Malifalensi Aamu Kabbuku Kamuswaangano Wabuumi Amulimo Wesu
AUGUST 5-11
MBONO IZILI MU JWI LYA LEZA | 2 TIMOTEYO 1-4
“Leza Tanaakatupa Muuya Wabukandu”
(2 Timoteyo 1:7) Nkaambo Leza tanaakatupa muuya wabukandu pe, pele wakatupa muuya wanguzu aluyando alimwi akuyeeya kabotu.
Nobukubusi—Akulibonye Kukomena Kwenu Kwakumuuya
Kutegwa Paulo agwasye Timoteo, wakazoomuyeezya kuti: “Leza takatupede muuya wabukandu, pe, wakatupa muuya wanguzu awakuyandana awakulibamba.” (2 Tim. 1:7) “Kulibamba” kujatikizya kucikonzya kuyeeya cabusongo. Kubikkilizya kucikonzya kuliyumya nokuba kuti mwalijana mubukkale mbomutayandi. Bakubusi ibamwi batasimide kumuuya batondezya muuya wabukandu alimwi basola kubutija bukkale ibukatazya kwiinda mukuciindilizya koona naa kweebelela cipeku-peku, kubelesya misamu iikola naa kunywa kapati bukoko, kuyanda kulikkomanisya mumapobwe ciindi coonse, naa kuba abukkale bwakutalilemeka. Banakristo balaililwa “kukazya kasampusampu azisusi zibi zyaansi ano, . . . kukala cakulibatamika acakululama acakulemeka Leza muciindi ecino casunu.”—Tito 2:12.
(2 Timoteyo 1:8) Aboobo utafwi nsoni kucitila bumboni kujatikizya Mwami wesu naa kujatikizya ndime, ndemwaange akaambo kanguwe, pele kolibambila kupengela makani mabotu kwiinda mukusyoma nguzu zya Leza.
‘Amuyume Akuba Basicamba!’
Paulo naakalembela Timoteo wakaamba kuti: “Leza takatupede muuya wabukandu, pe, wakatupa muuya wanguzu . . . [Aboobo] utafwi bweeme kubumboni bwa-Mwami wesu.” (2 Timoteo 1:7, 8; Marko 8:38) Notwamana kubala majwi aaya, tulakonzya kulibuzya kuti: ‘Sena ndilafwa bweeme akaambo kalusyomo lwangu naa ndili sicamba? Kumilimo nkondibelekela (naa kucikolo nkondiiya), sena aabo mbotuli limwi ndilabaambila kuti ndili umwi wa Bakamboni ba Jehova naa ndilabasisa makani aaya? Sena ndilafwa bweeme akaambo kakwiindana bukkale abantu bamwi naa ndilalitondezya caantangalala akaambo kacilongwe ncendijisi a Jehova?’ Ikuti naa kuli muntu uukulanga munzila iiteelede kukambauka makani mabotu naa usyoma zintu ziindene anzyobasyoma bantu banji, uleelede kuyeeya lulayo Jehova ndwaakapa Joshua ilwakuti: “Koyuma akuba [sicamba.]” Ikaambo nkomuteelede kuluba nkakuti, icintu cipati takuli kuyeeya kwababelesima naa mbotwiiya limwi pe, pele ninzila mbwazilanga zintu Jehova alimwi a Jesu Kristo.—Bagalatiya 1:10.
Kuyandaula Mbono Zyakumuuya
(2 Timoteyo 2:3, 4) Mboli sikalumamba mubotu wa Kristo Jesu, kolibambila kupenga mumapenzi. 4 Muntu uubeleka mulimo wabusikalumamba tatoli lubazu mumakwebo aabuumi obuno, kutegwa akkomanisye yooyo wakamunjizya busikalumamba.
Kuyandaula Lubono Lwini-Lwini
Timoteyo wakali mwaalumi iwakajisi lusyomo. Naakamana kwaamba Timoteyo kuti “sikalumamba mubotu wa Kristo Jesu,” Paulo wakamwaambila kuti: “Muntu uubeleka mulimo wabusikalumamba tatoli lubazu mumakwebo aabuumi obuno, kutegwa akkomanisye yooyo wakamunjizya busikalumamba.” (2Tim. 2:3, 4) Basikutobela Jesu mazuba aano, kubikkilizya ampi iinda ku 1 miliyoni yabakwesu ibabeleka mulimo waciindi coonse, balalutobela lulayo lwa Paulo kusikila bukkale bwabo mpobuzumizya. Ciindi nobakaka kuyungwa amakwebo alimwi azintu zili munyika eeyi, bayeeya njiisyo yakuti: “Sikukweleta muzike wayooyo uukweletesya.” (Tus. 22:7) Taakwe cimbi Saatani ncayanda kunze lyakuti tubelesye ciindi cesu coonse alimwi anguzu zyesu zyoonse kumubelekela munyika yakwe eeyi yamakwebo. Zyakusala izimbi inga zyatubikka mubuzike bwakuyandaula mali kwamyaka minji kapati. Zikwelete zyamali aakuyasya ŋanda, zikwelete zyakubbadelela basicikolo, mali aakubbadelela mootokala, mane buya amicado iidula zilakonzya kutunjizya mubukkale bwakuyandaula mali. Tulakonzya kutondezya kuti tucita zintu cabusongo kwiinda mukuubya-ubya buumi bwesu, kucesya zikwelete alimwi akucesya zintu nzyotuula. Twacita boobo, tuyoomubelekela Leza cakwaanguluka muciindi cakubelekela bweende oobu bwamakwebo.—1Tim. 6:10.
