Malifalensi Aamu Kabbuku Kamuswaangano Wabuumi Amulimo Wesu
© 2023 Watch Tower Bible and Tract Society of Pennsylvania
JANUARY 1-7
MBONO IZILI MU JWI LYA LEZA | JOBU 32-33
Amubaumbulizye Aabo Bajisi Penzi Lyakulibilika
it-1 710
Elihu
Elihu tanaakali kusalulula, naa cakuupaika kupa kufwumbwa muntu zina lyabulemu. Wakalizyi kuti awalo, mbubwenya mbuli Jobu, wakali muntu wakazwa kubulongo alimwi akuti Singuzuzyoonse ngo Mulengi wakwe. Elihu tanaakajisi makanze aakumukonga Jobu, pele wakali kwaambaula anguwe cabulongwe akumwiita kubelesya zina lyakwe, cintu ncaatakacita Elifazi, Bilidadi, naa Zofari.—Job. 32:21, 22; 33:1, 6.
Sena Kulezya Kwabantu Mukubona Mbwakubona Jehova?
Tulakonzya kuba aluzyalo ikuti twazyiba kuti bakwesu abacizyi besu bayandwa babula nguzu akaambo kabukkale bumwi bukatazya—kuciswa, kukkala abanamukwasyi mbobatakombi limwi naa kulwana penzi lyakutyompwa. Andiswe inga twaakulijana mubukkale buli boobu bumwi buzuba. Kabatananjila mu Nyika Yakasyomezyedwe, bana Israyeli bakaambilwa kugwasya banabokwabo ibakali bacete, ibatakajisi nguzu mucisi ca Egepita kuti tiibakeelede ‘kuyumya myoyo yabo’ kugwasya bapengede. Jehova wakali kulangila kuti kababalanganya bacete akubagwasya.—Dt. 15:7, 11; Lev. 25:35-38.
Muciindi cakubabeteka akubayeeyela bumbi, tweelede kubaumbulizya kumuuya aabo ibali mubukkale ibutali kabotu. (Job. 33:6, 7; Mt. 7:1) Mucikozyanyo, ciindi namutekenya iwalicisa muntenda yamumugwagwa naasika kucibbadela, sena basilisi basaanguna kuyanda kuzyiba naa ngowapa kuti ntenda icitike? Peepe, balamusilika cakufwambaana munzila iiyandika. Mbubwenya buyo, ikuti musyomima wabula nguzu akaambo kapenzi limwi, tweelede kusaanguna kumugwasya.—Amubale 1 Batesalonika 5:14.
Ikuti twayeeyesya kujatikizya bukkale bwa Munakristoma, tulakonzya kukubona munzila yeelede kulezya kwakwe. Amuyeeye buyo kujatikizya bacizyi ibaliyumya kukukazyigwa abanamukwasyi kwamyaka minji. Bamwi inga baboneka kubula nguzu, nokuba boobo sena tabatondezyi kuti balijisi lusyomo akuti balaliyumya? Ciindi nomubona muzyali uuli alikke kaboola kuswaangana amwana naa abana bakwe, sena tacimukkomanisyi kubona lusyomo ndwajisi alimwi amakanze aakwe? Alimwi mbuti kujatikizya ibakubusi ibazumanana mukasimpe nokuba kuti balayungwa kucikolo? Cakulibombya, tulababona kuti aabo ibalibonya kubula nguzu balakonzya kuba “bavwubi mulusyomo” mbuli bamwi akati kesu ibali mubukkale bulombozyeka.—Jak. 2:5.
Ndilili Noceelela Kwaambaula?
Mwaalumi wane iwakaswaya Jobu ngu Elihu, iwakali munamukwasyi wa Abrahamu. Wakali kuswiilila ciindi Jobu alimwi abaalumi bambi botatwe nobakali kwaambaula. Kweelede kuti wakalibikkilide maano kuzintu nzyobakali kwaamba nkaambo wakapa lulayo iluli kabotu pele ilugaminide, ilwakagwasya Jobu kuyeeya munzila iiluzi. (Job. 33:1, 6, 17) Ncaakali kuyandisya kapati Elihu, nkusumpula Jehova, kutali nguwe naa muntu uumbi buyo. (Job. 32:21, 22; 37:23, 24) Cikozyanyo ca Elihu cituyiisya kuti kuli ciindi cakuumuna akuswiilila. (Jak. 1:19) Cimbi ncotwiiya ncakuti ciindi notupa lulayo, kaambo kapati ikeelede kutupa kucita boobo, nkuleta bulemu kuli Jehova, ikutali kulindiswe.
Tulakonzya kutondezya kuti tulalumba kapati kucipego cakwaambaula kwiinda mukutobela lulayo lwamu Bbaibbele kujatikizya ciindi notweelede kwaambaula alimwi ambotweelede kwaambaula. Mwami musongo Solomoni wakasololelwa kulemba kuti: “Mbuli maapele aangolida mumbale zyansiliva, mbolibede jwi lyaambwa aciindi ceelede.” (Tus. 25:11) Ikuti twaswiilila kuli nzyobaamba bamwi alimwi akuyeeya katutanaambaula, majwi eesu alakonzya kuba mbuli maapele aayo aangolida, nkokuti aayandika kapati alimwi mabotu. Mpoonya nokuba kuti tulaambaula kapati naa aasyoonto, majwi eesu ayoobayaka bamwi, alimwi Jehova uyootukkomanina. (Tus. 23:15; Ef. 4:29) Eelo kaka eeyi ninzila mbotu yakutondezya kulumba kucipego eeci ncaakatupa Leza!
Mbono Zyakumuuya
Amuzumanane Kuswena Kuli Jehova
Mbubwenya buyo, cili kabotu kubikkila maano mbotuboneka. Pele tatweelede kuciindizya mukusoleka kugwisya zitondezyo zyoonse zyakucembaala. Zitondezyo eezyo inga bwaba bumboni bwakusima, bulemu alimwi abubotu bwamukati. Mucikozyanyo, Bbaibbele lyaamba kuti: “Mutwe uuli amvwi munsini wabulemu, Ulajanwa munzila yabululami.” (Tus. 16:31) Mbombubo Jehova mbwatubona, alimwi tweelede kusoleka kulibona mbwatubona. (Amubale 1 Petulo 3:3, 4.) Aboobo, sena ncamaano kulibikka muntenda kwiinda mukuunka kucibbadela akwaandulwa naa kubelesya mafwuta naa misamu kutegwa katuboneka kabotu? “Lukondo lwa-Jehova” mbobubotu bwakasimpe ibumweka kuzwa mukati, taciko makani amyaka muntu njajisi naa buponi. (Neh. 8:10) Muunyika mpya buyo mulikke motuyakuba abuponi bubotu alimwi akuboneka kabotu mbuli mwana. (Job. 33:25; Is. 33:24) Notulindila ciindi eeco, kutondezya busongo bugwasya alimwi alusyomo ciyakutugwasya kukakatila kuli Jehova kumwi katububelesya kabotu bukkale mbotujisi lino.—1 Ti. 4:8.
