakujulu. (Lk. 2:41-49) Ino ncinzi ciyakutugwasya swebo amikwasyi yesu kutegwa tukagwasyigwe amakani aayakupegwa? Ciindi camapulogilamu, mweelede kukkalikila alimwi tamweelede kubandika twaambo tutayandiki. Luwaile lwanu lwamunkomo azibelesyo zimwi buyo tazyeelede kumunyonganya naa kunyonganya bantu bamwi. Kamumulanga mwaambi naambaula alimwi akulemba twaambo mubufwaafwi. Amukkale antoomwe amukwasyi wanu akubona masimpe kuti abalo bana banu balaswiilila. Ciindi camangolezya kamubandika ambomuli limwi twaambo twamukkomanisya.

6. Ino ncinzi ncotweelede kuyeeya kujatikizya mbotweelede kusama akulibamba?

⁶ Kusama Akulibamba: Basimakwebo bakumasi aambi tiibakali kukatazyigwa kubazyiba banamukwasyi ba Jesu a Bamajuda bambi bakali kuunka naa kujoka kuzwa kumapobwe akaambo kakuti Bamajuda bakali kubikka mayaayila mumyoombe yazikobela zyabo alimwi akwaanga katambo kamubala wacikambwe mpaatalikila mayaayila. (My. 15:37-41) Nokuba kuti Banakristo tabasami zisani ziboneka kuba zyaalubazu, tuzyibidwe kuti tusama cabulemu akuboneka kabotu. Tweelede kubikkila maano mbotulibonya ciindi notuunka kumuswaangano wacooko anotujoka alimwi anotuli mudolopo naa mucilawo mucitilwa muswaangano. Nokuba kuti twacinca zisani ciindi naamana mapulogilamu, tweelede kuzumanana kuboneka kabotu alimwi akusama kabbaaji kesu kakumuswaangano wacooko. Ikusama kabotu kuyakupa kuti bantu bazyibe kuti tuli Bakamboni alimwi tuya kukwelelezya baabo batulangilila.

7. Ino nkaambo nzi ncotweelede kulyaaba kubeleka mulimo wakuliyandila amuswaangano wacooko?

⁷ Mulimo Wakuliyandila: Babelesi banji balayandika kutegwa muswaangano wacooko weende kabotu. Sena mulakonzya kugwasyilizya? (Int. 110:3) Milimo njotucita amiswaangano yacooko ncibeela camulimo wesu uusetekene alimwi ipa bumboni bubotu. Mupati wamilimo acilawo cimwi mucitilwa muswaangano wacooko wakabotelwa naakabona cilawo mbocakasalazyigwa abakwesu, eelyo wakalemba kuti: “Ndiyanda kumulumba akaambo kamulimo mupati ngomwacita. Lyoonse ndali kumvwa buyo kuti Bakamboni ba Jehova mbantu bajisi mpuwo mbotu yakuti lyoonse cilawo ncobabelesya balacisalazya kwiinda mbobaacijana. Nywebo ambunga yanu mwapa kuti cilawo eeci ciboneke kabotu alimwi boonse bali kubeleka mulimo ooyu mbabombe myoyo.”

8. Ino ndugwasyo luli buti ndobakonzya kupa ba Cibeela Calugwasyo Lutaanzi alimwi ino ncinzi ncobeelede kuzyibila limwi aabo bayakujanika kumuswaangano?

⁸ Cibeela Calugwasyo Lutaanzi cigwasya buyo muntenda zyacibukilambuta alimwi tacili cibbadela naa busena nkotukonzya kubweza misamu. Mwalombwa kuletelezya misamu njomubelesya lyoonse nkaambo tamukaijani misamu eeyo kumuswaangano wacooko. Aabo baciswa bulwazi bwakusuntuka, bwasyuga, bwamoyo naa malwazi aambi, beelede kuletelezya misamu njobabelesya. Beelede kuti kabali amuntu umwi wamumukwasyi naa wamumbungano yabo uubuzyi kabotu bulwazi bwabo alimwi uukonzya kuzyiba cakucita ikuti naa kwabuka penzi. Naa kuli bamwi ibaciswa bulwazi bukatazya pele tabajisi bamukwasyi bakonzya kubalanganya, ibaalu beelede kwaambilwa kutegwa babikke bubambe bwakuti bagwasyigwe. Amiswaangano yacooko, tacikonzyeki kubajanina maanda aalubazu nkobakonzya koona aabo baciswa.

