LAIBBULALI YAA INTANETI ya Watchower
Watchtower
LAIBBULALI YAA INTANETI
Chitonga
  • BBAIBBELE
  • ZYAKAMWAIGWA
  • MISWAANGANO
  • mwbr18 March map. 1-8
  • Malifalensi Aamu Kabbuku Kamuswaangano Wabuumi Amulimo Wesu

Kunyina vidiyo aawa mpomwasala.

Vidiyo yakaka kulila.

  • Malifalensi Aamu Kabbuku Kamuswaangano Wabuumi Amulimo Wesu
  • Malifalensi Aamu Kabbuku Kamuswaangano Wabuumi Amulimo Wesu (2018)
  • Tutwe Twamakani
  • MARCH 5-11
  • MARCH 12-18
  • MARCH 19-25
  • MARCH 26–APRIL 1
Malifalensi Aamu Kabbuku Kamuswaangano Wabuumi Amulimo Wesu (2018)
mwbr18 March map. 1-8

Malifalensi Aamu Kabbuku Kamuswaangano Wabuumi Amulimo Wesu

MARCH 5-11

MBONO IZILI MU JWI LYA LEZA | MATAYO 20-21

“Kufwumbwa Uuyanda Kuba Mupati Akati Kanu Weelede Kuba Mubelesi Wanu”

(Matayo 20:3) Naakaunka alimwi aciindi cawoola lyatatu, wakabona bamwi baliimvwi kumusika kabatakwe zyakucita;

nwtsty zifwanikiso azyakweebelela

Kumusika

Misika imwi, mbuli wooyo uutondezyedwe mu Kabbuku Kamuswaangano, wakali afwaafwi amugwagwa. Kanji-kanji basikusambala bakali kubikka zyakusambala zinji mumugwagwa cakuti kwakali kubula aakwiinda. Bantu ibakali kukkala munsi-munsi bakali kuula zintu zyamuŋanda mbuli zibiya alimwi azintu zyamagilazi zidula, kubikkilizya azintu zilimwa. Akaambo kakuti kwakanyina mafiliji, bantu bakeelede kuunka kumusika abuzuba kutegwa baule ziyandika. Basikuula bakali kukonzya kumvwa makani kuzwa kuli basikusambala naa bantu bamwi ibakali kuswaya, bana bakali kusobana alimwi bantu batakalembedwe mulimo bakali kulindila kunjizyigwa mulimo. Kumusika, Jesu wakali kuponya baciswa alimwi Paulo wakali kukambauka. (Mil. 17:17) Mukwiimpana, balembi alimwi aba Farisi bakali kuciyanda ciyanza cakubikkilwa maano alimwi akwaanzyigwa mumasena aaya aabuleya.

(Matayo 20:20, 21) Mpoonya banyina babana ba Zebedayo bakaboola kulinguwe antoomwe abana babo, bakamufwugamina akumulomba cimwi cintu. 21 Wakababuzya kuti: “Ino muyanda nzi?” Bakamuvwiila kuti: “Kolailila kuti bana bangu aaba bobilo bakakkale umwi kujanza lyako lyalulyo uumbi kujanza lyako lyalumwensyi mu Bwami bwako.”

nwtsty twaambo tugwasya mukwiiya kuzwa kulugwalo lwa Mt. 20:20, 21

banyina babana ba Zebedayo: Aaba bakali banyina babaapostolo, nkokuti Jakobo alimwi a Johane. Kweelana ambocaamba cibalo ca Marko, Jakobo alimwi a Johane mbebakaboola kuli Jesu. Mbembabo bakalomba, pele bakacita oobo kwiinda muli banyina, nkokuti ba Salome balo ibayeeyelwa kuti bakali banabokwabo abanyina Jesu.—Mt. 27:55, 56; Mk. 15:40, 41; Joh. 19:25.

umwi kujanza lyako lyalulyo uumbi kujanza lyako lyalumwensyi: Aawa zyuuno zyoonse zyobilo zyaamba bulemu alimwi anguzu, pele busena bwakululyo mbobujisi bulemu kwiinda.—Int. 110:1; Mil. 7:55, 56; Rom. 8:34.

(Matayo 20:25-28) Pele Jesu wakabaita akubaambila kuti: “Mulizyi kuti baleli bamasi balabadyaaminina bantu, alimwi abapati akati kabo balabeendelezya calunya. 26 Oobu tabusyi mboceelede kuba akati kanu pe; pele kufwumbwa uuyanda kuba mupati akati kanu weelede kuba mubelesi wanu, 27 alimwi kufwumbwa uuyanda kuba wakusaanguna akati kanu weelede kuba muzike wanu. 28 Mbubonya Mwanaamuntu mbwaakaboola, ikutali kuzoobelekelwa, pele kuzoobeleka akupa buumi bwakwe kuti bube cinunuzyo cakununuzya banji.”

nwtsty twaambo tugwasya mukwiiya kuzwa kulugwalo lwa Mt. 20:26, 28

mubelesi: Kanji-kanji Bbaibbele libelesya bbala lya Chigiriki lyakuti di·aʹko·nos ikwaamba muntu uucita milimo yaansi kapati kutegwa agwasye bamwi. Ibbala eeli lilabelesyegwa kupandulula Kristo (Rom. 15:8), bakambausi naa babelesi ba Kristo (1Kor. 3:5-7; Kol. 1:23), bakutausi (Flp. 1:1; 1Tim. 3:8), kubikkilizya ababelesi bamuŋanda (Joh. 2:5, 9) alimwi abalupati-pati bamfwulumende (Rom. 13:4).

ikutali kuzoobelekelwa, pele kuzoobeleka: Naa “ikutali kukutaukilwa, pele kukutauka.”