(2 Timoteyo 2:23) Kunze lyaboobo, koikaka mibandi yakukazyanya eeyo yabufwubafwuba alimwi iitondezya kubula luzyibo, nkaambo ulizyi kuti ibusya nkondo.
Bantu ba Jehova ‘Balakukaka Kutalulama’
Mazuba aano, bantu ba Jehova tabavwuli kuba abasiluleyo mumbungano. Nokuba boobo, njiisyo zitali zyamumagwalo, kufwumbwa nkozizwa, tweelede kuzikaka cakucenjela. Tacili camaano kukazyanya abasiluleyo, naa mbantu beni, naa nkwiinda mukwiingula tugwalo aa Intaneti naa kwiinda mukubelesya nzila iili yoonse yakubandika. Nokuba kuti makanze inga kaali aakugwasya muntu, mibandi iili boobo ilakonzya kwiindana amalailile aamu Magwalo ngotwalanga-langa ino-ino aawa. Muciindi caboobo, mbotuli bantu ba Jehova, tulatantamuka cakumaninina alimwi akukaka luleyo.
AMUSUNGWAALE MUMULIMO WAMUMUUNDA
Bantu ba Jehova ‘Balakukaka Kutalulama’
Amubone kaambo kamu Magwalo kakapa kuti Paulo alembe majwi aajanika mulugwalo lwa 2 Timoteo 2:19. Majwi aaya aamba ‘zyantalisyo njumu ya Leza’ mpoonya akwaamba twaambo tobilo tulembedwe alinjiyo. Kaambo kakusaanguna nkakuti “Jehova ulibazyi aabo babalilwa kulinguwe,” ikaambo ikazulubuludwe kuzwa mulugwalo lwa Myeelwe 16:5. (Amubone cibalo cainda.) Kaambo kabili kakuti “ooyo wiita zyina lya Jehova akukake kutalulama,” kabanyonganya basikwiiya zyamu Bbaibbele kwaciindi cilamfwu. Ino nkaambo nzi?
Majwi aa Paulo atondezya kuti azubuludwe buya. Nokuba boobo, kuboneka kuti mu Magwalo aa Chihebrayo taakwe majwi aayendelana amajwi ngaakazubulula Paulo. Aboobo, ncinzi ncaakali kwaamba mwaapostolo naakaamba kuti: “Ooyo wiita zyina lya Jehova akukake kutalulama”? Katanaamba majwi aaya, Paulo wakazubulula lugwalo lwa Myeelwe caandaano 16 cibalo icaamba zyakuzanga kwa Kora. Sena akalo kaambo kabili ka Paulo kuli mbokaswaangene atwaambo tujatikizya kuzanga ooko?
Bbaibbele lyaamba kuti Datani a Abiramu, bana ba Eliabu, bakamusangana Kora musololi wabantu bakazangila Musa a Aroni. (My. 16:1-5) Caantangalala, bakamufwubaazya Musa akukaka nguzu zyabweendelezi nzyaakapedwe a Leza. Bazangi aaba bakazumanana kukkala akati kabantu ba Jehova, calo icakali kubikka bantu basyomeka muntenda yakumuuya. Buzuba nobwakasika bwakuti Jehova atondezye ibakali bakombi bakwe basyomeka alimwi abakali bazangi, wakaamba cakutainda mumbali.
Cibalo caamba kuti: “Jehova wakaambila Musa, wati, ambila imbungano eyi kuti, amutantamuke kuzwa kucikalilo ca-Kora aca-Datani aca-Abiramu. Mpawo Musa wakanyamuka, waya kuli-Datani a-Abiramu; abalo bapati ba-Israyeli bakamutobela. Lino wakaambila imbungano kuti, amuzwe kuzilao zyabantu aba babi, alimwi mutagumi cintu niciba comwe cabo, kuti mutanyonyooki muzibi zyabo zyoonse. Bamvwe obo, bakatantamuka kuzwa kuzilao zya Kora a Datani a-Abiramu.” (My. 16:23-27) Mpoonya Jehova wakabajaya boonse ibakazanga. Mukwiimpana, bakombi basyomeka—ibakazwa kwiinda mukukaka kutalulama—tiibakafwa pe.
