KUPONA BUUMI BWA BUNAKRISTO

Kukambauka Alimwi Akuyiisya—Kulayandika Kutegwa Tuyiisye Bantu Kuba Basikwiiya

Jesu wakalailila basikumutobela kuunka kuyooyiisya bantu kuba basikwiiya. (Mt. 28:19) Eeci cibikkilizya kukambauka alimwi akuyiisya. Ciindi aciindi, tweelede kulibuzya kuti, ‘Mbuti mbondikonzya kuyaambele mumbazu eezyi ziyandika kapati zyamulimo wakuyiisya bantu kuba basikwiiya?’

KUKAMBAUKA

Muciindi cakulindila bantu kuti baboole kulindiswe, swebo tweelede kubayandaula cabusungu aabo ‘beelela.’ (Mt. 10:11) Ciindi notutola lubazu mumulimo wakukambauka, sena tulabikkila maano kubandika abaabo ‘ibajanika’? (Mil. 17:17) Lidiya wakaba sikwiiya akaambo kamwaapostolo Paulo walo iwakali musungu mumulimo wakukambauka.—Mil. 16:13-15.

Ba Samuel baabila ba Ezekiel magazini; Ba Solomon aba Mary bakambaukila ba Ezekiel aba Abigail — “Kosyanga mbuto zyako cifwumofwumo alimwi utalekeli maanza aako kulyookezya kusikila mane kumangolezya” (Muk. 11:6)

AMWEEBELELE KAVIDIYO KAKUTI AMUZUMANANE KUKAMBAUKA “CAKUTALEKA”—MUKWIIZYA ALIMWI AKUŊANDA AŊANDA, MPOONYA MWIINGULE MIBUZYO IITOBELA:

Mumilimo yabo yabuzuba abuzuba, ino ba Samuel bakatondezya buti kuti bakali basungu mukusyanga mbuto zyakasimpe?
Nkaambo nzi ncotweelede kuzumanana kutola lubazu mumbazu zyoonse zyabukambausi?
Ino mbaani mbomukonzya kwaambila mulumbe wa Bwami ciindi nomucita milimo yanu yabuzuba abuzuba?

KUYIISYA

Kutegwa tuyiisye bantu kuba basikwiiya, tatweelede buyo kubasiila mabbuku bantu. Kutegwa tubagwasye kuyaambele kumuuya, tweelede kucita nyendo zyakupilukila alimwi akusololela ziiyo zya Bbaibbele. (1Kor. 3:6-9) Pele ino mbuti kuti muntu ngotusolekesya kuyiisya kasimpe ka Bwami talibonyi kuyaambele kumuuya? (Mt. 13:19-22) Tweelede kuzumanana kuyandaula baabo ibajisi myoyo iili mbuli ‘bulongo bubotu.’—Mt. 13:23; Mil. 13:48.

Ba Solomon aba Mary basololela ciiyo ca Bbaibbele kuli ba Ezekiel alimwi aba Abigail; Ba Ezekiel aba Abigail batola lubazu mubukambausi bwakubuleya — “Mebo ndakasyanga, Apolo wakatilila, pele Leza nguwakali kukomezya” (1Kor. 3:6)

AMWEEBELELE KAVIDIYO KAKUTI AMUZUMANANE KUKAMBAUKA “CAKUTALEKA”—KUBULEYA ALIMWI AKUGWASYA BANTU KUBA BASIKWIIYA, MPOONYA MWIINGULE MIBUZYO IITOBELA:

Ino ba Solomon alimwi aba Mary bakazitilila buti mbuto zyakasimpe mumyoyo yaba Ezekiel alimwi aba Abigail?
Ino tweelede kuba ambaakani nzi notutola lubazu mumbazu zyoonse zyabukambausi, kubikkilizya abukambausi bwakubuleya?
Mbuti mbotukonzya kutondezya mbouyandika kapati mulimo wakuyiisya bamwi kasimpe?