JANUARY 8-14
MBONO IZILI MU JWI LYA LEZA | JOBU 34-35
Ciindi Nokulibonya Kuti Zintu Zibi Zicitikila Bantu Bali Kabotu
Ino Leza Ujisi Bube Buli Buti?
Lyoonse Leza ucita zintu ziluzi. Mane buya Bbaibbele lyaamba kuti: “Leza mwini-mwini takonzyi kucita bubi nokuceya, alimwi Singuzuzyoonse takonzyi kubisya pe!” (Jobu 34:10) Mbeta zyakwe zililuleme kweelana ambwaakaamba sintembauzyo ciindi naakaamba Jehova kuti: “Uyoobeteka bantu mubululami.” (Intembauzyo 67:4) Akaambo kakuti “Jehova ubona zili mumoyo,” takonzyi kweenwa abusikuupaupa ameso, pele lyoonse ulakonzya kuzyiba masimpe alimwi akubeteka munzila iiluzi. (1 Samuele 16:7) Kunze lyaboobo, Leza ulaibona micito yoonse iitaluleme amakulo aacitika munyika, alimwi usyomezya kuti ino-ino “babi bayoonyonyoonwa munyika.”—Tusimpi 2:22.
Ino Ncinzi Ciyoomana Bwaakuboola Bwami bwa Leza?
Ino ncinzi ncayoocita Jehova? Lino Jehova wabapa ciindi cakuti bantu babi bacince. (Is. 55:7) Umwi aumwi wabo tanabetekwa akupegwa mulandu. Bweende bwazintu oobu mbobwakabetekwa kale. Pele ino mbuti kujatikizya baabo batayandi kucinca, balo ibazumanana kusumpula bweende bwazintu oobu kuti buzumanane kusikila kumatalikilo aamapenzi mapati? Jehova wakasyomezya kunyonyoona bantu babi anyika. (Amubale Intembauzyo 37:10.) Bantu babi balakonzya kuyeeya kuti tabakanyonyoonwi. Bantu banji balasisa nzyobacita, aboobo munyika eeyi balibonya mbuli kuti balicenjede nkaambo balazyeeleba zisubulo. (Job. 21:7, 9) Nokuba boobo, Bbaibbele litwaambila kuti: “Meso aa Leza alalanga nzila zyamuntu, alimwi ulazibona ntaamu zyakwe zyoonse. Kunyina mudima nouba musinze uusiya mbi nkobakonzya kuyuba basimucita zibi.” (Job. 34:21, 22) Tatukonzyi kumuyuba Jehova Leza pe. Kunyina silweeno uukonzya kumufwubaazya; kunyina mudima uusiya naa usiiyisya uukonzya kulesya meso aa Leza alo aabona kuli koonse kutegwa ataboni bwini twaambo mbotubede. Mpoonya yaakumana Amagedoni tuyoolanga nkobakabede babi, pele tatukababoni pe. Tabanooliko kukabe kutamani!—Int. 37:12-15.
Sena Muyoolebwa Akaambo ka Jesu?
Sena tulalibona penzi eeli amazuba aano? Inzya. Bantu banji mazuba aano tabatuyandi nkaambo tatutoli lubazu mumapolitikisi. Bayanda kuti katuvwoota. Nokuba boobo, kuti twasala mweendelezi muntunsi kuba mweendelezi wesu, nkokuti twamukaka Jehova. (1Sam. 8:4-7) Kuyungizya waawo, bantu banji balimvwa kuti tweelede kuyaka zikolo alimwi azibbadela kutegwa tugwasye banamaleya. Balaukaka mulumbe wesu nkaambo tubikkila kapati maano kumulimo wakukambauka, muciindi cakujana nzila yakumana mapenzi ngobajisi bantu.
Ncinzi ncotweelede kucita kutegwa tutalebwi? (Amubale Matayo 7:21-23.) Cintu cipati ncotweelede kubikkila maano nkucita mulimo ngwaakatulailila kucita Jesu. (Mt. 28:19, 20) Tatweelede kunyonganyizigwa atwaambo twamapolitikisi twamunyika. Tulabayanda bantu akulibilika kujatikizya mapenzi aabo, pele tulizyi kuti nzila mbotu yakubagwasya nkwiinda mukubayiisya kujatikizya Bwami bwa Leza alimwi akubagwasya kuba acilongwe a Jehova.
Mbono Zyakumuuya
Muuya Wanu Wakulisungula Aumutembaule Jehova!
Jehova kunyina naakamululamika Elihu akaambo kakubuzya kuti: “Ikuti naa yebo uliluleme, ino ncinzi ncomupa walo [Leza]; ino ncinzi ncatambula kuzwa kulinduwe?” (Job. 35:7) Sena Elihu wakali kupandulula kuti kusolekesya kwesu nkotucita mumulimo wa Leza takugwasyi? Peepe. Ncaakali kwaamba ncakuti, Jehova taponeni aabukombi bwesu. Jehova tabulide cintu cili coonse pe. Kunyina ncotukonzya kucita icikonzya kumupa kuti aindile kuvwuba naa kuba anguzu. Muciindi caboobo, bubotu boonse mbotujisi, luzyibo ndotujisi naa nguzu nzyotujisi, twakapegwa buya kuli Leza alimwi ulabona mbotuzibelesya.
JANUARY 15-21
MBONO IZILI MU JWI LYA LEZA | JOBU 36-37
Kaambo Ncomukonzya Kusyoma Cisyomezyo ca Leza ca Buumi Butamani
Sena Inga Twamujana Ncobeni Leza?
BUUMI BWA LEZA BUTAMANI: Ibbaibbele liyiisya kuti Leza nkwali “kuzwa lili alili mane kukabe kutamani.” (Intembauzyo 90:2) Munzila imwi, inga twaamba kuti Leza tajisi matalikilo alimwi tajisi mamanino. Kweelana akuyeeya kwabantu, “mweelwe wamyaka yakwe tuukonzyi kuzyibwa pe.”—Jobu 36:26.
Mbomugwasyigwa: Leza usyomezya kumupa buumi butamani ikuti naa mwamuzyiba ncobeni. (Johane 17:3) Ino cisyomezyo eeci inga caba buti camasimpe ikuti naa Leza lwakwe taponi kukabe kutamani? Alikke “Mwami walyoonse alyoonse” nguukonzya kuzuzikizya cisyomezyo eeci.—1 Timoteyo 1:17.