Jehova ulabona izili mumoyo! Ulakubona kusyomeka kwabaabo ibabalilwa kulinguwe. Nokuba boobo, bantu bakwe basyomeka bakeelede kubweza ntaamu iili kabotu yakulyaandaanya kubantu ibataluleme. Aboobo, cileelela kwaamba kuti Paulo wakali kwaamba cibalo icili mulugwalo lwa Myeelwe 16:5, 23-27 naakalemba kuti: “Ooyo wiita zyina lya Jehova akukake kutalulama.” Kaambo aaka kaleendelana amajwi aa Paulo aakuti: “Jehova ulibazyi aabo babalilwa kulinguwe.”—2 Tim. 2:19.
AUGUST 12-18
MBONO IZILI MU JWI LYA LEZA | TITO 1–FILIMONI
“Amusale Baalu”
(Tito 1:5-9) Ndakakusiya mu Krete ikutegwa ululamike zintu zinyongene alimwi akusala baalu mumunzi amunzi, mbubonya mbondakakulailila: 6 ikuti kakuli mwaalumi uuli woonse uunyina butongo, mulumi wamukaintu omwe, uujisi bana basyoma ibatapedwe mulandu uuli woonse wabukkale bwabutaka naa ibatamvwi kulaigwa. 7 Nkaambo mbwali mubanzi wa Leza, imulangizi weelede kuba muntu uutakwe butongo buli boonse, ikutali muntu uutanyoneki, ikutali muntu uufwambaana kukalala, ikutali mukolwi, ikutali sinkondo, ikutali uuyanda kujana mpindu cabumpelenge, 8 pele abe muntu uusamausya beenzu, uuyandisya bubotu, uulibatamika, uululeme, uusyomeka, uulilesya, 9 uukakatila kumajwi aasyomeka kujatikizya luzyibo lwakwe mukuyiisya, kutegwa acikonzye kukulwaizya bamwi anjiisyo mbotu alimwi akusinsa baabo ibakazya.
Mibuzyo Yabasikubala
Nokuba kuti Magwalo taambi zintu zyoonse zyakajatikizyidwe mukusala, kuli bumboni butondezya mbokwakali kucitwa. Tubala kuti ciindi Paulo a Barnaba nobakali kupiluka kuya kuŋanda kuzwa kulweendo lwabo lwabumisyinali lwakusaanguna, “bakabasalila baalu mumbungano imwi aimwi alimwi, bakapaila akuliimya kulya, eelyo bakabasiya mumaanza a Jehova ooyo ngobakasyoma.” (Mil. 14:23) Kwiinde myaka iili mbwiibede, Paulo wakalembela mweenzinyina ngobakali kubeleka limwi Tito kuti: “Ndakakusiya mu Krete ikutegwa ululamike zintu zinyongene alimwi akusala baalu mumunzi amunzi, mbubonya mbondakakulailila.” (Tit. 1:5) Mbubwenya buyo, awalo Timoteyo walo iwakeenda kapati amwaapostolo Paulo, kuboneka kuti awalo wakapedwe nguzu zyakusala. (1Tim. 5:22) Cilalibonya kuti kusala ooku kwakali kucitwa abalangizi beendeenda ikutali abaapostolo naa abapati ibakali mu Jerusalemu.
Kwiinda mukutobela cikozyanyo eeci, Kabunga Keendelezya ka Bakamboni ba Jehova kakacinca mbobasalwa baalu abakutausi. Kutalikila mu September 1, 2014, baalu abakutausi balasalwa munzila eeyi: Mulangizi wabbazu umwi aumwi ulainduluka kulanga-langa kulumbaizya ikucitwa mubbazu lyakwe. Ciindi naswaya mbungano, uyakusoleka kubazyiba bakwesu aabo ibakalumbaizyigwa, uyakubeleka ambabo mumulimo wakukambauka kuti kacikonzyeka. Aakumana kubandika abaalu bambungano kujatikizya kulumbaizya nkobakacita, mulangizi wabbazu ujisi mukuli wakusala baalu abakutausi mumbungano izili mubbazu lyakwe. Munzila eeyi bubambe bulakozyanya ambobwakabede mumwaanda wamyaka wakusaanguna.
