CIBALO CAKWIIYA 49
Sena Jehova Ulayiingula Mipailo Yesu?
“Muyoondiita alimwi muyooboola akupaila kulindime, eelyo ndiyoomuswiilila.”—JER. 29:12.
LWIIMBO 41 Komvwa Mupailo Wangu
IZILI MUCIBALOa
1-2. Nkaambo nzi ncotukonzya kulimvwa kuti Jehova tayiinguli mipailo yesu?
“KOBOTELWA kapati muli Jehova, eelyo walo uyookupa nzyouyanda moyo wako.” (Int. 37:4) Eelo kaka taciliboteli cisyomezyo eeci! Pele sena tweelede kuyeeya kuti Jehova uyootupa zyoonse nzyotumulomba mpoonya-mpoonya? Nkaambo nzi ooyu ncouli mubuzyo uuyandika kapati? Amubone bukkale oobu. Mucizyi uutakwetwe uupailila kuti akanjile Cikolo Cabakambausi ba Bwami. Nokuba boobo, kwainda myaka minji katatambwi. Mukwesu uucili mwana-mwana walomba Jehova kuti amuponye kubulwazi bupati kutegwa kacikonzya kucita zinji mumbungano. Pele kunyina cacinca pe. Bazyali Banakristo bapailila kuti mwanaabo azumanane kuba mukasimpe. Pele walo wasala kucileka kumubelekela Jehova.
2 Ambweni andinywe kuli ncomwakamulomba Jehova, pele kunyina naakamucitila cintu eeco. Akaambo kaceeci, mulakonzya kutalika kuyeeya kuti Jehova wiingula buyo mipailo yabamwi ikutali yanu. Naa ambweni mulakonzya kutalika kuyeeya kuti mwakacita cintu cimwi citali kabotu. Oobo mbwaakalimvwa mucizyi wazina lya Janice.b Walo abalumi bakwe bakali kupailila kuti bakabelekele ku Beteli. Wakaamba kuti: “Ndakalisinizyide kuti tuyootambwa ku Beteli lino-lino.” Nokuba boobo, kwakainda myaka minji kabatanatambwa. Mucizyi Janice wakaamba kuti: “Ndakausa akukatazyigwa mumizeezo. Aboobo ndakatalika kulibuzya ncondakamulubizyila Jehova, kayi ndakali kupaila kapati kujatikizya kuunka ku Beteli. Nkaambo nzi ncaatakawiingula mupailo wangu?”
3. Ncinzi ncotutiilange-lange mucibalo eeci?
3 Zimwi ziindi, tulakonzya kudooneka naa Jehova ulaiswiilila ncobeni mipailo yesu. Nobaba baalumi basyomeka bakaindi mbobakali kulimvwa oobo. (Job. 30:20; Int. 22:2; Hab. 1:2) Ncinzi cikonzya kumugwasya kusinizya kuti ncobeni Jehova ulaiswiilila mipailo yanu? (Int. 65:2) Kutegwa tujane bwiinguzi kumubuzyo ooyu, cakusaanguna atulange-lange twaambo tutobela: (1) Ncinzi Jehova ncacita? (2) Ncinzi Jehova ncayanda kuti tucite? (3) Nkaambo nzi ncotunga twayandika kucinca zintu zimwi nzyotumulomba?
NCINZI JEHOVA NCACITA?
4. Kweelana a Jeremiya 29:12, ncinzi Jehova ncasyomezya kucita?
4 Jehova utusyomezya kuti unakwiiswiilila mipailo yesu. (Amubale Jeremiya 29:12.) Leza ulatuyanda kapati akaambo kakuti tulamubelekela cakusyomeka, aboobo lyoonse unakwiibikkila maano mipailo yesu. (Int. 10:17; 37:28) Nokuba boobo, eeci tacaambi kuti unootupa zyoonse nzyotumulomba. Ambweni tuyandika kulindila kusikila munyika mpya kutegwa tukapegwe zintu zimwi nzyotulomba.