Sena Mulalumba Kuzipego Nzyaakatupa Leza?
Maanzi takonzyi kuba caanda akaambo kakuti zuba talili kulamfwu kapati anyika. Ikuti zuba nolyali aafwaafwi kapati anyika, maanzi oonse naali kuyuminina alimwi nyika nobwali busena bupya kapati ibutajisi cintu cipona. Ikuti zuba nolyali kulamfwu aasyoonto anyika, maanzi oonse naali caanda. Pele akaambo kakuti Jehova wakaibikka abusena bweelede nyika, water cycle ipa kuti buumi buzumanane kubako. Zuba nolyuumpa maanzi mulwaanje alimwi aanyika, maanzi alaunka mujulu akupanga makumbi. Amwaka, izuba lilabweza maanzi akkwana mazyiba aali 500,000, izyiba limwi alimwi kalilampa 1km mubulamfwu, mubwamba alimwi akuyaansi. Maanzi aaya alakkala mumulenga-lenga mazuba aali 10 kaatanapanga mvwula naa caanda. Mpoonya maanzi alajoka mulwaanje naa mumasena aambi mukkalila maanzi, mpoonya eeci cilacitika alimwi. Jehova wakapanga bubambe oobu kutegwa nyika lyoonse kaijisi maanzi. Eeci citondezya kuti Jehova musongo alimwi ulaanguzu.—Job. 36:27, 28; Muk. 1:7
Amuzumanane Kuyumya Bulangizi Bwanu bwa Bunakristo
Bulangizi bwesu bwabuumi butamani ncipego citaliboteli kapati kuzwa kuli Leza. Tulangila buumi bubotu kumbele, bwalo mbotusinizyide kuti buyoobako ncobeni. Buli mbuli ngobyo, iitugwasya kutegwa tucikonzye kuliyumya mumasunko, ciindi notupenzyegwa alimwi nociba ciindi notuyanda kujaigwa. Buli mbuli cimpoompo, cikwabilila mizeezo yesu kutegwa tukake zintu zibyaabi alimwi akukakatila kucintu ciluzi. Bulangizi bwesu ibuyeeme a Bbaibbele buyumya cilongwe cesu a Leza alimwi butondezya luyando ndwajisi kulindiswe. Tulagwasyigwa kapati ciindi notuzumanana kuyumya bulangizi bwesu.
Mbono Zyakumuuya
it-1 492
Mboyakali Kutumwa Milumbe
Milumbe yakali kutumwa kumuntu umwi aumwi munzila zisiyene-siyene kaindi muciindi camu Bbaibbele. Kanji-kanji, makani aamucisi mumwenya alimwi aakumasi aambi akali kupegwa kwiinda mukutumya mulomo. (2Sam. 3:17, 19; Job. 37:20) Basilweendo, kanji-kanji ibakali kweenda kabali nkamu bakali kwaamba kujatikizya zyakali kucitika kumasena aakulamfwu ciindi nobakali kwiimikila kuti bajane zyakulya, meenda alimwi azintu zimwi mumadolopo naa mumasena mobakali kwiinda. Akaambo kabusena bulibedelede nkocibede cisi ca Palestine, makamu aabasimakwebo ibakali kuunka akujoka kuzwa kumasena aakulamfwu mbuli ku Asia, Africa, alimwi amu Europe, boonse bakali kwiinda mucisi eeci. Aboobo bantu bamucisi eeci bakali kumvwa makani aajatikizya zyakali kucitika muzisi zimwi. Kuyungizya waawo, bakali kukonzya kwaamvwa makani aamucisi mumwenya alimwi aakumasi aambi kumusika.
AMUSUNGWAALE MUMULIMO WAMUMUUNDA
ijwfq 57 ¶5-15
Ncinzi Cakacitika Kuli Bakamboni ba Jehova Ciindi Cabweendelezi bwa Nazi?
Bakamboni ba Jehova bakali kupenzyegwa akaambo kakutobela njiisyo zyamu Bbaibbele. Ba Nazi nobakali kubasungilizya kuti bacite zintu nzyolikasya Bbaibbele, Bakamboni bakali kukaka. Bakali kusala “kumvwida Leza mbwali mweendelezi kutali bantu.” (Milimo 5:29) Amubone mbazu zyobilo mobakasala kucita oobo.
1. Kutatola lubazu mutwaambo twacisi. Mbubwenya mbuli Bakamboni bali muzisi zyoonse mazuba aano, Bakamboni ibakali kweendelezyegwa aba Nazi tiibakali kutola lubazu mutwaambo twacisi. (Johane 18:36) Aboobo, bakakaka
◼ Kunjila mulimo wabusikalumamba naa mulimo wakajatikizyidwe ankondo.—Isaya 2:4; Matayo 26:52.
◼ Kuvwoota naa kunjila tubunga twaba Nazi.—Johane 17:16.
JANUARY 22-28
MBONO IZILI MU JWI LYA LEZA | JOBU 38-39
Sena Mulajana Ciindi Cakulangilila Zilenge?
Sena Mulilibambilide Kulindila Kuti Jehova Abweze Ntaamu?
Ciindi nolipandulula Jehova mbwaakailenga nyika, Bbaibbele lyaamba mbwaakeenga “masimpilo aanjiyo,” mbwaakasimpa “misemu yanjiyo,” alimwi ambwaakayala “bbwe lyayo lyakukkona.” (Job. 38:5, 6) Mane buya wakajana ciindi cakwiilanga-langa milimo yakwe. (Matl. 1:10, 12) Amweezeezye buyo mbobakalimvwa bangelo ciindi nobakali kubona cintu cimwi acimwi cipya Jehova ncaakalenga. Kweelede kuti bakakkomana kapati! Nkaambo bakatalika “koompolola cakubotelwa.” (Job. 38:7) Ncinzi ncotwiiya? Cakatola myaka minji kuti Jehova alenge nyika, nyenyeezi azintu zyoonse zipona. Pele ciindi Jehova naakalanga zintu zyoonse nzyaakalenga cakubikkila maano, wakaamba kuti “nzibotu kapati.”—Matl. 1:31.