Ino mbaani ibabeleka milimo iindene-indene mububambe oobu? Mbubwenya mbuli lyoonse, “muzike uusyomeka alimwi uucenjede” ulijisi mukuli mupati wakusanina babelesi bamuŋanda. (Mt. 24:45-47) Eeci cilabikkilizya akuvwuntauzya Magwalo kwiinda mukugwasyigwa amuuya uusalala, kutegwa ape busolozi bugwasya mbozikonzya kubelesyegwa njiisyo zyamu Bbaibbele izijatikizya mboyeelede kweendelezyegwa mbungano nyika yoonse. Muzike musyomesi alimwi ulasala balangizi bamabazu boonse alimwi abaabo ibabelekela muma Kkomiti aa Mitabi. Mpoonya, ofesi yamutabi imwi aimwi ilapa lugwasyo luyandika kutegwa malailile aapegwa abelesyegwe. Kabunga kabaalu kamwi akamwi kalijisi mulimo mupati wakulanga-langa cakulomya zyeelelo zyamu Magwalo zyabakwesu mbobalumbaizya kuti basalwe kuba baalu naa bakutausi mumbungano ya Leza. Mulangizi wabbazu, kwiinda mukupaila, ulalanga-langa cakulomya kulumbaizya ikwakacitwa abaalu mpoonya ulasala bakwesu ibeelela.
Kuyandaula Mbono Zyakumuuya
(Tito 1:12) Umwi akati kabo, imusinsimi wabo mwini wakati: “Bana Krete lyoonse mbabeji, mbanyama bamusyokwe ibakali, mbalyato alimwi mbatolo.”
w89 5/15 31 ¶5
Mibuzyo Yabasikubala
Paulo tanaakali kuzuminizya kubasalulula munzila iili yoonse naa kubasampaula bana Krete. Tuli masimpe kujatikizya kaambo aaka, nkaambo Paulo wakalizyi kuti ku Krete kwakali Banakristo ibakali kucita kabotu aabo Jehova mbaakali kukkomanina alimwi mbaakananika amuuya wakwe uusalala. (Mil. 2:5, 11, 33) Kwakali Banakristo banji ibakalyaabide balo ibakali kukonzya kupanga mbungano “mumunzi amunzi.” Nokuba kuti Banakristo aaba bakali bantu batalondokede, tuli masimpe kuti tiibakali babeji, batolo naa balyato; nkaambo Jehova naatakazumanana kubakkomanina. (Bafilipi 3:18, 19; Ciyubunuzyo 21:8) Alimwi mbubwenya mbuli mbocibede mumasi manji mazuba aano, kweelede kuti ku Krete kwakali bantu babombe myoyo ibakauside akaambo kabukkale bubyaabi ibwakali kucitika alimwi bantu bali boobo bakalilibambilide kutambula mulumbe wa Bunakristo.—Ezekieli 9:4; amweezyanisye a Milimo 13:48.
(Filimoni 15, 16) Mubwini, ambweni aaka nkakaambo nkaakazwida kwakaindi kali mbokabede ikutegwa ajoka, ukkale anguwe lyoonse, 16 katacili muzike pe pele wiinda aamuzike, nkokuti imukwesu uuyandwa ikapati kulindime, nokuba boobo yebo weelede kumuyanda kwiinda waawo nkaambo muzike wako alimwi munyoko mu Mwami.
Twaambo Tugwasya Mumagwalo Aakalembelwa Tito, Filimona, Alimwi Abana Hebrayo
15, 16—Ino nkaambo nzi Paulo ncaatakalomba Filimona kuti Onesimo agusyigwe mubuzike? Paulo wakakanza kukakatila kumulimo wakwe ‘wakukambauka makani aa Bwami bwa Leza alimwi akuyiisya makani aa Mwami Jesu Kristo.’ Aboobo, wakasala kutajatikizyigwa mutwaambo twabanamaleya, mbuli tooto tujatikizya buzike.—Inc. 28:31.
AUGUST 19-25
MBONO IZILI MU JWI LYA LEZA | BAHEBRAYO 1-3
“Amuyandisye Bululami Akusulaika Bubi”
(Bahebrayo 1:8) Pele kujatikizya Mwanaakwe, waamba kuti: “Leza ncuuno cako cabwami lyoonse alyoonse mane kukabe kutamani, alimwi nkoli ya Bwami bwako ninkoli yabululami.
Amumutembaule Kristo, Mwami Uulemekwa!
Jehova wakabikka Mwanaakwe kuba Mwami wakwe Mesiya kujulu mu 1914. ‘Musako wabwami bwakwe musako wabululami,’ aboobo, bululami bwakwe alimwi abwabulelo bwakwe bulisinizyide. Bweendelezi bwakwe mbwamumulawo, nkaambo ‘Leza ncecuuno cakwe.’ Nkokuti Jehova nentalisyo yabwami bwakwe. Kuyungizya waawo, cuuno cabwami ca Jesu cinakuliko ‘kukabe kutamani.’ Sena tamukkomene kubelekela Jehova kwiinda mumwami singuzu uuli boobo, Mwami uusalidwe a Leza?