Kuyandaula Mbono Zyakumuuya

(Matayo 21:9) Kuyungizya waawo, makamu aabantu aakali kumbele lyakwe ayaayo aakali kumutobela akazumanana koongolola kuti: “Amumufwutule Mwana wa Davida! Ulilelekedwe ooyo uuboola muzina lya Jehova! Amumufwutule nywebo nomuli kujulu lyamajulu!”

nwtsty kaambo kagwasya mukwiiya kuzwa kulugwalo lwa Mt. 21:9

Amumufwutule: Mu Chigiriki lyaambwa kuti, “Hosanna.” Ibbala lya Chigiriki eeli lizwa kubbala lya Chihebrayo ilyaamba kuti “amumufwutule” naa “amumufwutule kaka.” Ibbala eeli lilabelesyegwa kukombelezya Leza kuti afwutule naa kuzunda; alimwi lilakonzya kwaamba kuti “akaka kofwutula.” Mukuya kwaciindi, lyakatalika kubelesyegwa mbuli mupailo alimwi akutembaula. Ibbala lya Chihebrayo eeli lilajanika kulugwalo lwa Int. 118:25, lyalo ilyakali cibeela ca Intembauzyo zya Hallel izyakali kwiimbwa ciindi ca Pobwe Lyakwiindilila. Aboobo, majwi aaya akali kuboola mumizeezo aciindi eeci. Nzila imwi Leza njaakaingula mupailo ooyu kutegwa afwutule mwana wa Davida, nkwiinda mukumubusya kuzwa kubafwu. Kulugwalo lwa Mt. 21:42, Jesu lwakwe kumugama wakazubulula lugwalo lwa Int. 118:22, 23 akwaamba kuti majwi aaya aamba Mesiya.

Mwana wa Davida: Mabala aaya atondezya zyalani lya Jesu alimwi amulimo ngwajisi kali Mesiya wakasyomezyegwa.

(Matayo 21:18, 19) Naakali kujokela kumunzi mafwumofwumo, wakafwa nzala. 19 Mpoonya wakabona mukuyu mumbali aanzila, eelyo wakaunka kulinguwo, pele kunyina mucelo ngwaakajana kunze lyamatuvwu, aboobo wakawaambila kuti: “Kutabi mucelo uuyoozyalwa kabili kulinduwe.” Aboobo mukuyu wakayuma ndilyonya.

jy 244 ¶4-6

Mukuyu Wabelesyegwa Kuyiisya Ciiyo Cijatikizya Lusyomo

Pele ino nkaambo nzi Jesu ncaakapa kuti mukuyu uyume? Watondezya kaambo ncaakacitila boobu mubwiinguzi bwakwe bwakuti: “Ncobeni ndimwaambila kuti, ikuti kamujisi lusyomo alimwi kamutadooneki, tamukaciti buyo ncondacita kumukuyu ooyu, pele nokuba kuti mwaambila cilundu eeci kuti, ‘Zyuka aawa uliwaale mulwizi,’ ciyoocitika. Alimwi zintu zyoonse nzyomulomba mumupailo kamujisi lusyomo, muyoozitambula.” (Matayo 21:21, 22) Aboobo wainduluka kaambo nkaakaambide musyule oomu kakuti lusyomo lulakonzya kulonzya cilundu.—Matayo 17:20.

Aboobo kwiinda mukupa kuti mukuyu uyume, Jesu wayiisya ciiyo cigwasya icitondezya mbociyandika kumusyoma Leza. Waamba kuti: “Zintu zyoonse nzyomupailila akulomba, amube alusyomo lwakuti mwapegwa kale, eelyo muyooba aanzizyo.” (Marko 11:24) Eelo kaka eeci nciiyo cipati kuli basikutobela Jesu boonse! Ciiyo eeci cilayandika kapati ikwaambisya kubaapostolo akaambo kakuti lino-lino balangilwa kusikilwa masunko mapati. Pele kuli abumbi mbokuswaangene kuyuma kwamukuyu alimwi ambolubede lusyomo.

Mbubonya mbuli mukuyu ooyu, cisi ca Israyeli ciboneka mbuli kuti cili kabotu, anu taaku. Bantu bamucisi eeci bali mucizuminano a Leza, alimwi kunze balibonya mbuli kuti batobela Mulawo wakwe. Pele, cisi coonse mbocizulwa catondezya kuti tacijisi lusyomo alimwi tacizyali micelo mibotu. Mane buya bamukaka a Mwana wa Leza! Aboobo, kwiinda mukupa kuti mukuyu ooyu uutazyali micelo uyume, Jesu watondezya iciyakucitikila cisi eeci citajisi lusyomo alimwi citazyali micelo.