5. Ncinzi Jehova ncalanga-langa ciindi naingula mipailo yesu? Amupandulule.
5 Ciindi Jehova naswiilila mipailo yesu inga ulalanga-langa mboyeendelana amakanze aakwe. (Is. 55:8, 9) Makanze amwi ngajisi ngakuti nyika yoonse kaizwide bantu bamumvwida mbwali Mweendelezi wabo. Pele Saatani wakaamba kuti bantu inga kabakkomene ikuti kabalyeendelezya. (Matl. 3:1-5) Aboobo, Jehova wakabazumizya bantu kulyeendelezya kutegwa atondezye kuti Diabolosi mubeji. Akaambo kaceeci, bweendelezi bwabantu bwaleta mapenzi aataambiki ngotubona sunu. (Muk. 8:9) Tulizyi kuti kwacecino ciindi, Jehova takonzyi kwaagusya mapenzi oonse. Nkaambo ikuti wacita oobo, bamwi balakonzya kuyeeya kuti bweendelezi bwabantu bwacikonzya kwaamanizya mapenzi, calo cikonzya kubapa kulidunda kuti balakonzya kulyeendelezya.
6. Nkaambo nzi ncotweelede kuba masimpe kuti Jehova lyoonse unoocita zintu caluyando alimwi acabululami?
6 Jehova ulakonzya kwiindanya mbwayiingula mipailo yesu nokuba kuti inga kaikozyenye. Mucikozyanyo, ciindi Mwami Hezekiya naakacisidwe kapati, wakalomba Jehova kuti amuponye. Jehova wakamwiingula akumuponya. (2Bam. 20:1-6) Kulubazu lumwi, ciindi mwaapostolo Paulo naakakombelezya Jehova kuti agusye “mumvwa mumubili” wakwe, ambweni bulwazi bumwi mbwaakajisi, Jehova kunyina naakamuponya. (2Kor. 12:7-9) Amubone alimwi cikozyanyo camwaapostolo Jakobo a Petro. Mwami Heroda wakali kuyanda kubajaya boonse bobilo. Aboobo mbungano yakatalika kumupailila Petro, kweelede kuti yakacita oobo akuli Jakobo. Nokuba boobo, Jakobo wakajaigwa, pele Petro wakavwunwa camaleele. (Mil. 12:1-11) Ambweni tulakonzya kulibuzya kuti, ‘Nkaambo nzi Jehova ncaakamuvwuna Petro ikutali Jakobo?’ Bbaibbele talyaambi pe.c Nokuba boobo, ncotusinizyide ncakuti Jehova ngu Leza “uutaciti zitaluleme.” (Dt. 32:4) Alimwi tulizyi kuti boonse bobilo, Petro a Jakobo bakali kukkomaninwa a Jehova. (Ciy. 21:14) Zimwi ziindi, Jehova tayiinguli mipailo yesu kweelana ambotwali kulangila. Pele akaambo kakuti tulisinizyide kuti Jehova lyoonse ucita zintu caluyando alimwi acabululami, kunyina notutongooka mbwayingula mipailo yesu.—Job. 33:13.
7. Ncinzi ncotweelede kweeleba kucita? Alimwi nkaambo nzi?
7 Tweelede kweeleba kweezyanisya bukkale bwesu abwabamwi. Mucikozyanyo, tulakonzya kulomba Jehova kuti atupe cintu cimwi, mpoonya kunyina naatupa. Kumane tulakonzya kumvwa muntu umwi iwakalomba cintu ncomunya, pele walo wakapegwa. Eeci ncecakacitikila mucizyi wazina lya Anna. Wakali kupailila kuti balumi bakwe ba Matthew bapone kubulwazi bwakkansa. Aciindi nciconya, kwakali bacizyi bobilo abalo ibakali kuciswa bulwazi bwakkansa. Aboobo mucizyi Anna wakali kubapailila balumi bakwe alimwi abacizyi aaba bobilo kuzwa ansi aamoyo. Bacizyi aaba bakapona pele balumi bakwe bakafwa. Kumatalikilo, mucizyi Anna wakali kulibuzya naa Jehova ngowakabagwasya bacizyi aaba kuti bapone. Ikuti naa mboobo, nkaambo nzi ncaatakawiingula mupailo wamucizyi ooyu wakuti balumi bakwe bapone? Mubwini, tatuzyi cakapa kuti bacizyi aaba bobilo bapone. Pele ncotuzyi ncakuti, Jehova uyakwaamana mapenzi oonse alimwi uliyandide kuyoobabusya balongwe bakwe bafwide.—Job. 14:15.
