Amulindilile Jehova

1. Ino muswaangano wacooko ujisi mutwe wamakani nzi, alimwi ino nkaambo nzi ncoweelela?

¹ Isaya wakalemba kuti: “Jehova ngu-Leza wabululami. Bali acoolwe boonse bamulindilila.” (Is. 30:18c) Kuli zibalo zinji zyamu Bbaibbele zyalubeta lwa Leza kuli basinkondonyina azyalufwutuko lwababelesi bakwe basyomeka. Ino mazuba aano zibalo zyamusyobo ooyu zibayiisya nzi bakombi ba Jehova? Ino ncinzi ncotweelede kucita lino kutegwa tulibambile “buzuba bwa-Jehova obo bupati buyoosya”? (Joel. 2:31, 32) Muswaangano wesu Wacooko uuboola wa “Lufwutuko Luli Afwaafwi!” uyootupa kwiitelaika mibuzyo eeyo alimwi akulilingula tobeni. Uyootugwasya kulindilila Jehova.

2. Ino mbuti mbotukonzya kutondezya kulumba kumuswaangano wesu wacooko?

² Sena mwalibambila kuyoogwasyigwa kwamazuba oonse otatwe aamuswaangano wacooko? Mucikozyanyo, sena mwakabandika kale abasikumulemba mulimo kutegwa bamupe ciindi cakuyoojanika? Mutasumpyi kuti muyoolomba mazuba aaboola pe. Amwaapailile makani aaya. Mpoonya amubalombe. (Neh. 2:4, 5) Mbubonya buyo, tatweelede kukuyumbila ambali kulibambilila limwi zyakweendela, kwakoona alimwi azimwi ziyandika. Kulibambila kabotu ooku kutondezya kulumba kwesu kupati kutebule lya Jehova lyakumuuya. Baalu beelede kupakamana kugwasya baabo bayandika lugwasyo mukulibambila zyamuswaangano wacooko, kapati aabo bacembeede bali mumbungano.—Gal. 6:⁠10.

3. Ino mbube buli buti mbobeelede kutondezya bantu ba Jehova mubusena bwamuswaangano wacooko?

³ Kulilemeka Kumupa Bulemu Leza: Notubungana mubunji amuswaangano wacooko, kulilemeka kwesu kupa bumboni kubantu bamucilawo. Ino ncinzi ncotuyandika kucita? Notuli kubusena buli boonse bwamakwebo mucilawo camuswaangano, aabo mbotuula zintu beelede kukatalusyigwa kubube bwesu bwa Bunakristo, mbuli busicamba, lubombo, kulyeendelezya alimwi abutontozi. (Gal. 5:22, 23; Flp. 4:5) Toonse tweelede kuba aluyando ‘lutakwe cisapi, lutalilangilili cintu, lutafwambi kujata bukali.’ Nokuba kuti kulaba buyumu-yumu naa kunyonganyizyigwa, tuyooyanda ‘kucita zintu zyoonse cakuti kube bulemu kwa Leza.’—1 Kor. 10:31; 13:5.

4. Ino mbuti bazyali mbobakonzya kugwasya bana babo kulilemeka munzila iipa bulemu kuli Jehova?

⁴ Nowakamana muswaangano wacooko umwi, mweendelezi wahotela umwi wakakkomana kapati akaambo kakulilemeka alimwi akusama kwamukubusi wesu cakuti wakaamba kuyanda kwakwe “lyoonse kuba a Bakamboni ba Jehova kuba beenzu muhotela lyakwe.” Eelyo taciliboteli kaka cintu cakamupa kukkomana! Ooku nkulumba kukuyiisya alimwi akweendelezya nkomucita nobazyali. Tacikonzyi kubota kubazyali kusiya bana babo kakunyina uubalanganya. Bana lyoonse beelede kweendelezyegwa kabotu. (Tus. 29:15) Kulilemeka kwabo akumutembaule Jehova akumukkomanisya.—Tus. 27:11.