Kubala Bbaibbele

(Matayo 20:1-19) “Nkaambo Bwami bwakujulu buli mbuli mwiniŋanda iwakaunka mafwumofwumo kuyoonjizya bantu mulimo wakubeleka mumuunda wakwe wamisaansa. 2 Naakazuminana ababelesi kuti abavwozye aumwi dinari lyomwe abuzuba, wakabatuma mumuunda wakwe wamisaansa. 3 Naakaunka alimwi aciindi cawoola lyatatu, wakabona bamwi baliimvwi kumusika kabatakwe zyakucita; 4 eelyo kuli baabo wakati, ‘Anywebo kamuya mumuunda wamisaansa, ndilamuvwozya kufwumbwa ceelede.’ 5 Aboobo bakaunka. Alimwi wakaunka aciindi cawoola lyacisambomwe, alimwi aawoola lyafwuka akucita mbubonya oobo. 6 Mpoonya kumamanino, wakaunka aciindi cawoola lya 11 akujana bamwi baile kwiimvwi, eelyo wakabaambila kuti, ‘Nkaambo nzi ncomwiimvwi aano buzuba boonse kamutabeleki?’ 7 Bakavwiila kuti, ‘Nkaambo kunyina watunjizya mulimo.’ Wakabaambila kuti, ‘Anywebo kamuya mumuunda wamisaansa mukabeleke.’ 8 “Nokwakaba kumangolezya, mwinimuunda wamisaansa wakaambila mubanzi wakwe kuti, ‘Kobaita babelesi ubavwozye mali aabo, utalikile kuli bamamanino, umanizye abakusaanguna.’ 9 Nobakasika baalumi ibakatalika aciindi cawoola lya 11, umwi aumwi wabo wakavwola dinari lyomwe. 10 Aboobo bakusaanguna nobakasika, bakayeeya kuti balapegwa mali manji, pele abalo bakavwozyegwa aumwi dinari lyomwe. 11 Nobakalitambula, bakatalika kumutongooka simalelo mukamwini ŋanda 12 akwaamba kuti, ‘Baalumi aaba bamamanino babeleka buyo woola lyomwe; pele wabavwozya kweelana andiswe notwabeleka canguzu buzuba boonse akubalwa zuba!’ 13 Pele wakaingula umwi wabo kuti, ‘Taaku ncindakulubizyila musa. Tee kayi twapangene kuti ulavwola dinari lyomwe? 14 Bweza dinari lyako weende. Ndiyanda kumupa awalo ooyu wamamanino mbubonya mbondapa nduwe. 15 Sena tandijisi nguzu zyakucita kufwumbwa ncendiyanda azintu zyangu? Sena wafwa munyono akaambo kakuti ndili mubotu?’ 16 Munzila eeyi, bakumamanino bayooba bakusaanguna, bakusaanguna bayooba bakumamanino.” 17 Lino naakali kuya ku Jerusalemu, Jesu wakatola basikwiiya bakwe bali 12 kumbali eelyo kabali munzila wakabaambila kuti: 18 “Amubone! Tuunka ku Jerusalemu, eelyo Mwanaamuntu uyakwaabwa kuli basilutwe babapaizi abalembi. Bayoomupa mulandu wakuti ajaigwe 19 akumwaaba kubantu bamasi kuti bakamusampaule akumukwibbaula akumujaya aacisamu; mpoonya mubuzuba bwatatu uyoobusyigwa.”

MARCH 12-18

MBONO IZILI MU JWI LYA LEZA | MATAYO 22-23

“Amwiitobele Milawo Yobilo Mipati Kapati”

(Matayo 22:36-38) “Omwiiyi, ino nguuli mulawo mupati mu Mulawo?” 37 Wakamwaambila kuti: “‘Weelede kuyanda Jehova Leza wako amoyo wako woonse, abuumi bwako boonse alimwi amizeezo yako yoonse.’ 38 Ooyu ngomulawo mupati alimwi ngonguwe wakusaanguna.

nwtsty kaambo kagwasya mukwiiya kuzwa kulugwalo lwa Mt. 22:37

moyo: Ciindi nolibelesyegwa munzila yamaambilambali, ibbala eeli lyaamba buntu bwamukati. Nokuba boobo, ciindi bbala eeli nolyaambwa antoomwe amabala aakuti “buumi” alimwi “amizeezo,” bupanduluzi bwandilyo inga buligaminide alimwi kanji-kanji inga bwaamba mbwalimvwa muntu, mbwayeeya alimwi anzyalombozya. Mabala otatwe aabelesyedwe aawa, nkokuti (moyo, buumi alimwi amizeezo) alakonzya kwaamba cintu comwe; alakonzya kubelesyegwa munzila zikozyenye, ikukankaizya ncociyandika kuyanda Leza cakumanina.

buumi: Naa “moyo woonse.”

mizeezo: Nkokwaamba kuti, mizeezo yoonse. Muntu weelede kubelesya mizeezo yakwe yoonse kutegwa amuzyibe Leza akuzumanana kumuyanda. (Joh. 17:3, bupanduluzi buyungizyidwe; Rom. 12:1) Lugwalo oolu iluzubulwidwe kuzwa ku Dt. 6:5, malembe aakusaanguna aa Chihebrayo abelesya mabala otatwe aakuti, ‘moyo, buumi alimwi anguzu.’ Nokuba boobo, kweelana amakani ngaakalemba Matayo mbwaatondezyedwe mu Chigiriki, ibbala lyakuti “mizeezo” lilabelesyegwa muciindi cabbala lyakuti “nguzu.” Kweelede kuti kuli twaambo tunji ncokubelesyedwe mabala aaya aindene-indene. Cakusaanguna, nokuba kuti mwaambo wa Chihebrayo cansiku tiiwakajisi bbala lini lyakuti “mizeezo,” muzeezo ooyu kanji-kanji wakali kubikkilizyigwa mubbala lya Chihebrayo lyakuti “moyo.” Ciindi bbala eeli nolibelesyegwa munzila yamaambilambali lyaamba buntu bwamukati boonse, kubikkilizya amuntu mbwayeeya, mbwalimvwa, mbwazilanga zintu alimwi amakanze ngajisi. (Dt. 29:4; Int. 26:2; 64:6; amubone kaambo kagwasya mukwiiya kakuti moyo mukapango aaka.) Nkakaambo kaako, malembe aa Chihebrayo naabelesya bbala lyakuti “moyo,” Bbaibbele lya Septuagint mu Chigiriki kanji-kanji libelesya bbala likozyenye abbala lyakuti “mizeezo.” (Matl. 8:21; 17:17; Tus. 2:10; Is. 14:13) Kaambo akamwi ikakapa kuti Matayo abelesye bbala lya Chigiriki lyakuti “mizeezo” muciindi cakubelesya bbala lyakuti “nguzu” ciindi naakazubulula majwi aalembedwe ku Dt. 6:5 nkakuti, ibbala lya Chihebrayo lyakuti nguzu lilakonzya kubikkilizya anguzu zyamubili alimwi amumizeezo. Kufwumbwa naa cili buti, mizeezo mboiswaangene akati kamabala aa Chihebrayo alimwi aa Chigiriki alakonzya kugwasya kupandulula ikaambo ciindi nobakali kuzubulula majwi aali kubbuku lya Deuteronomo, balembi ba Makani Mabotu ncobatakabelesya mabala aakozyenye.