(Bahebrayo 1:9) Yebo wakayandisya bululami, alimwi wakasulaika bubi. Nkakaambo kaako Leza, Leza wako, ncaakakunanikila mafwuta aalukkomano manji kwiinda beenzinyoko.”
Amumutembaule Kristo, Mwami Uulemekwa!
Amubale Intembauzyo 45:6, 7. Akaambo kaluyando Jesu ndwajisi kujatikizya bululami alimwi akutayanda cintu cili coonse cikonzya kupa kuti Bausyi batalemekwi, Jehova wakamunanika kuba Mwami wa Bwami bwa Mesiya. Jesu wakananikwa ‘amafuta aakukondwa’ kwiinda ‘beenzinyina,’ nkokuti bami ba Juda mumulongo wa Davida. Munzila nzi? Kaambo kamwi nkakuti Jesu wakananikwa a Jehova lwakwe mwini. Kuyungizya waawo, Jehova wakamunanika kuba Mwami alimwi a Mupaizi Mupati. (Int. 2:2; Heb. 5:5, 6) Kunze lyaboobo, Jesu wakananikwa kutali amafwuta pe, pele amuuya uusalala alimwi bulelo bwakwe tabuli bwaanyika pe, pele mbwakujulu.
Kuyandaula Mbono Zyakumuuya
(Bahebrayo 1:3) Walo nkokumweka kwabulemu bwa Leza acikozyanyo cini-cini citondezya mbwabede Leza, alimwi zintu zyoonse ulazibamba kuti kazipona ajwi lyanguzu zyakwe. Alimwi naakamana kusalazya zibi zyesu wakakkala kujanza lyalulyo lya Mupati kujulu.
it-1 1185 ¶1
Cinkozya
Sena Jesu lyoonse wali kutondezya bube mbuli bwa Bausyi munzila iikozyenye?
Mwana wa Leza mutaanzi kuzyalwa, ooyo uutegwa Jesu, ncinkozya ca Bausyi. (2Kor. 4:4) Mbwaanga Mwana ooyu ngonguwe Leza ngwaakali kwaambila kuti, “Atulenge muntu mucinkozya cesu,” Mwana ooyu wali kubakozya Bausyi kuzwa ciindi naakalengwa. (Matl. 1:26; Joh. 1:1-3; Kol. 1:15, 16) Ciindi naakali anyika kali muntu uulondokede, wakabutondezya bube bwa Bausyi kusikila mpakonzya kugolela muntu, aboobo wakali kukonzya kwaamba kuti “kufwumbwa ooyo wandibona wamubona awalo Taata.” (Joh. 14:9; 5:17, 19, 30, 36; 8:28, 38, 42) Kukozyanya ooku kwakayindila buya ciindi Jesu naakabusyigwa kubuumi bwakujulu alimwi akupegwa “nguzu zyoonse kujulu alimwi aanyika” kuli Jehova Leza, Bausyi. (1Pet. 3:18; Mt. 28:18) Mbwaanga Leza wakamusumpula Jesu akumupa “cuuno caatala,” lino Mwana wa Leza wakaindila buya kutondezya bube bwa Bausyi kwiinda ciindi naakacili kujulu katanaboola anyika. (Flp. 2:9; Heb. 2:9) Lino ‘ncikozyanyo cini-cini citondezya bwini mbwabede Leza.’—Heb. 1:2-4.
(Bahebrayo 1:10-12) Alimwi waamba kuti: “O Mwami, kumatalikilo nduwe wakabikka ntalisyo yanyika, alimwi majulu milimo yamaanza aako. 11 Eezyi ziyooloba, pele yebo unooliko lyoonse; alimwi mbubonya mbuli cisani zyoonse buyo ziyoomana, 12 alimwi uyoozivwunga mbubonya mbuli jansi, mbuli cisani, alimwi ziyoocincigwa. Pele yebo uli mbubonya mbuli lyoonse, alimwi myaka yako taikamani pe.”
it-1 1063 ¶7
Julu
Majwi aali kulugwalo lwa Intembauzyo 102:25, 26 aamba Jehova Leza, pele mwaapostolo Paulo wakaazubulula ikwaamba Jesu Kristo. Wakacita oobu akaambo kakuti alikke Mwana wa Leza simuzyalwaalikke ngowakali mwiiminizi wa Leza iwakagwasyilizya mukulenga zintu zyoonse. Aboobo Paulo wakakozyanisya ciindi ncaakapona Mwana, kuciindi zintu nozyakabako kuzwa nozyakalengwa anyika, zyalo ikuti Leza naakayanda, ‘naakazivwunga mbubonya mbuli jansi’ akuzibikka ambali.—Heb. 1:1, 2, 8, 10-12; amweezyanisye a 1Pet. 2:3.
