Ciindi Cakulya Kumuuya Akukkomana
1. Ino mbuti Jehova mbwazilanganya nzyobayandika kumuuya babelesi bakwe?
1 Jehova caluyando ulazilanganya nzyobayandika kumuuya babelesi bakwe. Nokuba kuti bantu banji munyika balaanzala, swebo tulya kabotu kumuuya. (Is. 65:13) Nzila yomwe Jehova njabelesya kutusanina kumuuya nkwiinda mumiswaangano yesu yacooko iicitwa amwaka. Sena mulalibambila kuti mukajanike mazuba oonse ku Muswaangano Wacooko uuboola wakuti “Amusololelwe Amuuya wa Leza”? Kwabambwa pobwe lijisi zyakulya zyakumuuya zinona alimwi zijisi busani.
2. Ino ncinzi ncotweelede kucita kutegwa tulibambilile limwi zyamuswaangano?
2 Amulibambilile Limwi: “Makanze aabusungu alaleta zilyo zinji.” (Tus. 21:5) Aboobo nomulibambila kuyoojanika mazuba oonse otatwe kumuswaangano, tamweelede kukuyumbila ambali kubalomba basikumulemba mulimo kuti bakamupe ciindi cakuti mukajanike. Ikuti naa muyooyanda kwakoona, sena mwakalibambila kale? Alimwi inga mwayanda kulibambila zyakulya zyamasyikati kutegwa mukalye aantoomwe abakwesu. Amulibambile kuyoosika kakucili ciindi buzuba abuzuba kutegwa mukajane aakukkala alimwi akutola lubazu mulwiimbo lwakujalula alimwi amupailo.
3. Ino nzisani zili buti nzyotweelede kulibambila kuyoosama?
3 Atubone kuti zisani nzyotuyanda kuyoosama nzyabulemu alimwi zileelela. (1 Tim. 2:9, 10) Miswaangano yacooko itupa ciindi cibotu cakupa bumboni mucilawo. Kwiinda mukusama cabulemu ciindi notuli mucilawo mucitilwa muswaangano wacooko alimwi amukusama mabbaaji eesu aakumuswaangano, tulaindana kapati abantu batasyomi alimwi cilabakulwaizya kapati bantu batulangilila.
4. Ino ncinzi ciyakutugwasya kubikkila maanu kumapulogilamu amikwasyi yesu?
4 Amuswiililisye: Masimpe ngakuti tatuyandi kuyooyindwa malailile aali oonse aayakwaabilwa kupobwe lyakumuuya eeli. (Tus. 22:17, 18) Kutobelezya mu Bbaibbele lyesu ciindi magwalo naabalwa alimwi akulemba twaambo mubufwaafwi ciyakutugwasya kubikkila maanu kumapulogilamu alimwi tatukanyonganizyigwi. Mpoonya mangolezya tulakonzya kubelesya nzyotwalemba mukubandika twaambo tupati-pati twapulogilamu abamwi. Mumyaka misyoonto yainda, kwali kulibonya kuti bakubusi bamwi bakkala aantoomwe kumuswaangano akubandika naa kutuminana milumbe amafooni aamunkomwi nanka kucita zyintu zimwi ciindi camapulogilamu. Kuti naa tulijisi bana, ikujatikizya abakubusi inga cainda kugwasya kuti mukwasyi woonse wakkala aantoomwe akuswiilila zibandikwa muciindi cakubazumizya kuti bakkale abananyina.
5. Mbuti mbotukonzya kuukkomanina kapati muswaangano?
5 Amukukkomanine Kuyanzana: Elo kaka cilainda kunona cakulya cinono ikuti naa twaabana abalongwe besu! (Tus. 15:17) Mbubwenya buyo, kuyanzana abakwesu kulakonzya kupa kuti tuukkomanine muswaangano. Aboobo mapulogilamu naatanatalika naanka naamana, tweelede kulipandulula kubantu baboola kumuswaangano alimwi akuyanzana. (Int. 133:1) Ciindi sicuuno natulomba kuti tukkale nyimbo kazitanatalika, tweelede kwiileka mibandi yesu eelyo akukkala muzyuuno zyesu kulindila kuti mapulogilamu atalike.
6. Amuluule cakamucitikila nywebo citondezya mbotukonzya kupa bumboni ciindi notuli mucilawo mucitilwa muswaangano?
6 Amupakamane Mukupa Bumboni: Kanji-kanji miswaangano ilatupa ciindi cibotu cakupa bumboni. Ibunji bwabaabo baunka kumuswaangano inga balabuzyigwa kujatikizya mutwe wamakani uuli abbaaji yakumuswaangano. Eeci citalisya mibandi alimwi akupa bumboni bubotu kujatikizya kasimpe. Bamwi ibakabuzya bakatambwa kumuswaangano aboobo bakaboola.
7. Nkaambo nzi ncotweelede kujanika kumuswaangano wacooko uuboola?
7 Zyuulu zyamawoola zyabelesyegwa mukubamba mapulogilamu, kubamba masena aakucitila muswaangano, zibeela zyamuswaangano alimwi amakani. Milimo eeyi yoonse iicitwa camoyo woonse mukubamba pobwe lyakumuuya itondezya mbwabalanganya bantu bakwe Jehova. Atukajanike toonse kumuswaangano akwiiya zyintu zinji. Twaakucita boobo, “[tu]yooimba cakukondwa mumoyo” mukwiimpana anyika.—Is. 65:14.