Sena Mulaakubona Jehova Mbwayiingula Mipailo Yanu?

Bbaibbele lilijisi zikozyanyo zinji zyamipailo njaakaingula Jehova. Ciindi babelesi ba Leza nobakabona Jehova mbwaakali kubaswiilila akwiingula mipailo yabo, tacidoonekwi kuti lusyomo lwabo lwakayuma. Aboobo, cilakonzya kutugwasya kuti katwaamba zintu zigaminide mumipailo yesu kumane akusola kubona Jehova mbwayiingula. Alimwi tutalubi kuti bwiinguzi bwakwe bulakonzya kuboola munzila njotwatali kulangila naa kuyeeyela. (2Kor. 12:7-9; Ef. 3:20) Ino zintu nzi Jehova zyakonzya kutupa ciindi naingula mipailo yesu?

• Nguzu, kukkalwa moyo, naa lusyomo kutegwa tulwane penzi ndyotujisi.​—Flp. 4:13

• Busongo bwakupanga cakusala icili kabotu.​—Jak. 1:5

• Kukanza alimwi anguzu izyakucita cintu cimwi.​—Flp. 2:13

• Kukkalwa moyo ciindi notwalibilika.​—Flp. 4:6, 7

• Luumbulizyo alimwi akukulwaizyigwa abamwi.​—1Joh. 3:17, 18

• Lugwasyo kuli baabo mbotupailila.​—Mil. 12:5, 11

AMWEEBELELE KAVIDIYO KAKUTI JEHOVA ‘SIKUSWIILILA MIPAILO,’ MPOONYA MWIINGULE MIBUZYO IITOBELA:

• Ino mbuti cakuluula ca Mukwesu Shimizu mbocikonzya kutukulwaizya ikuti naa tatucikonzyi kucita zyoonse nzyotuyanda akaambo kamapenzi aakuciswa?

• Ino mbuti mbotukonzya kwiiya cikozyanyo ca Mukwesu Shimizu?