8. (a) Kweelana alugwalo lwa Isaya 43:2, ino Jehova utugwasya buti? (b) Mbuti mupailo mboukonzya kutugwasya ciindi notuli mubukkale bukatazya kapati? (Amubone kavidiyo kakuti Mupailo Ulatugwasya Kuliyumya.)
8 Jehova unootugwasya lyoonse. Mbwali Taateesu siluyando, Jehova kunyina nakkomana kutubona katupenga. (Is. 63:9) Pele, kunyina nalesya mapenzi kutucitikila alo aali mbuli milonga alimwi amabangabanga aamulilo. (Amubale Isaya 43:2.) Nokuba boobo, usyomezya kutugwasya kutegwa tucikonzye ‘kwiinda’ mulingawo. Alimwi kunyina nayoozumizya mapenzi eesu kuti anyonganye cilongwe cesu anguwe. Jehova alimwi ulatupa muuya wakwe uusalala ulaanguzu kutegwa atugwasye kuliyumya. (Lk. 11:13; Flp. 4:13) Akaambo kaceeci, tulakonzya kuba alusyomo lwakuti lyoonse unootupa nzyotuyandika kutegwa tucikonzye kuliyumya alimwi akuzumanana kusyomeka kulinguwe.d
NCINZI JEHOVA NCAYANDA KUTI TUCITE?
9. Kweelana alugwalo lwa Jakobo 1:6, 7, nkaambo nzi ncotweelede kuba alusyomo lwakuti Jehova unootugwasya?
9 Jehova uyanda kuti katumusyoma. (Heb. 11:6) Zimwi ziindi, mapenzi ngotujisi alakonzya kulibonya kukomena cakuti tulakonzya kulimvwa kuti tatukonzyi kuliyumya. Andiza buya tulakonzya kutalika kudooneka naa Jehova ulatugwasya. Pele Bbaibbele litusyomezya kuti kwiinda mukugwasyigwa anguzu zya Leza, tulakonzya “kutanta bwaanda.” (Int. 18:29) Aboobo muciindi cakutalika kudooneka, tweelede kupaila katujisi lusyomo luyumu lwakuti Jehova uyooyiingula mipailo yesu.—Amubale Jakobo 1:6, 7.
10. Amupe cikozyanyo cambotukonzya kucita zintu kweelana amipailo yesu.
10 Jehova uyanda kuti katucita zintu kweelana amipailo yesu. Mucikozyanyo, mukwesu uubeleka ulakonzya kulomba Jehova kuti amugwasye kuyoojanika kumuswaangano wacooko. Ino mbuti Jehova mbwakonzya kuwiingula mupailo ooyo? Ulakonzya kumupa busicamba mukwesu bwakuti abalombe basikumulemba mulimo. Nokuba boobo, mukwesu inga wayandika kuunka kuli basikumulemba mulimo kutegwa akabalombe, ambweni kwaziindi zili mbozibede. Andiza buya inga wayandika kucincana mazuba aakubeleka amubelesinyina umwi. Alimwi ikuti kwayandika, ulakonzya kusala kuti bamujubile buyo mali akaambo kakutabeleka.
11. Nkaambo nzi ncotweelede kuzumanana kupailila nzyotuyanda?
11 Jehova uyanda kuti tuzumanane kupailila zintu nzyotuyanda. (1Tes. 5:17) Jesu wakaamba kuti zintu zimwi nzyotulomba tatukonzyi kupegwa mpoonya-mpoonya. (Lk. 11:9) Aboobo tutatyompwi pe! Atuzumanane kupaila camoyo woonse alimwi cakwiinduluka-induluka. (Lk. 18:1-7) Ikuti twazumanana kupailila cintu cimwi, tutondezya Jehova kuti tuliciyandide ncobeni cintu eeco. Alimwi tutondezya kuti tulijisi lusyomo lwakuti ulakonzya kutugwasya.
NKAAMBO NZI NCOTUNGA TWAYANDIKA KUCINCA ZINTU ZIMWI NZYOTUMULOMBA?