(Matayo 22:39) Alimwi ngooyu wabili uuli mbuli yooyu: ‘Weelede kuyanda simukobonyoko mbubonya mbuli mboliyanda omwini.’

nwtsty kaambo kagwasya mukwiiya kuzwa kulugwalo lwa Mt. 22:39

Wabili: Kulugwalo lwa Mt. 22:37, bwiinguzi bwacigaminina bwa Jesu kuba Farisi bulilembedwe, pele Jesu tanaagolela buyo akwiingula mubuzyo ngobasaanguna kubuzya pele wazubulula amulawo wabili (Lev. 19:18), ikutondezya kuti milawo yobilo taikonzyi kwaandanizyigwa alimwi akuti Mulawo woonse alimwi a Basinsimi mpoziyeeme.—Mt. 22:40.

simukobonyoko: Ibbala lya Chigiriki ilyakasandululwa kuti “simukobonyoko” (lyaamba muntu uuli afwaafwi) alimwi talyaambi buyo bantu ibakkala afwaafwi. Lilakonzya kwaamba amuntu uuli woonse ngomumvwana limwi.—Lk. 10:29-37; Rom. 13:8-10.

(Matayo 22:40) Amilawo eeyi yobilo mpaayeeme Mulawo woonse a Basinsimi.”

nwtsty kaambo kagwasya mukwiiya kuzwa kulugwalo lwa Mt. 22:40

Mulawo . . . Basinsimi: “Mulawo” caamba makani aalembedwe mumabbuku aamu Bbaibbele, kuzwa ku Matalikilo kusikila ku Deuteronomo. “Basinsimi” caamba mabbuku aabusinsimi aali mu Magwalo aa Chihebrayo. Nokuba boobo, ciindi mabala aaya naambwa antoomwe, alakonzya kumvwika mbuli kuti abikkilizya Magwalo woonse aa Chihebrayo.—Mt. 7:12; 22:40; Lk. 16:16.

mpaayeeme: Ibbala lya Chigiriki ilipandulula kuti “kujatilila” aawa libelesyedwe munzila yacikozyanyo ikwaamba “kuyaama.” Aboobo Jesu wakatondezya kuti tauli buyo Mulawo uujisi Milawo Iili Kkumi uutondezya luyando Jehova ndwajisi kubantu alimwi ambwayanda kuti bantu kabeendelezyanya caluyando, pele a Magwalo oonse aa Chihebrayo.—Rom. 13:9.

Kuyandaula Mbono Zyakumuuya

(Matayo 22:21) Bakati: “Nzizya Kaisara.” Mpoonya wakabaambila kuti: “Aboobo amupe Kaisara zintu zya Kaisara, pele zintu zya Leza amupe Leza.”

nwtsty kaambo kagwasya mukwiiya kuzwa kulugwalo lwa Mt. 22:21

amupe Kaisara zintu zya Kaisara: Bwiinguzi bwa Jesu oobu, ibujanika amulugwalo lwa Mk. 12:17 a Lk. 20:25, mpampawo alikke Jesu mpaakaamba kujatikizya Mweendelezi muna Roma. “Zintu zya Kaisara” zibikkilizya kubbadelela milimo iicitwa amfwulumende, kubikkilizya akubalemeka alimwi akulibombya kwalo kweelede kutondezyegwa kubeendelezi aaba.—Rom. 13:1-7.

zintu zya Leza amupe Leza: Eeci cibikkilizya kukomba nkwacita muntu camoyo woonse, luyando luzwa ansi aamoyo, kusyomeka alimwi akumvwida cakumaninina.—Mt. 4:10; 22:37, 38; Mil. 5:29; Rom. 14:8.

(Matayo 23:24) Nobasololi boofwu, nomuminununa kansenya pele nkamela mulaimena!

nwtsty kaambo kagwasya mukwiiya kuzwa kulugwalo lwa Mt. 23:24

nomuminununa kansenya pele nkamela mulaimena: Kansenya kakali kamwi kazilenge zisyoonto kapati mpoonya nkamela zyakali akati kazilenge zipati kapati zyalo izyakazyibidwe abana Israyeli kuti zilisofweede. (Lev. 11:4, 21-24) Jesu wakabelesya maambilambali alimwi akukozyanisya, ikwaamba kuti basololi bazikombelo bakali kuminununa zyakunywa zyabo kutegwa batasofwaazigwi akansenya, kakuli bakali kuubya-ubya makani aayandika kapati aa Mulawo, calo icakakozyanisyigwa kukumena nkamela.