Bubuke Butondezya Luyando lwa Leza, Busongo Akukkazika Moyo
Kusaanguna, Jehova wakalenga Mwanaakwe, Jesu. Kwiinda mu Mwanaakwe ooyu, “zintu zimbi zyoonse zyakalengwa,” kubikkilizya abangelo. (Kol. 1:16) Jesu wakakkomana kapati kubeleka antoomwe a Bausyi. (Tus. 8:30) Abalo bangelo bakakkomana. Bakaliko ciindi Jehova alimwi a Jesu, Imubelesi Uucibwene, nobakalenga julu anyika. Ino bangelo bakatondezya buti kuti bakakkomana? ‘Bakatalika koompolola cakukondwa’ ciindi nyika noyakalengwa, alimwi tacidoonekwi buya kuti bakazumanana kumutembaula Jehova nobakabona zintu zimbi zyoonse nzyaakalenga, kwaambisya bantu. (Job. 38:7; Tus. 8:31, bupanduluzi buyungizyidwe) Cilenge cimwi acimwi citondezya luyando ndwajisi Jehova alimwi abusongo.—Int. 104:24; Rom. 1:20..
Amwiiye Zinji Kujatikizya Jehova Kwiinda Muzilenge Zyakwe
Tweelede kumusyoma Jehova. Wakamugwasya Jobu kuba alusyomo luyumu mulinguwe. (Job. 32:2; 40:6-8) Ciindi naakali kubandika a Jobu, Leza wakaamba kujatikizya zilenge zyakwe ziindene-indene, kubikkilizya anyenyeezi, makumbi alimwi andabo. Kuyungizya waawo, wakaamba zyabanyama mbuli mupoho wamusyokwe alimwi abbiza. (Job. 38:32-35; 39:9, 19, 20) Zintu zyoonse eezyi zitondezya kuti Leza ulijisi nguzu, ngusiluyando alimwi musongo kapati. Eelo kaka ooyu mubandi wakamugwasya kapati Jobu nkaambo wakayiya kusyoma Jehova cakumaninina! (Job. 42:1-6) Mbubwenya buyo, ciindi notwiiya kujatikizya zilenge, tulabona kuti Jehova musongo kapati alimwi ulaanguzu kwiinda ndiswe. Uyakwaamana mapenzi oonse ngotujisi. Kaambo aaka kalakonzya kuyumya lusyomo ndotujisi mulinguwe.
Mbono Zyakumuuya
it-2 222
Sikupa Mulawo
Jehova ngo Sikupa Mulawo. Jehova ngo Sikupa Mulawo alikke wamasimpe mububumbo boonse. Kulinguwe nkokuzwa milawo yeendelezya zilenge zitaponi (Job. 38:4-38; Int. 104:5-19), alimwi azipona. (Job. 39:1-30) Muntu, mbwaanga ncilenge ca Jehova, awalo uleendelezyegwa amilawo ya Jehova yeendelezya zilengwaleza. Alimwi mbwaanga ncilenge cilaamaano, icikonzya kuyeeya akucita zintu zyakumuuya, weelede kutobela zyeelelo zya Leza zyakulilemeka. (Rom. 12:1; 1Kor. 2:14-16) Kuyungizya waawo, milawo ya Jehova ileendelezya azilenge zyamuuya, nkokuti bangelo.—Int. 103:20; 2Pet. 2:4, 11.
Milawo ya Jehova yeendelezya zilengwaleza tiikonzyi kucincwa. (Jer. 33:20, 21) Munyika yoonse milawo yakwe ilasyomeka cakuti mumasena oomo basayaansi mobaizyi milawo eeyi, balakonzya kuzyiba mboweenda mwezi, mapulaneti, alimwi ambozikkede zintu zili mujulu munzila iiluzi. Muntu uutatobeli milawo yeendelezya zilengwaleza ulajana mapenzi mpoonya-mpoonya. Mbubwenya buyo, ikuti tiitwazitobela zyeelelo zya Leza zyakulilemeka tulakonzya kujana mapenzi nokuba kuti inga taalibonya mpoonya-mpoonya. “Leza takonzyi kufwubaazyigwa. Nkaambo kufwumbwa cintu muntu ncasyanga, ncencico eeco ncayootebula.”—Gal. 6:7; 1Tim. 5:24.
AMUSUNGWAALE MUMULIMO WAMUMUUNDA
lmd makani aayungizyidwe A kaambo 1
Buumi Bwakumbele
1. Zintu zicitika munyika alimwi abube bwabantu zitondezya kuti lino-lino zintu zilabota.—Mt. 24:3, 7, 8; Lk. 21:10, 11; 2Tim. 3:1-5.
JANUARY 29–FEBRUARY 4
MBONO IZILI MU JWI LYA LEZA | JOBU 40-42
Ziiyo Nzyotwiiya Kuli Zyakamucitikila Jobu
‘Ino Nguni Uuzyi Mbwayeeya Jehova?’
Tuzinzibala kuyeeya milimo njacita Jehova, tatweelede kuba acilengwa cakutongooka Leza akaambo kazyintu nzyobacita bantu. Cilengwa eeci cilaambwa mumajwi ngaakaamba Jehova aalembedwe ku Intembauzyo 50:21 aakuti: “Lino wakali kuyeeya kuti ndili mbuli nduwe.” Myaka iinda ku 175 yainda, umwi sikwiiya zyamu Bbaibbele wakaamba kuti: “Bantu bali acilengwa cakutongooka Leza akaambo kazyintu nzyobacita alimwi bayanda kuti Leza kabeendelezya kweelana ambobayanda.”
Tweelede kucenjela kutegwa Jehova tutamuboni kuti ulakonzya kucinca kweelana ambotuyanda. Ino nkaambo nzi ncotweelede kucenjelela? Nkaambo notubala Magwalo, milimo imwi ya Jehova inga twaibona mbuli kuti tailuzi pe akaambo kakuti tulalezya alimwi tatulondokede. Bana Israyeli bakaindi mbobakatalika kuyeeya oobo eelyo zyintu nzyaakabacitila Jehova bakazibona kuti tiizyakali kabotu pe. Amubone ncaakabaambila Jehova naakati: “Mulaamba kuti, Inzila ya-Mwami tiiluleme. Amuswiilile noluzubo lwa-Israyeli. Sa inzila yangu tiiluleme? Sa teensi inzila zyanu zitaluleme?”—Ezk. 18:25.
Icikonzya kutugwasya kuti tutamupi mulandu Jehova kweelana ambotuzibona zyintu, nkuzyiba kuti swebo tulalezya alimwi zimwi ziindi tulaimpya kapati mbotuzibona zyintu. Jobu wakeelede kukaziba kaambo aaka. Jobu naakali kupenga wakakopana kapati cakuti tanaakacizyiba ncaakali kupengela. Pele Jehova wakamugwasya. Wakatondezya kuti Jobu tanaakali kuzimvwisya zyintu naakamubuzya mibuzyo yiinda ku 70 eeyo Jobu njaakaalilwa kwiingula. Jobu wakalicesya mbokunga wakacinca mbwaakali kuyeeya.—Amubale Jobu 42:1-6.