12. (a) Mubuzyo nzi ngotukonzya kulibuzya? Alimwi nkaambo nzi? (b) Mbuti mbotukonzya kuba masimpe kuti mipailo yesu ilamulemeka Jehova? (Amubone kabbokesi kakuti “Sena Nzyondilomba Zitondezya Kuti Ndilamulemeka Jehova?”)
12 Ikuti tiitwapegwa nzyotwalomba mumupailo, ambweni inga twatalika kulibuzya mibuzyo yotatwe. Wakusaanguna ngwakuti, ‘Mwati ncondipailila cili kabotu?’ Kanji-kanji inga tuyeeya kuti tulizizyi kabotu zintu nzyotuyandika. Nokuba boobo, zintu eezyo nzyotulomba ambweni tazikonzyi akutugwasya. Ikuti katupailila kulwana penzi limwi, inga kakuli nzila imwi iikonzya kugwasya kwiinda yeeyo njotulomba. Zimwi ziindi, zintu nzyotulomba inga kaziteendelani amakanze aa Jehova. (1Joh. 5:14) Mucikozyanyo, amubone bazyali ibaambwa kumatalikilo aacibalo. Bakalomba Jehova kuti mwanaabo azumanane kuba mukasimpe. Kulomba ooku kwakali kulibonya mbuli kuti kuli buyo kabotu. Nokuba boobo, Jehova takonzyi kusinikizya muntu uuli woonse kumubelekela. Uyanda kuti toonse, kubikkilizya abana besu katulisalila buya kumubelekela. (Dt. 10:12, 13; 30:19, 20) Aboobo bazyali balakonzya kulomba Jehova kuti abagwasye kumusika amoyo mwanaabo, kutegwa mwana ooyo kamuyanda Jehova alimwi abe acilongwe anguwe.—Tus. 22:6; Ef. 6:4.
13. Kweelana alugwalo lwa Bahebrayo 4:16, ino ndilili Jehova nayootugwasya? Amupandulule.
13 Mubuzyo wabili ngwakuti, ‘Sena inga kacisikide kale ciindi cakuti Jehova aingule kulomba kwangu?’ Tulakonzya kulimvwa kuti kulomba kwesu kwamuka kwiingulwa. Nokuba boobo, Jehova ulicizyi ciindi cibotu cakutugwasya. (Amubale Bahebrayo 4:16.) Ikuti tiitwapegwa cintu ncotulomba mpoonya-mpoonya, tulakonzya kuyeeya kuti Jehova tayandi buya kutupa. Pele ambweni inga ciindi cakwe tacinasika. Mucikozyanyo, amuyeeye mukwesu uucili mwana iwakapaila kuti bulwazi bwakwe bupone. Ikuti Jehova naakamuponya camaleele, Saatani naakaamba kuti mukwesu ooyo wazumanana kumubelekela Jehova akaambo kakuti wakamuponya. (Job. 1:9-11; 2:4) Kuyungizya waawo, Jehova wakabikka kale ciindi nayakuponya malwazi oonse. (Is. 33:24; Ciy. 21:3, 4) Tatukonzyi kulangila kuponesyegwa camaleele kusikila cikasike ciindi eeco. Aboobo mukwesu ulakonzya kulomba Jehova kuti amupe nguzu alimwi aluumuno lwamumizeezo kutegwa acikonzye kuliyumya kubulwazi bwakwe akuzumanana kumubelekela cakusyomeka.—Int. 29:11.
14. Ncinzi ncotwiiya kucakuluula camucizyi Janice?
14 Amuyeeye cikozyanyo camucizyi Janice iwakali kupailila kuyoobelekela ku Beteli. Kwakainda myaka yosanwe kutegwa amvwisye Jehova mbwaakawiingula mupailo wakwe. Wakaamba kuti: “Jehova wakabelesya ciindi eciya kundiyiisya zintu zinji alimwi akundigwasya kutegwa ndibe Munakristo uuli kabotu. Lusyomo lwangu mulinguwe lwakeelede kukomena. Ndakeelede kwiiya kubala Bbaibbele cakulomya alimwi akuzyiba kuti ndilakonzya kujana lukkomano kufwumbwa nkondikonzya kumubelekela.” Mukuya kwaciindi, mucizyi Janice abalumi bakwe bakatambwa kubeleka mubbazu. Alanga musyule, mucizyi Janice waamba kuti: “Jehova wakayiingula mipailo yangu, pele munzila njondatakali kuyeeyela. Cakanditolela ciindi kutegwa ndibubone bubotu bwabwiinguzi bwakwe. Pele ndilalumba kapati akaambo kacoolwe eeci ncondijisi cakubona luyando lwakwe alimwi aluzyalo.”
