Ikusama Alimwi Akulibamba Munzila Yeelede
1 “Baalumi boonse, kubikkilizyaa basankwa-sankwa balasama matayi. Banakazi boonse bapati alimwi abana basama madeleensi naa masikeeti. Takulibonyi pe muntu uusamide bulukwe bwajini naa isyaati kakunyina tayi. Bantu boonse kubusena ooku balibonya kabotu.” Mbwakaamba oobu makani aamwi. Ino ninkamu nzi yabantu yakali kupandululwa? Sena mbaasimuswaangano watwaambo twacisi? Sena mbantu bali kumusobano? Sena mbantu ibali kunkosaadi? Peepe! Bakali kupandulula nkamu yabakwesu alimwi abacizi ibakali kumuswaangano mupati wacooko mwaka wakamana.
2 Kumuswaangano uumbi wacooko, simubweza twaambo wamuteende wakaipandulula boobu nkamu ya Bakamboni: “Boonse baalumi mbalondo alimwi basamide masuuti amatayi. Banakazi balisamide bweelede alimwi baboneka kabotu.” Sikulangilila wabili wakali kubeleka mulimo wabulindizi wakaamba kuti: “Muli bantu balilemeka kabotu, muli balondo alimwi mulibonya kabotu. Mbomuboneka mulandikondelezya kapati. Munyika eeyi iizwide tombe, mwacikonzya kulisalazya!” Elo taaliboteli kaka makani aaya aapanduluda nkamu yesu! Sena tatukkomani kuti bakwesu bakumuuya kabalumbaizyigwa munzila iili boobu? Masimpe, umwi aumwi wa Bakamboni wakali munkamu wakalijisi lubazu mumakani aaya mabotu akaambo kakulibonya kabotu.
3 Twabaa mpuwo munyika yoonse mbwiizulwa akaambo kakwiindana abambi kujatikizya mbotulibonya. (Malk. 3:18) Ino nkaambo nzi? Nkaambo kakuti tutobela lulayo lwamu Magwalo ‘lwakusama cakulibombya mbubonya mbokweelede, . . . mbubonya mbobeelede aabo bana Leza.’—1 Tim. 2:9, 10.
4 Ino Kusama Kwanu Alimwi Akulibamba Ncinzi Ncokutondezya? Izisani nzyotusama alimwi ambotuzisama zilatondezya mbotubede, nkokuti nzyotusyoma, ibube bwesu alimwi amakanze ngotujisi. Imisyobo yazisani nzyotusala zilatupandulula mbotubede alimwi ancotwiiminina. Tutabi notusumpula mizeezo iisofweede alimwi akulilemeka kuli mukukulwaizyigwa munyika. Ncotweelede kubikkila maano kapati taili mpuwo yamusyobo wacisani ooyu uudumide kubantu banji pe, pele nkuti sena uleelede kusamwa kulibaabo balyaamba kuti mbabelesi ba Leza. (Rom. 12:2) Muciindi cakutondezya muuya wakutayanda kweendelezyegwa naa uutondezya bukkale bwakutalilemeka, tweelede kumuyanda akumutondezya kuti ncobeni ‘tulamulemeka Leza.’—1 Pet. 2:12.
5 Zimwi ziindi imuntu mupya naa uutanasima munzila yakumuuya ulakonzya kutobela nsamino naa kulibamba kulumbaizyigwa munyika kakunyina kusaanguna kulanga-langa mbuli mboimujatikizya Jehova alimwi ambunga yakwe. Swebo toonse tulakonzya kulilingula kutegwa tubone naa twajatikizyigwa akuyeeya kwanyika. Tulakonzya kumusikila mukwesu naa mucizi uulemekwa alimwi uusimide munzila yakumuuya akumulomba kuti atwaambile kakunyina kutwiinda mumbali kujatikizya nsamino akulibamba kwesu mpoonya akululanga-langa kapati lulayo ndotwapegwa.
6 Bamwi balazumina kakunyina akudooneka pe kuti baleelede kucenjela kujatikizya mbobasama nobali kumuswaangano wacooko. Pele kunyina nobasama bweelede ciindi nocimana cibeela capulogilamu yabuzuba. Amuzumanane kutobela zyeelelo zisumpukide ziyandika kubabelesi Banakristo. (2 Kor. 6:3, 4) Kufwumbwa nkotukonzya kuba, ibantu nkobakonzya kutubona mabbaaji eesu aakumuswaangano alimwi akusama kwesu akulibamba kulatuzyibya kuti tuli Bakamboni ba Jehova. Aboobo, lyoonse tweelede kusama kabotu alimwi munzila yeelede ikutondezya kuti ‘tatuli bayeeyi nyika pe.’—Joh. 15:19.
7 Atukacite mbotukonzya mwaka uuno ku Muswaangano Wacooko wa “Basikwaambilizya Bwami Ibasungu” kutegwa tukasinizye kuti tuli “bantu basalalisya ba-Jehova Leza [wesu].” Impuwo mbotu iiboola iyooyungizya ‘bulemu, mpuwo alimwi akutembaula’ Jehova.—Dt. 26:19.
Kabbokesi kali apeeji 6]
Mbotukonzya Kumutembaula Jehova:
■ Atusame munzila yeelela babelesi ba Leza.
■ Atukutantamuke kusama munzila iitondezya muuya wanyika.
■ Atulitondenzye munzila yeelede eeyo iitondezya mbobeelede kusama bantu bakomba Leza.