Kubala Bbaibbele

(Matayo 22:1-22) Alimwi Jesu wakabaambila kwiinda muzikozyanyo, wakati: 2 “Bwami bwakujulu inga bwakozyanisyigwa amwami iwakabamba pobwe lyabwiinga lyamwanaakwe musankwa. 3 Mpoonya wakatuma bazike bakwe kuyakwiita baabo bakatambidwe kupobwe lyabwiinga, pele tiibakali kuyanda kuboola. 4 Alimwi wakatuma bazike abambi akubaambila kuti, ‘Amubaambile aabo batambidwe kuti: “Amubone! Ndabamba cakulya camasyikati, kwajaigwa ŋombe abanyama bangu baneneede, alimwi zintu zyoonse zyabambwa kale. Amuboole kupobwe lyabwiinga.”’ 5 Pele kakunyina kubikkila maano bakaunka kumbi, umwi kumuunda wakwe, umwi kumakwebo aakwe; 6 aabo bakacaala, bakajata bazike bakwe akubasampaula kumane bakabajaya. 7 “Mwami wakakalala akutuma basikalumamba bakwe, eelyo bakabanyonyoona bajayi aabo akuumpa munzi wabo. 8 Mpoonya wakaambila bazike bakwe kuti, ‘Pobwe lyabwiinga lyabambwa, pele aabo batambidwe tiibali kweelela pe. 9 Aboobo kamuya kunzila zizwa mumunzi, mutambe kufwumbwa ngomuyoojana kuti aboole kupobwe lyabwiinga.’ 10 Aboobo bazike aabo bakaunka mumigwagwa akubabunganya antoomwe boonse aabo mbobakajana, babi ababotu; eelyo ŋanda yabwiinga yakazula bantu aabo ibakali kulya. 11 “Ciindi mwami naakanjila kuti alingule beenzu, wakabona muntu umwi watakasamide cisani cabwiinga. 12 Aboobo wakamubuzya kuti, ‘Ino musa wanjila buti omuno kotasamide cisani cabwiinga?’ Eelyo wakabula cakwaamba. 13 Lino mwami wakaambila babelesi bakwe kuti, ‘Amumwaange kumaanza akumaulu mumusowele anze mumudima. Ooko nkwayoolilila akulumina ntwino.’ 14 “Mwami wakaita banji pele wakasala buyo basyoonto.” 15 Mpoonya ba Farisi bakaunka akumvwana kutegwa bamujanine kaambo kumajwi aakwe. 16 Aboobo bakamutumina basikwiiya babo, antoomwe acipani cabasikutobela Heroda, kabati: “Omwiiyi, tulizyi kuti lyoonse waamba masimpe alimwi uyiisya nzila ya Leza mukasimpe, alimwi tolibotyi-botyi kumuntu uuli woonse, nkaambo tolangi ziimo zyabantu. 17 Aboobo kotwaambila, ino uyeeya buti? Sena cilizumizyidwe kutela mutelo kuli Kaisara naa pe?” 18 Pele mbokunga Jesu wakalizyi mbobakali babi myoyo, wakababuzya kuti: “Ino mundisunkila nzi, nywebo nobasikuupaupa ameso? 19 Amunditondezye kkobili litelwa.” Eelyo bakamuletela dinari. 20 Wakababuzya kuti: “Ino cikozyanyo eeci alimwi azina eeli nzizyani?” 21 Bakati: “Nzizya Kaisara.” Mpoonya wakabaambila kuti: “Aboobo amupe Kaisara zintu zya Kaisara, pele zintu zya Leza amupe Leza.” 22 Nobakamvwa boobu bakagambwa, mpoonya bakamusiya akuunka.

MARCH 19-25

MBONO IZILI MU JWI LYA LEZA | MATAYO 24

“Amuzumanane Kupakamana Kumuuya Mumazuba Aaya Aamamanino”

(Matayo 24:12) alimwi akaambo kakuvwula kwabubi, luyando lwabantu banji luyoomana.

it-2 279 ¶6

Luyando

Luyando Lwaumwi Lulakonzya Kumana. Jesu Kristo, naakali kwaambila basikwiiya bakwe zintu izyakumbele, wakatondezya kuti luyando (a·gaʹpe) lwabantu banji ibalyaamba kuti balasyoma muli Leza lwakali kuyoomana. (Mt. 24:3, 12) Mwaapostolo Paulo wakaamba kuti, citondezyo cimwi caziindi zikatazya izyakali kuboola kumbele ncakuti, bantu bakali kuyooba ‘basimuyanda mali.’ (2Tim. 3:1, 2) Aboobo, tacidoonekwi kuti muntu ulakonzya kutalika kuyanda zintu zitaluzi alimwi akuti luyando ndwaakajisi kusaanguna inga lwamana. Eeci citondezya mbociyandika kapati kuzumanana kuyumya luyando ndotujisi kuli Leza kwiinda mukuzinzibala kuyeeya ncolyaamba Jwi lyakwe alimwi akupona kweelana anjiisyo zyakwe.—Ef. 4:15, 22-24.

(Matayo 24:39) pele tiibakabikkila maano kusikila mane Zambangulwe lyakaboola akubatola boonse, mbubonya buyo akwalo kubako kwa Mwanaamuntu mbokuyooba.

w99 11/15 19 ¶5

Sena Mulacizuzikizya Ceelelo Canu Coonse Kuli Leza

Kujatikizya ciindi cesu camapenzi, Jesu Kristo wakati: “Nkabela kuboola kwa-Mwana a-Muntu kuyooba mbuli kumazuba aa-Nowa. Nkaambo kumazuba ayo maanzi naatakalina kupaya bakali kulya akunywa, bakali kukwata akukwatizigwa, kusikila kubuzuba obo mbwaakanjila mubwaato Nowa, nkabela teebakezi mane kupaya kwamaanzi kwakasika akubatola. Mbubonya obo mbukuzooba kuboola kwa-Mwana a-Muntu.” (Matayo 24: 37-39) Ikulya akunywa nokucitwa munzila yeelede takulubide pe, alimwi lukwato mbubambe bwakatalisigwaa Leza mwini. (Matalikilo 2:20-24) Pele ikuti twabona kuti twatalika kubikkila kapati maanu kubukkale bwakuyandisya kujana zintu zyakumubili, sena eco tatweelede kucipailila? Jehova ulakonzya kutugwasya kubikka zintu zya Bwami mubusena bwakusaanguna, ikucita zintu ziluzi alimwi akuzuzikizya ceelelo cesu kulinguwe.—Matayo 6:33; Ba-Roma 12:12; 2 Ba-Korinto 13:7.