Ikuti kamulimvwa kuti Jehova tawiinguli mupailo wanu, amucince zintu nzyomupailila (Amubone muncali 15)f
15. Nkaambo nzi zimwi ziindi ncotuteelede kuzyaamba buya cacigaminina zintu nzyotupailila? (Amubone azifwanikiso)
15 Mubuzyo watatu ngwakuti, ‘Sena ndeelede kucinca ncondipailila?’ Masimpe kuti tweelede kuzyaamba buya cacigaminina zintu nzyotupailila. Pele zimwi ziindi, cilayandika kapati kutacita oobo kutegwa tucikonzye kuzyiba Jehova ncayanda kulindiswe. Amubone cikozyanyo camucizyi uutakwetwe uupailila kunjila Cikolo Cabakambausi ba Bwami. Inga kayanda kunjila cikolo eeci kutegwa akabelekele kubusena kubulide. Aboobo ciindi naazumanana kupailila kunjila cikolo eeci, ulakonzya alimwi kumulomba Jehova kutegwa amugwasye kubona mbazu zimwi mwakonzya kuyungizya mulimo wakwe. (Mil. 16:9, 10) Amana kulomba, ulakonzya kubuzya mulangizi wabbazu naa kuli mbungano iili munsi-munsi iiyandika bapainiya. Naa ulakonzya kulembela kuofesi yamutabi kubuzya naa kuli kuyandika basikumwaya ba Bwami.e
16. Ndusyomo nzi ndotukonzya kuba aandulo?
16 Mbubwenya mbotwaiya, tulakonzya kuba alusyomo lwakuti Jehova uyooyiingula mipailo yesu munzila yaluyando alimwi yabululami. (Int. 4:3; Is. 30:18) Zimwi ziindi, takonzyi kutwiingula munzila njotuyeeyela. Nokuba boobo, tuli masimpe kuti Jehova uyakuyiingula mipailo yesu. Kayi ulatuyanda kapati alimwi kunyina nayakutulekelezya pe. (Int. 9:10) Aboobo, amuzumanane ‘kumusyoma ziindi zyoonse,’ akumwaambila zyoonse zili kumoyo wanu.—Int. 62:8.
LWIIMBO 43 Mupailo Wakulumba
a Mucibalo eeci, tulalanga-langa twaambo ncotukonzya kuba masimpe kuti Jehova lyoonse uyooyiingula mipailo yesu munzila yaluyando alimwi yabululami.
b Mazina amwi acincwa.
c Amubone cibalo cakuti “Sena Mulasyoma Kuti Jehova Lyoonse Ucita Ziluzi?” mu Ngazi Yamulindizi ya February 2022, munc. 3-6.
d Kutegwa mujane makani manji kujatikizya Jehova mbwatugwasya kuliyumya muziindi zikatazya, amweebelele kavidiyo kakuti Mupailo Ulatugwasya Kuliyumya a jw.org.
e Kutegwa mujane malailile kujatikizya mbomukonzya kubelekela mucilawo camutabi uumbi, amubone bbuku lyakuti, Bakamantene Mukucita Kuyanda kwa Jehova, cibalo 10, munc. 6-9.
f BUPANDULUZI BWAZIFWANIKISO: Bacizyi bobilo balapaila kabatanalembela ku Cikolo Cabakambausi ba Bwami. Mukuya kwaciindi, umwi watambwa pele umwi kunyina naatambwa. Muciindi cakuciindizya kutyompwa, mucizyi watatambwa wapaila kuli Jehova kutegwa amugwasye kubona zyoolwe zimbi zyakuyungizya mulimo wakwe. Mpoonya walemba lugwalo kuofesi yamutabi kubazyibya kuti ulilyaabide kuyoobelekela kubusena kubulide.