AUGUST 26–SEPTEMBER 1
MBONO IZILI MU JWI LYA LEZA | BAHEBRAYO 4-6
“Amusolekesye Kusikila Mpomugolela Kutegwa Munjile Mukulyookezya kwa Leza”
(Bahebrayo 4:1) Aboobo, mbwaanga cisyomezyo cakunjila mukulyookezya kwakwe nkocicili, atucenjele kuti kutabi naba omwe akati kanu uukonzya kubonwa kuti teeleli kunjila.
(Bahebrayo 4:4) Nkaambo kujatikizya buzuba bwaciloba, cibalo cimwi camu Magwalo caamba kuti: “Eelyo Leza wakalyookezya kumilimo yakwe yoonse mubuzuba bwaciloba,”
Ino Kulyookezya Kwa Leza Caamba Nzi?
Kuli twaambo tobilo tutupa kusyoma kuti buzuba bwaciloba bwakacili kutobelwa mumwaanda wamyaka wakusaanguna C.E. Kusaanguna, amuyeeye majwi aa Jesu ngakaambila basikukazya ibakali kumukazya akaambo kakuponya bantu mu Sabata calo ncobakabona kuti mulimo. Mwami wakabaambila kuti: “Taata ulabeleka ambuli sunu, aboobo andime ndilabeleka lyoonse.” (Joh. 5:16, 17) Ino wakali kwaamba nzi? Jesu bakamubejelezya kuti wakali kubeleka mubuzuba bwa Sabata. Kwiingula kaambo aaka wakaamba kuti: “Taata ulabeleka ambuli sunu.” Aawa, Jesu wakali kwaambila basikumukazya kuti: ‘Mebo a Bataata tubeleka mulimo omwe. Mbokunga Bataata balikubeleka kwazyuulu zyamyaka zya Sabata, nkokuti andime ndeelede kuzumanana kubeleka, nomuba mu Sabata.’ Aboobo, Jesu wakali kupandulula kuti anyika, buzuba bupati bwa Leza bwakulyookezya, buzuba bwaciloba tiibwakamana mubuzuba bwakwe.
Kaambo kabili kakapegwa amwaapostolo Paulo. Naakali kuzubulula lugwalo lwa Matalikilo 2:2 kujatikizya kulyookezya kwa Leza, Paulo wakasololelwa amuuya kulemba kuti: “Swebo notwatondezya lusyomo tulanjila mukulyookezya ooko.” (Heb. 4:3, 4, 6, 9) Aboobo, buzuba bwa ciloba bwakali kuzumanana muciindi ca Paulo. Ino buzuba bwakulyookezya oobo bwakali kuyootola ciindi cilamfwu buti?
Kutegwa twiingule mubuzyo ooyu, tweelede kuyeeya makanze aabuzuba bwaciloba. Lugwalo lwa Matalikilo 2:3 lulaapandulula makanze aayo nolwaamba kuti: “Leza wakakondezya buzuba bwamusanu aabili akubusalazya.” Oobu buzuba Jehova ‘wakabusalazya’—bwakalisetekene naa bwakali bwaalubazu kutegwa buzuzikizye makanze aakwe. Makanze aayo ngakuti inyika ikkalwe abaalumi alimwi abanakazi ibamvwida ibayooilanganya alimwi azyintu zyoonse zipona alinjiyo. (Matl. 1:28) Aboobo, ikutegwa makanze aayo azuzikizyigwe Jehova Leza a Jesu Kristo “Mwami wa Sabata,” bazumanana ‘kubeleka ambuli sunu.’ (Mt. 12:8) Buzuba bwa Leza bwakulyookezya buyoozumanana kusikila makanze aambubo akazuzikizyigwe cakumaninina kumamanino aa Bulelo bwa Kristo bwa Myaka iili Cuulu.
(Bahebrayo 4:6) Aboobo, mbwaanga kucili bamwi ibeelede kunjila mukulyookezya ooku, alimwi aabo bakasaanguna kukambaukilwa makani mabotu tiibakanjila akaambo kakutaswiilila,
Ino Kulyookezya Kwa Leza Caamba Nzi?