5. Ino mbuti mbotukonzya kumulemeka Jehova kwiinda mukusama akulibamba kwesu?

⁵ Kusama Akulibamba Kabotu: Aumwi wandiswe ulakonzya kukulwaizya kapati kumuswaangano wacooko kwiinda mukutasama akulibamba kwakuciindilizya, kuteelede naa kwakudabila. Eeci cilabeleka nomuunka alimwi akujoka kubusena bwamuswaangano wacooko, nomubeleka ikubamba busena bwamuswaangano alimwi anomujanika kumapulogilamu. Mbotuli babelesi ba Leza, ncotubikkila kapati maanu ndizina ampuwo ya Jehova, kutali kucita nzyotuyanda tobeni pe. Mitwe yamukwasyi mbobajisi mukuli wakuba masimpe kuti kusama kwabamumukwasyi wabo kutondezya kulibombya akuba abulemu ciindi coonse.—1 Tim. 2:9.

6. Nkaambo nzi iciindi cakulyookezya ncotweelede kusama cabulemu mbubwenya mbotusama ciindi camapulogilamu?

⁶ Cilayandika kapati kusama cabulemu iciindi cakulyookezya mumasena aakoona, kuzintoolo alimwi amumasena musambalilwa zyakulya. Cilayandika kusama zisani nzyotusama kumuswaangano ikuti katutalidi abusena bwamuswaangano amana mapulogilamu. Kusama bbaaji lyakumuswaangano wesu wacooko kutupa ziindi zyakukambauka mukwiizya.—2 Kor. 6:3, 4.

7. Mbuti mbotukonzya kugwasyilizya kukweendelezya kabotu zintu alimwi alukkomano kumuswaangano wacooko? (Amubone “Ziyeezyo zya Muswaangano Wacooko.”)

⁷ Isaya wakasinsima kuti: “Jehova ulalindila kuti amufwide luzyalo. Ulalisumpula kuti amufwide buuya.” (Is. 30:18a) Kulumba kubuuya aluzyalo lwa Jehova kweelede kutupa kumulemeka kwiinda mukulilemeka akusama kwesu notubungana antoomwe kumiswaangano yesu yacooko. Muswaangano wesu Wacooko wa “Lufwutuko Luli Afwaafwi!” aukape bulemu kuli Leza wesu alimwi akutugwasya kumulindilila.

[Kabbokesi kali apeeji 5]

Ziyeezyo zya Muswaangano Wacooko

◼ Ciindi Camapulogilamu: Mazuba oonse otatwe imapulogilamu anootalika aciindi ca 8:45. (Ku Ŋanda Yakucitila Miswaangano Mipati iyakayakilwa mu Lusaka, milyango iyoojulwa ciindi ca 7:00). Kakuceede maminiti masyoonto kuti mapulogilamu atalike, sicuuno uyookkala kucibumbili zyanoolila nyimbo zya Bwami. Toonse tweelede kuti katukkede ciindi eeci kutegwa mapulogilamu akatalike cabulemu. Mu Buzuba Bwakusaanguna, mapulogilamu ayoomana aciindi ca 16:15, Buzuba Bwabili aciindi ca 16:05, eelyo mu Buzuba Bwatatu ayoomana aciindi ca 15:10.

◼ Kwakusiya Myootokala: Mumasena aamuswaangano wacooko oonse, kuyooba busena bwakusiya myootokala kakunyina kubbadelesyegwa. Mabbaaji aamuswaangano wacooko ngaayoobelesyegwa kuba cizibyo cakusiya myootokala.

◼ Kuyobola Busena: Busena bwakukkala inga bwayobwedwa buyo baabo mbomwaboola limwi mumootokala naa mbomukkala limwi kuŋanda.

◼ Cakulya Camasyikati: Mwalombwa kuti mukaletelezya cakulya camasyikati muciindi cakuti mukazwe abusena bwamuswaangano kuya kukuula cakulya iciindi cakulyookezya masyikati. Inga mwabelesya mutaanga naa cinzuma ncomukonzya kubikka munsi acuuno canu. Mitaanga naa zinzuma zipati, mabbodela alimwi abukoko tazizumizyidwe abusena bwamuswaangano.

◼ Zyakusanga: Kulabelesyegwa mali aali mbwaabede mukubamba muswaangano wacooko. Tulakonzya kutondezya kuti tulalumba kwiinda mukusanga cakuliyandila kumulimo wanyika yoonse ku Ŋanda ya Bwami yesu naa kumuswaangano. Macceki oonse aasangwa kumuswaangano ayelede kubbadelwa ku “Watch Tower Society.”