Amubikkile Maano Kumakani Aayandika Kapati
Sena Jehova wakamucitila lunya Jobu kwiinda mukumupa lulayo lugaminide boobo kakuli wakazwide aakupenga citaambiki? Peepe alimwi Jobu awalo tanaakali kuyeeya boobo pe. Nokuba kuti wakapenga kapati, Jobu wakatalika alimwi kumulumba Leza. Mane buya wakaamba kuti: “Ndaajola majwi ngendaambide, ndeempwa mulusuko alimwi amumulota.” Jobu wakalimvwa boobo akaambo kalulayo lwa Jehova lugaminide pele ilukatalusya. (Job. 42:1-6) Leza katanabandika anguwe, Jobu alimwi wakapegwa lulayo lwakumululamika kuzwa kuli Elihu iwakali mwana-mwana. (Job. 32:5-10) Jobu naakakutambula kululamikwa kwa Leza alimwi akucinca mbwaakali kuzibona zintu, Jehova wakabatondezya bamwi mbwaakakukkomanina kusyomeka kwa Jobu mumasunko.—Job. 42:7, 8.
“Kolangila Jehova”
Jobu ngumwi wababelesi ba Jehova ibakatondezya busicamba alimwi akuyuma ciindi nobakali mumasunko mapati. Mulugwalo ndwaakalembela bana Hebrayo, mwaapostolo Paulo wakaamba abamwi banji kuti ‘ninkamu mpati yabakamboni.’ (Heb. 12:1) Boonse bakajana masunko aasiyene-siyene, nokuba boobo, bakazumanana kusyomeka kuli Jehova mubuumi bwabo boonse. (Heb. 11:36-40) Sena kuliyumya kwabo alimwi akubeleka canguzu kwakali kwabuyo? Peepe! Nokuba kuti ciindi nobakali kupona tiibaakubona kuzuzikizyigwa kwazisyomezya zya Leza zyoonse, bakazumanana kulangila Jehova. Alimwi akaambo kakuti bakalisinizyide kuti Jehova wakali kubakkomanina, bakali masimpe kuti bakali kuyoozibona zisyomezyo kazizuzikizyigwa. (Heb. 11:4, 5) Cikozyanyo cabo cilakonzya kutugwasya kuzumanana kulangila Jehova.
Mazuba aano tupona munyika iiyabwiindila buya kubija. (2Tim. 3:13) Saatani tanaleka kusunka bantu ba Leza. Aboobo, nokuba kuti tatwaazyi mapenzi aali kumbele, aabe makanze eesu kuzumanana kumubelekela Jehova kusikila mpotugolela, katusinizyide kuti “tubikkide bulangizi bwesu muli Leza uupona.” (1Tim. 4:10) Katuyeeya kuti, zilongezyo Leza nzyaakapa Jobu ncitondezyo cakuti “Jehova ulaalubomba kapati aluse.” (Jak. 5:11) Atuzumanane kusyomeka kuli Jehova, katusinizyide kuti uyoobapa bulumbu “aabo bamuyandaula cabusungu.”—Amubale Bahebrayo 11:6.
Mbono Zyakumuuya
it-2 808
Kufwubaazyigwa
Jobu wakali mwaalumi uululeme walo wakazumanana kusyomeka ciindi naakali kufwubaazyigwa. Pele wakatalika kuzilanga munzila iteelede zintu mane wakalubizya, aboobo wakalulamikwa. Elihu wakaamba boobu kujatikizya Jobu: “Ino nguni uumbi uuli mbuli Jobu, ooyo uulingunga masampu mbuli kuti maanzi?” (Job. 34:7) Jobu wakabikkila maano kuzintu nzyaakali kuyanda muciindi cakubikkila maano kuzintu nzyaakali kuyanda Leza, alimwi wakatalika kulibona mbuli kuti uliluleme kwiinda Leza. (Job. 35:2; 36:24) Ciindi naakali kufwubaazyigwa “abalongwe” bakwe botatwe, Jobu wakatalika kulwana mapenzi alikke muciindi cakwaawaalila kuli Leza. Akaambo kaceeci wakali mbuli muntu uulingunga masampu akwaakkomanina, kwaanywa mbuli muntu uunywa meenda kumwi kakkomene. Kumbele Leza wakamupandulwida Jobu kuti basikufwubaazya mubwini bakali kwaamba zyakubeja kujatikizya Leza. (Job. 42:7) Mbubwenya buyo, Jehova wakaambila musinsimi Samuele ciindi bana Israyeli nobakali kuyanda mwami kuti: “Toli nduwe ngobakaka pe, pele ndime ngobakaka kuba mwami wabo.” (1Sam. 8:7) Alimwi Jesu wakaambila basikwiiya bakwe kuti: “Muyoosulwa amasi oonse akaambo kazina lyangu.” (Mt. 24:9) Kuyeeya zintu eezyi kulakonzya kupa Munakristo kuliyumya munzila yeelede kukufwubaazyigwa alimwi uyootambula bulumbu akaambo kakuliyumya kwakwe.—Lk. 6:22, 23.
AMUSUNGWAALE MUMULIMO WAMUMUUNDA
lmd makani aayungizyidwe A kaambo 2
Buumi Bwakumbele
2. Nyika tiikanyonyoonwi pe.—Int. 104:5; Muk. 1:4.
FEBRUARY 5-11
MBONO IZILI MU JWI LYA LEZA | INTEMBAUZYO 1-4
Amusale Bwami bwa Leza
“Ndiyoozungaanya Zisi Zyoonse”
Ino bantu bautambula buti mulumbe ooyu? Bantu banji balaukaka. (Amubale Intembauzyo 2:1-3.) Masi alinyemede. Tabayandi kuzumina Mweendelezi wakasalwa a Jehova. Mulumbe wa Bwami ngotukambauka tabauboni kuti “makani mabotu.” Mane buya, mfwulumende zimwi zyaulesya mulimo wesu wakukambauka. Nokuba kuti bunji bwabeendelezi bamfwulumende eezyi balitaminina kukomba Leza, tabayandi kuleka kweendelezya. Aboobo mbubwenya mbuli beendelezi bamumazuba aa Jesu, beendelezi bamazuba aano balamukazya Munanike wa Jehova kwiinda mukulwana basikumutobela basyomeka.—Mil. 4:25-28.