Makanze aa Leza akapandululwa kabotu kuli ba Adamu a Eva, pele bakaalilwa kwaatobela. Mubwini, ba Adamu a Eva mbobakali bantu bakusaanguna kutatobela malailile. Kuzwa ceeco ciindi mamiliyoni aabantu abalo bacileka kuswiilila. Nobaba bantu ba Leza basalidwe, cisi ca Israyeli bakanjila muciyanza cakutaswiilila. Nkakaambo kaako Paulo ncaakacenjezya Banakristo bamumwaanda wamyaka wakusaanguna kuti bamwi aakati kabo bakali kuyoonjila mukakole nkoonya mbuli bana Israyeli bansiku. Wakalemba kuti: “Aboobo atusoleke kusikila mpotugolela kunjila mukulyookezya ooku, kutegwa kutabi muntu naba omwe uuba aciyanza nciconya eeco cakutaswiilila.” (Heb. 4:11) Amubone kuti Paulo waamba kutaswiilila kuti kuliswaangene akwaalilwa kunjila mukulyookezya kwa Leza. Ino eeci caamba nzi kulindiswe? Kuti twacita zyintu ziteendelani amakanze aa Leza, sena inga tiitwanjila mukulyookezya kwa Leza? Mubwini bwiinguzi kumubuzyo ooyu bulayandika kapati kulindiswe alimwi tulabulanga-langa. Lino atubone azimwi nzyotukonzya kwiiya kujatikizya kunjila mukulyookezya kwa Leza kwiinda mukulanga-langa cikozyanyo cibi cabana Israyeli.
(Bahebrayo 4:9-11) Aboobo kucili sabata yakulyookezya kubantu ba Leza. 10 Nkaambo muntu iwanjila mukulyookezya kwa Leza walyookezya akumilimo yakwe mwini, mbubonya Leza mbwaakalyookezya kumilimo yakwe. 11 Aboobo atusoleke kusikila mpotugolela kunjila mukulyookezya ooku, kutegwa kutabi muntu naba omwe uuba aciyanza nciconya eeco cakutaswiilila.
Ino Kulyookezya Kwa Leza Caamba Nzi?
Mazuba aano, taakwe Banakristo bazumanana kutobela zibeela zimwi zya Mulawo wa Musa kutegwa bakafwutuke. Majwi aakasololelwa amuuya Paulo ngaakalembela bana Efeso alacisalazya kuti: “Ikwiinda muluzyalo lwa Leza oolu mwafwutulwa akaambo kalusyomo; alimwi eeci tacili akaambo kandinywe pe. Pele, ncipego buyo ca Leza. Peepe, eeci tacili akaambo kamilimo pe, ikutegwa kutabi muntu uukonzya kuba akaambo kakulilumbaizizya.” (Ef. 2:8, 9) Aboobo ino caamba nzi ku Banakristo kunjila mukulyookezya kwa Leza? Jehova wakasala buzuba bwaciloba kuti bube buzuba bwakwe bwakulyookezya kutegwa azuzikizye makanze aakwe munyika. Tulakonzya kunjila mukulyookezya kwa Jehova naa kumusangana mukulyookezya kwakwe kwiinda mukubeleka kweelana amakanze aakwe mbubwenya mbotwaambilwa mumbunga yakwe.
Kulubazu lumwi kuti katutalutobeli lulayo lujanika mu Bbaibbele kuzwa kuciinga camuzike musyomesi akusala kutobela nzyotuyanda, tunookazyanya amakanze aa Leza. Eeci cilakonzya kunyonganya cilongwe cibotu ncotujisi a Jehova. Mucibalo citobela, tuyoolanga-langa bukkale motukonzya kutondezya kuti tulaatobela malailile. Nzyotusala mubukkale oobu ziyootondezya naa twakanjila mukulyookezya kwa Leza.
Kuyandaula Mbono Zyakumuuya
(Bahebrayo 4:12) Nkaambo jwi lya Leza lilaabuumi alimwi lilaanguzu alimwi lilabosya kwiinda panga lili lyoonse likwengedwe koonse-koonse alimwi lilayasa mane kukwaandaanya buumi amuuya, akukwaandaanya manungo aazifwuwa kumooma, alimwi lilakonzya kuzyiba mizeezo amakanze aamumoyo.
Mibuzyo Yabasikubala
Ino “jwi lya Leza” ilyaambwa kuti “lilaabuumi alimwi lilaanguzu” kulugwalo lwa Bahebrayo 4:12 ninzi?
▪ Twaambo tuzingulukide kapango aaka tutondezya kuti mwaapostolo Paulo wakali kwaamba mulumbe, naa nzyaakaamba Leza kujatikizya makanze aakwe, mbuli mbokulembedwe mu Bbaibbele.