(Matayo 24:44) Aboobo, andinywe amulibambile, nkaambo Mwanaamuntu ulaboola aciindi ncomutayeeyeli.

jy 259 ¶5

Baapostolo Bakalomba Kupegwa Citondezyo

Waamba kuti basikwiiya bakwe bayooyandika kupakamana, kulangila alimwi akulibambila. Jesu wakankaizya makani aaya aakucenjezya kwiinda mukupa cikozyanyo acimwi, ulaamba: “Kamuzyiba kuti: Ikuti mwiniŋanda naakalizyi ciindi mubbi ncaakali kuboola, naatakoona akumulekela mubbi kuti anjile muŋanda yakwe. Aboobo, andinywe amulibambile, nkaambo Mwanaamuntu ulaboola aciindi ncomutayeeyeli.”—Matayo 24:43, 44.

Kuyandaula Mbono Zyakumuuya

(Matayo 24:8) Zintu zyoonse eezyi ngamatalikilo aamapenzi aali mbuli kumyongwa kwamukaintu uuyanda kutumbuka.

nwtsty kaambo kagwasya mukwiiya kuzwa kulugwalo lwa Mt. 24:8

mapenzi aali mbuli kumyongwa kwamukaintu uuyanda kutumbuka: Ibbala lya Chigiriki lipandulula kucisa kapati nkwamvwa muntu ciindi natumbuka. Nokuba kuti aawa libelesyedwe kupandulula mapenzi, kucisa, alimwi akupenga koonse, lilakonzya kupandulula kuti, mbubwenya mbuli kumyongwa kwamukaintu uuyanda kutumbuka, mapenzi alimwi akupenga ikwakasinsimwa kuyoovwula alimwi akwiindila buya kwaciindi cili mbocibede kaatanatalika mapenzi mapati aambidwe kuli Mt. 24:21.

(Matayo 24:20) Kamuujisi kupaila kutegwa mutakatiji ciindi camupeyo naa mubuzuba bwa Sabata;

nwtsty kaambo kagwasya mukwiiya kuzwa kulugwalo lwa Mt. 24:20

ciindi camupeyo: Mvwula mpati, kupaya kwamaanzi, alimwi akutontola zyakali kunoopa kuti kacikatazya kweenda, kujana cakulya alimwi abusena bwakukkala.—Ezr. 10:9, 13.

mubuzuba bwa Sabata: Muzilawo mbuli Judaya, zintu izyakali kukasyigwa mumulawo wa Sabata zyakali kupa buyumuyumu kumuntu kweenda musinzo mulamfwu alimwi akunyamuna zibbudu; kuyungizya waawo, milyango yamunzi yakalijalidwe ciindi coonse mubuzuba bwa Sabata.—Amubone Mil. 1:12 alimwi a Makani Aayungizyidwe B12.

Kubala Bbaibbele

(Matayo 24:1-22) Lino Jesu naakali kuzwa kutempele, basikwiiya bakwe bakamusikila kuti bamutondezye mayake aatempele. 2 Mukubaingula wakati: “Sena tamuzibwene zintu zyoonse eezyi? Ncobeni ndimwaambila kuti, taakwe bbwe liyoocaala aano atala aabbwenyina kakunyina kukolomonwa.” 3 Kakkede aa Cilundu ca Maolifa, basikwiiya bakamusikila kumbali akumubuzya kuti: “Kotwaambila, ino ndilili zintu eezyi noziyooba alimwi ncinzi ciyooba citondezyo cakubako kwako acamamanino aabweende bwazintu?” 4 Eelyo mukwiingula Jesu wakabaambila kuti: “Amulangisye kuti kutabi muntu uumweena, 5 nkaambo banji bayooboola muzina lyangu, kabati, ‘Ndime Kristo,’ eelyo bayakweena bantu banji. 6 Muyoomvwa nkondo mumasena aalaafwaafwi alimwi amasena aali kule. Nywebo mutakayoowi pe, nkaambo zintu eezyi zyeelede kucitika, pele mamanino taanasika. 7 “Nkaambo cisi ciyoobukila cisinyina abwami buyoobukila bwaminyina, alimwi kuyooba nzala amizuzumo yanyika mumasena aaindene-indene. 8 Zintu zyoonse eezyi ngamatalikilo aamapenzi aali mbuli kumyongwa kwamukaintu uuyanda kutumbuka. 9 “Mpoonya bantu bayoomupenzya akumujaya, alimwi muyoosulwa amasi oonse akaambo kazina lyangu. 10 Kunze lyaboobo, ibanji bayoolebwa akwaaba umwi amweenzinyina alimwi bayoosulana. 11 Basinsimi bakubeja banji bayoobuka akweena bantu banji; 12 alimwi akaambo kakuvwula kwabubi, luyando lwabantu banji luyoomana. 13 Pele ooyo uuliyumya kusikila kumamanino uyoofwutulwa. 14 Alimwi makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika. 15 “Aboobo, mwaakubona cintu cisesemya cileta lunyonyooko ncaakaamba musinsimi Daniele kaciimvwi mubusena busalala (ooyo uubala abelesye maano), 16 mpoonya aabo bali mu Judaya bakatalike kutijila kumalundu. 17 Muntu uuli aciluli caŋanda atakaseluki kuti agusye zintu zili muŋanda yakwe, 18 awalo muntu uuli mumuunda atakapiluki kuyoobweza cisani cakwe caatala. 19 Maawe kuli bamakaintu bamitide abaabo banyonsya bana kumazuba aayo! 20 Kamuujisi kupaila kutegwa mutakatiji ciindi camupeyo naa mubuzuba bwa Sabata; 21 nkaambo kuciindi eeco kuyooba mapenzi mapati aatanacitikide kuzwa kumatalikilo aanyika kusikila sunu, alimwi kunyina naayooba limbi pe. 22 Mubwini, kuti mazuba aayo atakafwiinsyigwi, kunyina muntu uuyookonzya kufwutuka; pele akaambo kabasale imazuba aayo ayoofwiinsyigwa.