Amuzumanane Kutatola Lubazu Mutwaambo Twacisi Munyika Eeyi Iitakamantene
Kuyandisya zintu zyakumubili. Ciindi mali azintu nzyotujisi noziba zintu ziyandika kapati kulindiswe, cilakonzya kutukatazya kapati kuzumanana kutatola lubazu mutwaambo twacisi. Nowakainda mwaka wa 1970, Bakamboni banji mucisi ca Malawi bakeelede kusala kusweekelwa zintu zyoonse nzyobakajisi akaambo kakuti bakakaka kuyanzana akabunga kabasitwaambo twacisi. Cuusisya ncakuti, bamwi tiibakayanda kubusiya buumi bubotu mbobakali kupona. Mucizyi umwi utegwa Ruth ulayeeya izyakacitika, wakati: “Bamwi twakatija limwi kuzwa mucisi pele mukuyakwaciindi bakatalika kuyanzana akabunga kabasitwaambo twacisi akupiluka alimwi kucisi nkaambo tiibakalibambilide kuliyumya mumapenzi aamunkambi yabazangalisi.” Nokuba boobo, babelesi ba Leza banji tabali boobu pe. Tabatoli lubazu mutwaambo twacisi, nokuba kuti bajisi mali masyoonto naa basweekelwa zintu zyoonse nzyobajisi.—Bahebrayo 10:34.
Mbono Zyakumuuya
it-1 425
Buungu
Buungu nkakwa kajanika kubbaale naa kuwiiti. Nokuba kuti buungu bwaambidwe mu Bbaibbele buli munzila yamaambilambali, butondezya butebuzi mbobwakali kucitwa muciindi cansiku. Bamana kutebula, buungu bwakali kubula mulimo nkaambo tabuligwi, aboobo bwakali kweelela kwiiminina cintu cuuba-uba, cinyina mulimo, alimwi citalombozyeki, cintu cakeelede kwaandaanizyigwa kucintu cibotu alimwi icakali kuyandika kusoogwa.
Kusaanguna, basikuuma maila bakali kugwisya buungu. Mpoonya, bakali kwaapepulula kutegwa buungu buunke amuwo. Cikozyanyo eeci cipandulula Jehova mbwabagwisya basiluleyo akati kabantu bakwe alimwi akugwisya bantu babi amasi aakazya. (Job. 21:18; Int. 1:4; 35:5; Is. 17:13; 29:5; 41:15; Hos. 13:3) Bwami bwa Leza buyoopwayaula basinkondonyina kuba tuntu tusyoonto kapati cakuti bayoopepulwa mbuli buungu.—Dan. 2:35.
Buungu bwatakajisi mulimo bwakali kulundikwa akuumpwa kutegwa butaulukili kumaila alo aasalazyigwa kale. Mbubwenya buyo, Johane Mubbapatizyi wakasinsima kujatikizya lunyonyooko lwabakombi bakubeja. Jesu Kristo uyoobunganya maila, “pele buungu uyoobuumpa mumulilo uutakonzyi kuzimwa.”—Mt. 3:7-12; Lk. 3:17.
FEBRUARY 12-18
MBONO IZILI MU JWI LYA LEZA | INTEMBAUZYO 5-7
Amuzumanane Kusyomeka Tacikwe Makani Anzyobacita Bamwi
Kubala Bbaibbele Kulakonzya Kumugwasya Kuliyumya Mumapenzi
Sena kuli mulongwe naa munamukwasyi iwakamunyemya? Ikuti kacili boobo, mulakonzya kugwasyigwa kwiinda mukubala ncaakacita Mwami Davida iciindi mwanaakwe Abisalomu naakamunyemya, alimwi akusola kumunyanga bwami.—2Sam. 15:5-14, 31; 18:6-14.
(1) Kupaila. Kamutanatalika kubala cibalo, amumwaambile Jehova mbomulimvwide kujatikizya mbomwakeendelezyegwa munzila iitali kabotu. (Int. 6:6-9) Amumwaambile bwini mbomulimvwide. Mpoonya amumulombe Jehova kutegwa amugwasye kujana njiisyo izikonzya kumusololela ciindi nomuliyumya mubukkale oobo.
Amusinizye Kuti Nzyomusyoma Nkasimpe
Lusyomo lwesu lweelede kuti kaluyeeme aluyando Kristo ndwaakatondezya kubantu ba Leza. Nkaambo nzi? Mucikozyanyo, amweezeezye kuti musyominyoko, mwaalu naa mupainiya wacita cibi cipati. Mbuti kuti mukwesu naa mucizyi wamunyemya? Naa ambweni muntu umwi waba siluleyo, akutalika kwaamba kuti nzyotusyoma takali kasimpe. Ikuti zintu zili boobu zyacitika, sena muyoolebwa akuleka kubelekela Jehova? Ncotwiiya ncakuti: Kuti kamuyanda kuyumya lusyomo lwanu muli Leza kwiinda muzintu bantu bamwi nzyobacita muciindi cakubikkila maano kucilongwe canu a Jehova kumugama, lusyomo lwanu talukayumi. Mbomulimvwa kujatikizya Jehova alimwi abantu bakwe zilakonzya kumugwasya kuba alusyomo luyumu. Pele alimwi cilayandika kapati kubikkila maano kukwiiya Bbaibbele, kumvwisya nzyomwiiya alimwi akuvwuntauzya kutegwa musinizye kuti nzyomwiiya kujatikizya Jehova nkasimpe. Mweelede kusinizya nobeni kuti Bbaibbele lijisi kasimpe kajatikizya Jehova.—Rom. 12:2.
Jesu wakaamba kuti bamwi bakali kuyookatambula kasimpe “calukkomano,” pele lusyomo lwabo lwakali kuyooceya ciindi nobajana mapenzi. (Amubale Matayo 13:3-6, 20, 21.) Ambweni tiibakamvwisya kuti aabo batobela Jesu balakonzya kujana mapenzi. (Mt. 16:24) Ambweni bakali kuyeeya kuti kuba Munakristo cakali kwaamba kuti kunyina nobakonzya kuba amapenzi naa kuti lyoonse Leza unakwaagwisya mapenzi aabo. Pele munyika eeyi mbyaabi, mapenzi anooliko. Bukkale bwesu bulakonzya kucinca akupa kuti lukkomano lwesu lumane.—Int. 6:6; Muk. 9:11.
Mbono Zyakumuuya
it-1 995
Cuumbwe
Kulugwalo lwa Baroma 3:13, mwaapostolo Paulo wakazubulula majwi aali ku Intembauzyo 5:9, kakozyanisya goyooyo lyabasizibi alimwi abantu bampelenge ‘kucuumbwe cijalukide.’ Mbuli cuumbwe cijalukide ceelede kuzula bantu bafwide alweeno, igoyooyo lyabo lilajaluka kutegwa baambe majwi aajaya alimwi aalweeno.—Amweezyanisye Mt. 15:18-20.