Lugwalo lwa Bahebrayo 4:12 kanji-kanji lulabelesyegwa mumabbuku eesu kutondezya kuti Bbaibbele lilijisi nguzu zyakucinca bantu, alimwi cileelela kwaamba boobu. Nokuba boobo, cilagwasya kapati kulanga twaambo toonse tuzingulukide lugwalo oolu lwa Bahebrayo 4:12. Paulo wakali kukulwaizya Banakristo ba Hebrayo kucita zintu munzila yeendelana amakanze aa Leza. Makanze aa Leza manji akalilembedwe mumagwalo aasalala. Paulo wakabelesya bana Israyeli ibakafwutulwa kuzwa mu Egepita kuba cikozyanyo. Bakalijisi bulangizi bwakunjila munyika yakasyomezyedwe “iikunka buci amukupa,” oomo mobakali kuyookkomana akulyookezya kwini-kwini.—Kul. 3:8; Dt. 12:9, 10.
Aaya ngaakali makanze Leza ngaakaamba. Nokuba boobo, bana Israyeli mukuya kwaciindi bakayumya myoyo yabo alimwi tiibakatondezya lusyomo, aboobo bunji bwabo bakaalilwa kunjila mukulyookezya ookuya. (My. 14:30; Josh. 14:6-10) Nokuba boobo, Paulo wakayungizya kuti kwakacili “cisyomezyo cakunjila mukulyookezya kwa [Leza].” (Heb. 3:16-19; 4:1) “Cisyomezyo” eeco cakutadooneka ncibeela camakanze ngaakaamba Leza. Mbubwenya mbobakacita Banakristo ba Hebrayo, andiswe tulakonzya kubala alimwi akucita zintu kweelana amakanze aa Leza. Kutegwa atondezye kuti cisyomezyo eeci ncamu Magwalo, Paulo wakazubulula lugwalo lwa Matalikilo 2:2 alimwi alwa Intembauzyo 95:11.
Cakutadooneka, ceelede kutukkomanisya kuzyiba kuti “cisyomezyo cakunjila mukulyookezya kwa [Leza] nkocicili.” Tulasyoma kuti bulangizi bwamu Bbaibbele bwakunjila mukulyookezya kwa Leza ncobeni bulakonzyeka, alimwi twabweza kale ntaamu kutegwa tunjile. Tiitwacita oobo kwiinda mukubamba Mulawo wa Musa naa kuyanda kuti tukkomaninwe a Jehova kwiinda mukucita milimo iimbi buyo. Muciindi caboobo, katujisi lusyomo kumwi katukkomene, tulazumanana kubelekela antoomwe amakanze ngaatuyubunwida Leza. Kuyungizya waawo, mbubwenya mbotwabona kale, bantu banji munyika yoonse batalika kwiiya Bbaibbele alimwi amakanze aa Leza. Bunji bwabo balakulwaizyigwa kucinca bukkale bwabo, kuba alusyomo, alimwi akuba Banakristo babbapatizyidwe. Mbobajatikizyigwa akasimpe mbumboni bwakuti “jwi lya Leza lilaabuumi alimwi lilaanguzu.” Makanze aa Leza kweelana ambwaabede mu Bbaibbele, atugwasya kale, alimwi ayoozumanana kutugwasya mubuumi bwesu.
(Bahebrayo 6:17, 18) Munzila njoonya eeyi, Leza naakasala kutondezya basikukona cisyomezyo eeci munzila iisalede mbwaatacinci makanze aakwe, wakacisinizya kwiinda mukukonka, 18 kutegwa kwiinda muzintu eezyi zyobilo zitacinci oomo mocitakonzyeki kuli Leza kubeja, swebo notwakatijila kumayubilo aayo tukonzye kuyumizyigwa kapati ikubujatisya bulangizi mbotubikkilidwe kumbele lyesu.
it-1 1139 ¶2
Bulangizi
Bulangizi oobu bwabuumi butamani alimwi akutabola kuli baabo ‘batola lubazu mubwiite bwakujulu’ (Heb. 3:1) bulisinizyide alimwi tulakonzya kubusyoma ncobeni. Mbwaanga Leza takonzyi kubeja, bulangizi bulasinizyigwa azintu zyobilo, nkokuti kwiinda mucisyomezyo alimwi acikonke cakwe, alimwi kuzuzikizyigwa kwabulangizi bwesu kuyeeme ali Kristo walo lino uuli kujulu kali cilenge citafwi. Aboobo bulangizi oobu bwaambwa kuti buli “mbuli ngobyo yiimika bwato yabuumi bwesu, ibusinizyide alimwi ibuyumu nta, alimwi bulainda akunjila mukati kamulembo wakusitilizya [mbuli mupaizi mupati mbwaakali kunjila mu Busena Busalalisya mu Buzuba Bwakumanya Milandu], ooko sikutusaangunina nkwaakanjila kale akaambo kandiswe, nkokuti Jesu, ooyo waba mupaizi mupati mane kukabe kutamani mbubonya mbuli Melekizedeki.”—Heb. 6:17-20.