MARCH 26–APRIL 1

MBONO IZILI MU JWI LYA LEZA | MATAYO 25

“Amulangile”

(Matayo 25:1-6) “Alimwi Bwami bwakujulu inga bwakozyanisyigwa abanakalindu bali kkumi ibakabweza malambe aabo akuyoocinga sibwiinga. 2 Bosanwe akati kabo bakali bafwubafwuba, mpoonya bambi aaba bosanwe bakalicenjede. 3 Nkaambo bafwubafwuba bakabweza malambe aabo pele tiibakabweza mafwuta aambi ambali, 4 pele balo bacenjede bakabweza mafwuta aambi munsazi zyabo amalambe aabo. 5 Lino sibwiinga wakamuka, aboobo boonse bakatalika kufwukula mpoonya bakoona. 6 Akati kamasiku eeni, kwakamvwugwa loongololo lwakuti: ‘Wasika sibwiinga! Kamuya mukamucinge.’

(Matayo 25:7-10) Mpoonya boonse banakalindu aabo bakabuka akwaabamba kabotu malambe aabo. 8 Eelyo bafwubafwuba bakaambila bacenjede kuti, ‘Amutwaabile mafwuta, nkaambo malambe eesu ayanda kuzima.’ 9 Lino bacenjede bakaingula kuti: ‘Ambweni kuti tumupe taakootuzulila toonse. Pele kamuya kuli baabo basambala mukalyuulile aanu.’ 10 Nobakacili kweenda kuti bakaule, sibwiinga wakasika. Banakalindu ibakalibambilide bakanjila anguwe muŋanda yapobwe lyabwiinga, mpoonya mulyango wakajalwa.

(Matayo 25:11, 12) Kumane banakalindu bamwi aabo abalo bakaboola, bakati, ‘Sibwiinga, Sibwiinga, kotujalwida!’ 12 Mukwiingula wakati, ‘Kumwaambila masimpe, mebo tandimuzyi pe.’

Kuyandaula Mbono Zyakumuuya

(Matayo 25:31-33) “Mwanaamuntu aakuboola mubulemu bwakwe, antoomwe abangelo boonse, uyookkala acuuno cakwe cabwami cabulemu. 32 Masi oonse ayoobunganizyigwa kumbele lyakwe, mpoonya uyoobaandaanya bantu mbubonya mweembezi mbwaandaanya mbelele ampongo. 33 Uyoobikka mbelele kujanza lyakwe lyalulyo, pele mpongo uyoozibikka kujanza lyakwe lyalumwensyi.

w15 3/15 27 ¶7

Kugwasya Cakusyomeka Banabokwabo Kristo

Mazuba aano, tulijisi bupanduluzi bulimvwisya kapati kujatikizya cikozyanyo cambelele ampongo. Kujatikizya kuzyiba baabo baambidwe, Jesu ngo “Mwanaamuntu,” Mwami. Aabo ibaitwa kuti “bakwesu” mbaalumi abamakaintu bananike, ibayoolela a Kristo kujulu. (Rom. 8:16, 17) “Mbelele” alimwi “ampongo,” ziiminina bantu ibazwa muzisi zyoonse. Aaba tabananikidwe amuuya uusalala pe. Mbuti kujatikizya ciindi lubeta noluyoocitika? Lubeta oolu luyoocitika aakulondelela mamanino aamapenzi mapati aalangilwa kumbele lino-lino. Mbuti kujatikizya kaambo bantu ncobayoobetekelwa kuba mbelele naa mpongo? Kuyooba kweelana ambobababona banabokwabo Kristo bananike ibacisyeede anyika. Mbwaanga mamanino aabweende bwazintu oobu aswena afwaafwi, tulikkomene kaka kubona kuti Jehova wazumanana buce-buce kutumunikila kujatikizya cikozyanyo eeci alimwi azikozyanyo zimwi zikozyenyi aceeci izili mucaandaano 24 alimwi a 25 mubbuku lya Matayo!

(Matayo 25:40) Mukwiingula Mwami uyoobaambila kuti, ‘Ncobeni ndimwaambila kuti, akaambo kakuti mwakacita oobo kuli umwi wabaniini akati kabakwesu aaba, nkokuti mwakacitila ndime.’

w09 10/15 16 ¶16-18

“Munooli Beenzuma”

Ikuti kamuli alusyomo lwakupona anyika mubwendelezi bwa Bwami bwa Leza, ino mbuti mbomubayanda ibanyina Kristo? Atulange nzila zyotatwe buyo. Kusaanguna, nkwiinda mukutola lubazu camoyo woonse mumulimo wakukambauka. Kristo wakaambila ibanyina kuti bakambauke makani mabotu munyika yoonse. (Mt. 24:14) Nokuba boobo, ibanyina Kristo ibacili anyika mazuba aano tabakonzyi kuumanizya mulimo ooyu kakunyina kugwasyigwa abeenzinyina ibambelele zimwi. Masimpe, iciindi ibambelele zimwi nobatola lubazu mumulimo wakukambauka, bagwasya ibanyina Kristo kumanizya mulimo ooyu uusetekene. Kristo abamuzike musyomesi uucenjede balakkomana kapati amulimo ooyu ngobacita balongwe babo.

Nzila yabili njobabelesya ibambelele zimwi kugwasya ibanyina Kristo mumulimo wakukambauka njakusanga. Jesu wakakulwaizya basikumutobela kuti kababelesya “lubono lwamunyika” kutegwa balijanine beenzinyina. (Luka 16:9, BT) Eeci tacaambi kuti cilongwe ncotujisi a Jesu naa a Jehova ciyandika kuulwa buya. Muciindi caboobo, notubelesya lubono lwesu mumulimo wa Bwami, tutondezya kuti tulabayanda alimwi tatuciti buyo oobo kwiinda mukwaambaula, pele tulacita oobo kwiinda ‘mumilimo amulusinizyo.’ (1 Joh. 3:16-18) Tulapa lubono lwesu ciindi notubelesya zyintu zyesu notukambauka, notusanga mali kumulimo wakuyaka awakubambulula maanda aakuswaanganina alimwi amali ngotusanga aabelesyegwa mumulimo wakukambauka uucitwa nyika yoonse. Kufwumbwa naa mali ngotusanga masyoonto naa manji, Jehova a Jesu balakkomana kapati akaambo kakusanga nkotucita cakuliyandila.—2 Kor. 9:7.