FEBRUARY 19-25
MBONO IZILI MU JWI LYA LEZA | INTEMBAUZYO 8-10
“O Jehova, Ndilakutembaula”!
Amucikkomanine Coolwe Cakuba Mumukwasyi wa Jehova
Jehova wakatupangila munzi uulibedelede. Katanalenga muntu wakusaanguna, Jehova wakabambila bantu nyika. (Job. 38:4-6; Jer. 10:12) Akaambo kakuti ulaaluzyalo alimwi mwaabi, Jehova wakalenga zintu zinji zibotu kutegwa katukkomana. (Int. 104:14, 15, 24) Aciindi cimwi, wakalanga zintu nzyaakalenga ‘akubona kuti nzibotu.’ (Matl. 1:10, 12, 31) Wakatondezya kuti ulabayanda bantu kwiinda mukubapa “kweendelezya” zilenge zyakwe zibotu zyaanyika. (Int. 8:6) Makanze aa Leza ngakuti bantu balondokede kabakkomene kulanganya zilenge eezyi mane kukabe kutamani. Sena mulamulumba Jehova lyoonse akaambo kacisyomezyo eeco cibotu?
Sena Mulalumba Kuzipego Nzyaakatupa Leza?
Inzila imwi mbotukonzya kutondezya kuti tulalumba kucipego cakwaambaula, nkwiinda mukubapandulwida aabo ibasyoma njiisyo yakusanduka ikaambo ncotusyomena kuti Leza ngowakalenga zintu zyoonse. (Int. 9:1; 1Pet. 3:15) Aabo ibasumpula njiisyo eeyi bayanda kuti swebo tusyome kuti nyika alimwi azintu zyoonse zyuumi tiizyakalengwa buya. Kwiinda mukubelesya Bbaibbele atwaambo tumwi ntotwabandika mucibalo eeci, tulakonzya kumwiiminina Taateesu wakujulu akubapandulwida aabo ibalibambilide kuswiilila kaambo ncotusinizyide kuti Jehovah ngo Mulengi wajulu alimwi anyika.—Int. 102:25; Is. 40:25, 26.
Sena Muli ‘Cikozyanyo Cibotu Mukwaambaula’?
Amwiimbe kuzwa ansi aamoyo wanu. Ciindi notwiimba nyimbo zya Bwami, makanze eesu ayelede kuba aakutembaula Jehova. Mucizyi Sara ulimvwa kuti tali mwiimbi uucibwene. Pele ulayanda kutembaula Jehova kwiinda mukwiimba. Aboobo ubona kuti cilagwasya kulibambila nyimbo kuŋanda mbubonya mbwalibambila zibeela zimwi zyamiswaangano. Ulaziimba kuŋanda alimwi akusola kubikkila maano kubona majwi aali munyimbo mbwaayendelana amakani aabandikwa. Wakaamba kuti: “Eeci cilandigwasya kubikkila maano kumajwi aali munyimbo ikutali mbondiimba.”
Mbono Zyakumuuya
it-1 832
Munwe
Munzila yamaambilambali, Leza waambwa kuti wakazuzikizya milimo yakwe, mbuli kulemba Milawo iili Kkumi amabwe aapapalete (Kul. 31:18; Dt. 9:10), kucita maleele (Kul. 8:18, 19), alimwi akulenga majulu (Int. 8:3) kwiinda mukubelesya “munwe,” naa minwe yakwe. Bumboni bwakuti “minwe” ya Leza, nkokuti muuya uusalala naa nguzu nzyabelesya yakabeleka ciindi naakali kulenga bubumbo, bulaambidwe mubbuku lya Matalikilo ilyaamba zyakulenga. Cibalo eeci caamba kuti nguzu zya Leza (ruʹach, “muuya”) zyakali kweendeenda atala aamaanzi. (Matl. 1:2) Nokuba boobo, Magwalo aa Banakristo aa Chigiriki alagwasya kumvwisya mwaambo ooyu wamaambilambali ciindi Matayo napandulula kuti Jesu wakatanda madaimona kwiinda mukubelesya ‘Muuya uusalala wa Leza,’ mpoonya Luka walo utwaambila kuti wakabelesya “munwe wa Leza.”—Mt. 12:28; Lk. 11:20.
AMUSUNGWAALE MUMULIMO WAMUMUUNDA
Amumugwasye Sikwiiya Kucileka Kuyoowa
Sena mulayeeya mbomwakayoowede kuba umwi wa Bakamboni ba Jehova? Ambweni mwakali kuyeeya kuti inga tiimwacikonzya kukambauka kubuleya. Naa ambweni mwakali kuyoowa kuti balongwe naa banamukwasyi balakonzya kumukazya. Kuti mbomwakali kulimvwa oobo, mulakonzya kumumvwisya sikwiiya Bbaibbele wanu. Jesu wakaamba kuti bantu bamwi bakali kuyooba abuyoofwu buli boobu. Nokuba boobo, wakakulwaizya basikumutobela kuti tiibakeelede kulekela buyoofwu kubalesya kubelekela Jehova. (Mt. 10:16, 17, 27, 28) Mbuti Jesu mbwaakagwasya basikumutobela kuzunda buyoofwu bwabo? Alimwi mbuti mbomukonzya kutobela cikozyanyo cakwe?
Asyoonto-syoonto amumugwasye sikwiiya kutalika kwaambila bamwi nzyasyoma. Kweelede kuti basikwiiya ba Jesu bakali kulibilika ciindi naakabatuma kuyookambauka. Pele Jesu wakabagwasya kwiinda mukubaambila nkobakeelede kukambaukila alimwi amulumbe ngobakeelede kukambauka. (Mt. 10:5-7) Mbuti mbomukonzya kumwiiya Jesu? Amumugwasye sikwiiya kuzyiba nkwakonzya kukambaukila. Mucikozyanyo, amumubuzye naa kuli muntu ngwazyi uukonzya kugwasyigwa kuzyiba kasimpe kamwi kamu Bbaibbele. Mpoonya amumugwasye kulibambila mbwakonzya kwaamba kwiinda mukumutondezya nzila iitakatazyi yakwaambila bamwi kasimpe aako. Kuti kacikonzyeka, mulakonzya kucita citondezyo anguwe kubelesya nzila zyaambidwe ansi aakatwe kamakani kakuti “Bamwi Baamba Kuti” alimwi akakuti “Umwi Inga Wabuzya Kuti,” ituli mubbuku lya Amupone Kukabe Kutamani! Mwamana, amumugwasye sikwiiya kubona mbwakonzya kubelesya Bbaibbele kwiingula munzila nguba-uba acabupampu.
