Kabbokesi Kamubuzyo
◼ Ino buti mbotweelede kusama alimwi akulibamba ciindi notuswaya munzi wa Beteli alimwi mayake aamutabi?
Iciindi notuswaya ku Beteli, kufwumbwa naa tuyanda kuyoobona mayake aaya naa nkuyanzana abamukwasyi wa Beteli, “kusama kwesu, kulibamba akulilemeka kweelede kukozyanya akokuya nkotucita ciindi notuli kumiswaangano yabukombi ku Ŋanda ya Bwami.” (om 131) Pele, kulibonya kuti bamwi bakwesu alimwi abacizi balaciindilizya kusama munzila iitali yabulemu nobaswaya kumaofesi aamutabi. Eeci taceelede kucitwa pe nomuswaya mayake aaya. Tweelede kulibonya kabotu, kulibombya alimwi katuli balondo, ikutondezya bulemu bweelede kubabelesi ba Jehova Leza. Bamwi tabasami munzila yabulemu nobaswaya ku Beteli. Balakonzya kabasamide masyaati aatasyundidwe mumalukwe, masikkipa aalembedwe-lembedwe naa zisani zisamwa lya zisobano. Sena inga twaakuswaya katusamide zisani zyatombe? Peepe. Mumakani aaya, tweelede kutobela bukkale busumpukide mbweena ibwaandaanya bantu ba Leza kunyika. (Rom. 12:2; 1 Kor. 10:31) Tweelede kubikkila maano kapati kukusamba aamubili alimwi akuwasya zisani. Ikutalibonya kabotu naa kubaa bweema bwankasaalo kulakonzya kutondezya kubula luyando kubeenzuma. Mbwaanga mu Bbaibbele kusalala alimwi abulondo bwaamubili ziliswaangene kapati, tweelede kubikkila maano kapati notulibambila kuyooswaya.—Kul. 30:17-20; 1 Tim. 2:9, 10.
Eeci cilayandika kapati notuswaya munzi wa Beteli alimwi amayake aamutabi akaambo kakuti basikuswaya balalangililwa abantu banji batali Bakamboni pe. Basikulangilila bali boobu balakonzya kubaa mizeezo kujatikizya bantu ba Leza alimwi ambunga yakwe kweelanaa zintu nzyobabona. Aboobo cili kabotu kubandika abasikwiiya Bbaibbele alimwi abantu bamwi aabo bayanda kuyooswaya, ikubayeezya mbociyandika kubikkila maano kukusama kabotu alimwi akulibamba. Bamukwasyi wa Beteli bayoobotelwa kapati ikuti mwacita oobu.
Mbotuli babelesi Banakristo, tweelede kucenjela kumakani aambotuboneka kutegwa tutabikkili bamwi cilebyo. (2 Kor. 6:3, 4) Pele muciindi caboobo, kwiinda mukusama kabotu alimwi akulibamba, lyoonse ‘atulilemeke muziyanza zyoonse muluyiisyo lwa Leza Mufwutuli wesu.’—Tit. 2:10.