◼ Ntenda: Ikuti kwacitika ntenda abusena bwamuswaangano iiyandika busilisi, amubone sikugwasyilizya uuli afwaafwi walo uyoozibya bacibeela ca Lugwasyo Lutaanzi kutegwa ibakwesu beelela kupa lugwasyo lutaanzi amuswaangano bakabone ntenda eeyo akupa lugwasyo.

◼ Kulekooda: Mincini yakulekoodya iili yoonse tayeelede kubikkwa kumincini yamajwi naa kumagesi aabelesyegwa alimwi tayeelede kunyonganya bamwi ciindi niibelesyegwa.

◼ Kufwotola: Ikuti kamuyanda kufwotola, mwalombwa kuti mutabelesyi mumuni wakkamela.

◼ Mapeja ama Selofooni: Eezi zyeelede kubambwa kabotu kutegwa zitanyonganyi bamwi.

◼ Mafwuta Aanunkilila Kapati: Luyooba lweetelelo ikuti tiitwabelesya mafwuta aanunkilila kapati naa mapefyuumu aakonzya kunyonganya baabo baciswa bulwazi bwakufwundilila naa malwazi amwi aakozyanya ayaaya.—1 Kor. 10:⁠24.

◼ Mafoomu aa Amuzumanane a Muntu Ooyu: Foomu ya Amuzumanane a Muntu Ooyu (S-43) yeelede kubelesyegwa kupa twaambo tujatikizya muntu uuli oonse uutondezya luyandisisyo akaambo kabukambausi bwakwiizya mbotwacita ciindi camuswaangano wacooko. Basikumwaya beelede kuletelezya foomu ya Amuzumanane a Muntu Ooyu yomwe naa obile kumuswaangano wacooko. Mafoomu amanizyigwa kwiingulwa mibuzyo, ayelede kupegwa ku Cibeela Cilanganya Mabbuku naa kuyoopa mulembi wambungano yanu mwaakujokela.—Amubone Mulimo Wesu wa Bwami wa February 2005, p. 7.

◼ Lubbapatizyo: Basikubbapatizigwa beelede kuti kabakkede abusena busalidwe kaatanatalika mapulogilamu aamafwumo-fwumo mu Buzuba Bwabili. Aumwi uuyanda kubbapatizigwa weelede kuletelezya cisani cabulemu cakusama aciindi cakubbizigwa alimwi acakulipukutya. Mazuba aainda bamwi bakali kusama zyakusama ziteelede alimwi zyakali kunyonganya ciindi eeci. Baalu ibabuzya basikubbapatizigwa mibuzyo iili mubbuku lya Bakamantene Mukucita Kuyanda kwa Jehova beelede kuba masimpe kuti aumwi watumvwisya twaambo ootu. Kubbapatizigwa ikutondezya kulyaaba kwaumwi ncintu cicitwa akati kamuntu ooyo alimwi a Jehova. Aboobo, taceelede kuti basikubbapatizigwa kabakumbatana naa kujatana kumaanza ciindi nobabbapatizigwa.

◼ Majwi Aakucenjezya: Amupakamane kumapenzi aakonzya kumusikila kutegwa kutabi buyumu-yumu. Kanji-kanji bakabwalala alimwi abantu bampelenge balayanda kunyonganya bantu beenzu. Amubone kuti mootokala alimwi ancinga yanu ilikkiidwe ciindi coonse, alimwi mutasiyi cintu cili coonse cilibonya cikonzya kukwelelezya umwi kuti abbe. Bakabwalala babikkila kapati maanu aabungana bantu banji. Inga tiibwaba busongo kusiya zintu ziyandika acuuno canu. Tamukonzyi kusyoma kuti boonse bali munsi lyanu Mbanakristo. Ino nkaambo nzi ncomunga mwasunkila boobu? Kulatambulwa twaambo tujatikizya bantu bamwi batali Bakamboni basoleka kucenga akubba bana. KAMUBABWENE BANA BANU MPOBABEDE CIINDI COONSE.