9. Ino ncoolwe cili buti cakupa bumboni ciyakujanika mudolopo naa mucilawo muyakucitilwa muswaagano wacooko?

⁹ Coolwe Cakupa Bumboni: Bantu banji bakkala mudolopo naa mucilawo muyakucitilwa muswaangano wacooko bayakubona bantu beenzu basamide kabotu alimwi basamide mabbaaji aakumuswaangano wacooko alimwi eeci ciyakupa kuti tubandike ambabo kujatikizya muswaangano wacooko. Noyakamana pulogilamu, mwana umwi uujisi myaka yone yakuzyalwa wakatolelezya bbuku lyakazwaakumwaigwa kuŋanda nkobasambala zyakulya akutondezya sikusambala. Eeci cakapa kuti bazyali bamwana ooyu musankwa batambe mukaintu ooyu kumuswaangano wacooko.

10. Ino mbuti mbotukonzya kuzibikkila maano zyintu zyakumuuya mbubonya mbobakali kucita banamukwasyi ba Jesu?

¹⁰ Mapobwe aansiku akali kupa kuti Bamajuda ibakali kubikkila maano kuzyintu zyakumuuya bakkomane. (Dt. 16:15) Banamukwasyi ba Jesu bakali kkomene kubeleka canguzu kulibambila kutegwa bakajanike akugwasyigwa kapati. Andiswe tulaikkomanina miswaangano yacooko, twiibona kuba cipego cizwa kuli Taata wakujulu siluyando. (Jak. 1:17) Ecino nceciindi cakutalika kulibambila kuyakujanika kumuswaangano wakukomba Jehova uucitika ciindi comwe amwaka!

[Kabbokesi kali apeeji 5, 6]

Malailile a Muswaangano Wacooko

◼ Ciindi Camapulogimu: Mazuba oonse otatwe mapulogilamu anakutalika aciindi ca 8:20. (Ku Maanda Akucitila Miswaangano Mipati, milyango inakujalulwa aciindi ca 7:00.) Ciindi nyimbo zya Bwami zyatalika kulila, toonse tweelede kuti katukkede mumasena eesu kutegwa mapulogilamu akatalike cabulemu. Mu Buzuba Bwakusaanguna mapulogilamu ayakumana aciindi ca 15:55, mu Buzuba Bwabili aciindi ca 16:15, mu Buzuba Bwatatu aciindi ca 15:10.

◼ Kwakusiya Myootokala: Mbokunga ku Maanda Akucitila Miswaangano Mipati masena masyoonto kwakusiya myootokala, kuti kacikonzyeka aabo bajisi myootokala beelede kumvwana kutegwa bakeendele antoomwe akubelesya myootokala misyoonto.

◼ Kubamba Aakukkala: Busena bwakukkala inga bwabambilwa buyo baabo mbomwaboola limwi mumootokala naa banamukwasyi mbomukkala limwi, abaabo mbomuyiisya Bbaibbele.—1 Kor. 13:5.

◼ Cakulya Camasyikati: Mwalombwa kuti mukaletelezye cakulya camasyikati muciindi cakuti mukazwe abusena bwamuswaangano kuyakuula cakulya aciindi cakulyookezya. Inga mwabelesya mitaanga iitali mipati kapati kunyamwida cakulya. Zyakunyamwida cakulya zikonzya kupwaika tazizumizyidwe amuswaangano wacooko.

◼ Kusanga: Tulakonzya kugwasyilizya bubambe bwamuswaangano wacooko kwiinda mukusanga cakuliyandila kumulimo wanyika yoonse Kuŋanda ya Bwami yesu naa kumuswaangano wacooko. Macceki oonse aasangwa kumuswaangano wacooko ayelede kulembwa kuti: “Watch Tower Society.”

◼ Ntenda: Ikuti kwacitika ntenda abusena bwamuswaangano wacooko iiyandika busilisi, amubone sikugwasyilizya uuli afwaafwi, walo uyakuzyibya bacibeela Calugwasyo Lutaanzi kutegwa bakwesu beelela ibali mucibeela eeci bakailange ntenda eeyo yacitika akupa lugwasyo.

◼ Kulekkooda: Mincini yakulekoodesya tayeelede kubikkwa kumincini yamajwi naa kumagesi aabelesyegwa alimwi tayeelede kunyonganya bamwi niibelesyegwa.