Nzila yatatu toonse njotutondezya kuti tuli balongwe ba Kristo nkwiinda mukutobela malailile aapegwa abaalu mumbungano. Kwiinda muli Kristo, ibaalumi aaba bakasalwa amuuya uusalala. (Ef. 5:23) Mwaapostolo Paulo wakalemba kuti: “Kamubaswiililisya baalu banu, mulitesye kulimbabo.” (Heb. 13:17) Zimwi ziindi, cilatukatazya kutobela malailile aamu Bbaibbele ngobatupa baalu mumbungano yesu. Tulakonzya kuti katuzizyi zyintu nzyebalezya, alimwi eeci cilakonzya kutupa kuti katutalutobeli lulayo ndobatupa. Nokuba boobo, Kristo uuli ngo Mutwe wambungano, ulikkomene kubabelesya baalumi aaba ibatalondokede. Aboobo, mbotucita nobatweendelezya cilakonzya kutondezya mbotumuyanda Kristo. Notutabikkili maano kukulubizya kwabaalu anotutobela malailile ngobatupa, tutondezya kuti tulamuyanda Kristo.

Kubala Bbaibbele

(Matayo 25:1-23) “Alimwi Bwami bwakujulu inga bwakozyanisyigwa abanakalindu bali kkumi ibakabweza malambe aabo akuyoocinga sibwiinga. 2 Bosanwe akati kabo bakali bafwubafwuba, mpoonya bambi aaba bosanwe bakalicenjede. 3 Nkaambo bafwubafwuba bakabweza malambe aabo pele tiibakabweza mafwuta aambi ambali, 4 pele balo bacenjede bakabweza mafwuta aambi munsazi zyabo amalambe aabo. 5 Lino sibwiinga wakamuka, aboobo boonse bakatalika kufwukula mpoonya bakoona. 6 Akati kamasiku eeni, kwakamvwugwa loongololo lwakuti: ‘Wasika sibwiinga! Kamuya mukamucinge.’ 7 Mpoonya boonse banakalindu aabo bakabuka akwaabamba kabotu malambe aabo. 8 Eelyo bafwubafwuba bakaambila bacenjede kuti, ‘Amutwaabile mafwuta, nkaambo malambe eesu ayanda kuzima.’ 9 Lino bacenjede bakaingula kuti: ‘Ambweni kuti tumupe taakootuzulila toonse. Pele kamuya kuli baabo basambala mukalyuulile aanu.’ 10 Nobakacili kweenda kuti bakaule, sibwiinga wakasika. Banakalindu ibakalibambilide bakanjila anguwe muŋanda yapobwe lyabwiinga, mpoonya mulyango wakajalwa. 11 Kumane banakalindu bamwi aabo abalo bakaboola, bakati, ‘Sibwiinga, Sibwiinga, kotujalwida!’ 12 Mukwiingula wakati, ‘Kumwaambila masimpe, mebo tandimuzyi pe.’ 13 “Aboobo amulangile, nkaambo tamuzyi buzuba nociba ciindi. 14 “Alimwi Bwami bwakujulu buli mbuli muntu iwakayanda kuunka kucisi cimbi, wakaita bazike bakwe akubapa lubono lwakwe. 15 Wakusaanguna wakamupa matalenta aali musanu, wabili wakamupa obilo, watatu wakamupa lyomwe, umwi aumwi wakapegwa kweelana anguzu zyakwe, aboobo wakaunka kucisi cimbi. 16 Ndilyonya ooyo wakatambula matalenta aali musanu wakaunka waakwaabelesya mumakwebo akujana aambi aali musanu. 17 Mbubonya buyo awalo ooyo wakatambula obilo wakajana aambi obilo. 18 Pele muzike ooyo wakatambula lyomwe buyo wakaunka waakusya ansi akusisa mali aasimalelaakwe. 19 “Lino nokwakainda ciindi cilamfwu simalelaabo bazike aabo wakaboola akubalingula. 20 Aboobo ooyo wakatambula matalenta aali musanu wakaboola akuleta aambi matalenta aali musanu akwaamba kuti, ‘Simalelaangu, wakandipa matalenta aali musanu; bona, ndakajana aambi aali musanu.’ 21 Simalelaakwe wakati kulinguwe: ‘Wacita kabotu, omuzike mubotu alimwi uusyomeka! Wakasyomeka muzintu zisyoonto. Ndiyookusala kuti kolanganya zintu zinji. Konjila ukondwe antoomwe asimalelaako.’ 22 Kuzwa waawo ooyo wakatambula matalenta obilo wakaboola akwaamba kuti, ‘Simalelaangu, wakandipa matalenta obilo; bona ndakajana aambi matalenta obilo.’ 23 Simalelaakwe wakati kulinguwe: ‘Wacita kabotu, omuzike mubotu alimwi uusyomeka! Wakasyomeka muzintu zisyoonto. Ndiyookusala kuti kolanganya zintu zinji. Konjila ukondwe antoomwe asimalelaako.’

    Chitonga Publications (1991-2024)
    Log Out
    Log In
    • Chitonga
    • Amutumine Bamwi
    • Makani Ngomuyanda
    • Copyright © 2025 Watch Tower Bible and Tract Society of Pennsylvania
    • Nzyomweelede Kuzumina
    • Mulawo Uujatikizya Kubamba Maseseke
    • Privacy Settings
    • JW.ORG
    • Log In
    Amutumine Bamwi