Amumugwasye sikwiiya kusyoma Jehova. Jesu wakaambila basikwiiya bakwe kuti Jehova wakali kuyoobagwasya nkaambo wakali kubayanda. (Amubale Matayo 10:19, 20, 29-31.) Amumwaambile sikwiiya wanu kuti Jehova uyoomugwasya awalo. Mulakonzya kumugwasya kusyoma Jehova kwiinda mukupaila anguwe kujatikizya mbaakani zyakwe. Mukwesu Franciszek uukkala ku Poland, wakaamba kuti: “Bayi bangu kanji-kanji bakali kuzibikkilizya mbaakani zyangu mumipailo. Nindakabona Jehova mbwaakali kwiingula mipailo yabo, cakufwambaana ndakatalika kupaila. Ndakabona Jehova mbwaakali kundigwasya lyoonse ciindi nondakali kulomba kuti mazuba amwi kanditabeleki kutegwa kandijanika kumiswaangano yambungano alimwi akumuswaangano wacooko.”
Jehova ulababikkila maano kapati basikwiiya Bbaibbele. Ulalumba kubeleka canguzu nkobacita bamayi Banakristo ikugwasya bantu kuba acilongwe anguwe, alimwi ulabayanda kapati. (Is. 52:7) Kuti kamutajisi ciiyo ca Bbaibbele lino, mulakonzya kugwasya basikwiiya Bbaibbele kweelela kubbapatizyigwa kwiinda mukuunka abasikumwaya bambi kuziiyo zyabo.
FEBRUARY 26–MARCH 3
MBONO IZILI MU JWI LYA LEZA | INTEMBAUZYO 11-15
Amweezyeezye Kuti Muli Munyika Mpya ya Leza Yaluumuno
Twaambo Tupati-Pati Kuzwa Mubbuku Litaanzi lya Intembauzyo
11:3—Mmisemo iili yanyonyoonwa? Eeyi mmisemo aawo aayeme ciinga cabantu—mulawo, luumuno, abululami. Ikuti eezi zyanyonganizyigwa, kulaba manyongwe alimwi akutalulama. Mubukkale buli boobu, kufwumbwa “muntu uululeme” weelede kusyoma muli Leza cakumaninina.—Intembauzyo 11:4-7
Sena Cilakonzyeka Kuba Anyika Iinyina Bugwebenga?
Ibbaibbele lisyomezya kuti ino-ino Leza uyoobugwisya bugwebenga munyika eeyi. Nyika eeyi iizwide bugwebenga iyoonyonyoonwa “mubuzuba bwalubeta abwalunyonyooko lwabantu basampaula Leza.” (2 Petro 3:5-7) Zigwebenga taakwe noziyoobapenzya limbi bantu. Ino inga twasinizya buti kuti Leza uyoobugwisya bugwebenga?
Bbaibbele lyaamba kuti, “kufwumbwa muntu uuyanda nkondo ulimusulide” Leza. (Intembauzyo 11:5) Mulengi uyandisisya luumuno alimwi abululami. (Intembauzyo 33:5; 37:28) Nkakaambo kaako takalekeli kuti bantu basinkondo bazumanane kupona kukabe kutamani.
Sena Mulilibambilide Kulindila Cakukkazika Moyo?
Nkaambo nzi Davida ncaakalibambilide kulindila cakukkazika moyo? Ulatupa bwiinguzi mulugwalo lwa Intembauzyo njiyona eeyo mwalo mwaakabuzya ziindi zyone kuti: “Kwaciindi cilamfwu buti?” Mboobu mbwaamba: “Pele mebo, ndisyoma muluyando lwako lutamani; moyo wangu ulakkomana amilimo yako yalufwutuko. Ndilaimbila Jehova, nkaambo wandileleka kapati.” (Int. 13:5, 6) Davida wakali kulusyoma luyando lwa Jehova lutamani. Wakali kulangila calukkomano kuciindi ncaakali kuyoofwutulwa, alimwi wakali kuyeeya kujatikizya Jehova mbwaakamweendelezya kabotu muziindi zyamusyule. Masimpe, Davida wakali kulimvwa kuti kulindila kwakwe takukabi kwabuyo pe.
Bwami Bwazuzikizya Kuyanda kwa Leza Anyika
Kukwabililwa. Kumamanino, majwi aakkomanisya aali mulugwalo lwa Isaya 11:6-9 ayakuzuzikizyigwa munzila yakumubili cakumaninina. Baalumi, bamakaintu, alimwi abana banakukwabilidwe munyika kufwumbwa nkobaunka. Taakwe cilenge cili coonse ciyakuyoosya ceenzinyina, abe muntu naa munyama. Amuyeeyele buyo ciindi mwaakubona nyika imunzi wesu, momukonzya kusaya naa kuyamba mumilonga, amulwizi; kukkwela malundu, alimwi akweendeenda munyika kamukwabilidwe cakumaninina. Alimwi masiku, tamukalibiliki cili coonse. Majwi aajanika mulugwalo lwa Ezekieli 34:25, ayakuzuzikizyigwa, kutegwa bantu ba Leza “bakakale cakuliiba munkanda akoona mucisaka.”
Mbono Zyakumuuya
Sena Mwakasandulwa?
Cuusisya ncakuti, tulizingulukidwe abantu bacita zyintu Paulo nzyaakaamba. Kulangilwa kuti bantu bali boobo babona kuti tacigwasyi pe kukakatila kuzyeelelo alimwi anjiisyo. Bamayi banji alimwi abazyali bazumizya bana kucita kufwumbwa ncobayanda. Alimwi babayiisya kuti muntu uuli woonse ulijisi lwaanguluko lwakulisalila cibotu acibi. Bantu bali boobo bayeeya kuti kunyina nzila muntu mwakonzya kuzyiba cintu ciluzi naa acitaluzi. Nobaba baabo balitaminina kuti mbakombi balimvwa kuti balaangulukide kucita kufwumbwa ncobayeeya kuti cililuzi, kakunyina kuyeeya kuti beelede kumvwida Leza alimwi amilawo yakwe. (Int. 14:1) Muuya uuli boobo ulakonzya kupa kuti Banakristo bakasimpe babe muntenda mpati. Bantu batajisi luzyibo balakonzya kuba amizeezo iili boobo kujatikizya bubambe bwakumuuya. Balakonzya kukaka kutobela bubambe bwambungano mane buya akutongooka kujatikizya cintu cili coonse kuti kabatacikkomanini. Ambweni balakonzya kuti kabatazumini kujatikizya lulayo ndolipa Bbaibbele mumakani aakulikondelezya, kubelesya Intaneti alimwi alwiiyo lwaatala.