◼ Mafwuta Aanunkilila Kapati: Atubeetelele bamwi kwiinda mukutabelesya mafwuta aanunkilila kapati naa mapefyuumu aakonzya kunyonganya baabo baciswa bulwazi bwakufwundilila naa malwazi amwi.—1 Kor. 10:24.

◼ Mafoomu aa Amuzumanane a Muntu Ooyu: Foomu ya (S-43) yeelede kubelesyegwa kupa twaambo tujatikizya muntu uutondezya luyandisisyo akaambo kabukambausi bwamukwiizya mbotwacita ciindi camuswaangano. Basikumwaya beelede kuletelezya foomu ya Amuzumanane a Muntu Ooyu yomwe naa obilo kumuswaangano wacooko. Mafoomu ngomwalemba ayelede kupegwa ku Cibeela Cilanganya Mabbuku naa kumulembi wambungano yanu mwaakupiluka.—Amubone Mulimo Wesu wa Bwami wa November 2009 p. 4.

◼ Lubbapatizyo: Ku Maanda Aakucitila Miswaangano Mipati ikuli zizyiba zyakubbapatizyilwa, baswiilizi beelede kutobela malailile aakuti kabakkede ciindi calubbapatizyo. Kumasena ooko lubbapatizyo nkolucitilwa kubusena bumbi mbuli kumulonga naa kucizyiba, bana tabeelede kulunduka kumbele kwabasikubbapatizyigwa, muciindi caboobo beelede kwendela musyule lyabasikugwasyilizya. Cilibonya kuti kwamyaka minji mbasyoonto bantu bapati ibalikujanika ciindi calubbapatizyo. Nobaba bazyali bajisi bana baya kukubbapatizyigwa tabaunki kuya kulibonena lubbapatizyo lwabana babo. Bazyali alimwi abantu bapati bamwi bakulwaizyigwa kunakujanika kulubbapatizyo kutegwa kababulemeka bubambe oobu.

◼ Cisobano: Kunyina muntu uuzumizyidwe kweendeenda acibumbili naa mumbali lyacibumbili kuti afwotole bantu ciindi cacisobano, nikuba kunyonganya beebelela cisobano. Mwalombwa kuti mutanoobasinkili bakwesu. Bana beelede kukkala antoomwe abazyali babo. Basikugwasyilizya balizumizyidwe kwaandanya bana bakkede kabunga balikke akubatola kubazyali babo naa aanze aabusena buswaanganinwa kutegwa batanyonganyi bamwi.

◼ Kusowa Tombe: Tuyanda kuti busena bwesu bwamuswaangano wacooko kabusalala akusumbula. Ikuti katuyobolola cakulya cesu casyaala, akubwezelela mapepa amafwuse amwi akuzisowela kubusena busowelwa tombe, eeci cilakonzya kupa kuti bantu bamulemeke Leza. Kumuswaangano wacooko uuboola, toonse atukasoleke kusalazya busena bwesu bwakukombela alimwi akucita kabotu zyintu kutegwa “[tu]lemeke muziyanza zyoonse lwiisyo lwa-Leza Mufutuli wesu.”—Tit. 2:10.

◼ Zimbuzi: Bana basyoonto lyoonse nobaunka kucimbuzi alimwi akukusamba beelede kusindikilwa abazyali naa amuntu umwi mupati. Kumiswaangano, zimwi ziindi kwainda woola lyomwe naa kwiinda waawo bana balakakilwa kukkalikila. Kutegwa bajane nzila yakuya kusobana, bunji bwaziindi bana balaba acilengwa cakuunka-unka kucimbuzi ciindi camapulogilamu, calo cipa kuti bamwi banyonganisyigwe. Ikuti bazyali babaambila bana boonse kuti baunkile limwi kucimbuzi mapulogilamu kaatanatalika, inga tabakonzyi kukatazya kwainda ciindi cisyoonto buyo kuzwa niwatalika muswaangano. Alimwi ndukwabililo kubana besu basyoonto ciindi notubasindikila kucimbuzi alimwi akukusamba.

◼ Mulimo Wakuliyandila: Tulakonzya kukkomana kwiinda ikuti naa twalyaaba kucita mulimo wakuliyandila amuswaagano wacooko. (Inc. 20:35) Aabo bayanda kucita boobo beelede kulilembya ku Cibeela Camulimo Wakuliyandila amuswaangano wacooko. Bana ibatasiki kumyaka iili 16 yakuzyalwa abalo balakonzya kubeleka kabeendelezyegwa amuzyali naa uubalela naba muntu umbi mupati uuzumizyidwe amuzyali.