[kuzwa kulumwensyi kuya kululyo] Ba Marcelo, ba Yomara, aba Hiver. Aumwi ujisi Bbaibbele lya Busanduluzi Bwanyika Mpya lyaci Spanish lyamabala aaboofwu
Bakalibonena Luyando Lwini-lwini
BA YOMARA bakkala antoomwe abanabakwabo basankwa bobilo, ba Marcelo aba Hiver, mumunzi musyoonto ku Guatemala. Ba Yomara bakatalika kwiiya Bbaibbele a Bakamboni, mpoonya mukuya kwaciindi, abalo banabakwabo bakatalika. Pele kwakali penzi limwi. Boonse botatwe mboofwu, alimwi tiibakali kukonzya kubala mabbuku aaboofwu. Aboobo, sikubayiisya Bbaibbele nguwakali kubabalila mincali amagwalo ciindi nobakali kwiiya.
Cintu cimbi icakali kubakatazya kapati nkujanika kumiswaangano yambungano. Tiibakali kukonzya kweenda balikke kuunka ku Ŋanda ya Bwami iyakali afwaafwi, ikwakali kweendwa maminiti aali 40. Pele bakwesu bamumbungano bakapanga bubambe bwakunoobatola kumiswaangano yoonse. Kumane ciindi boonse nobakatalika kupa zibeela zyabasicikolo lyamuswaangano wamukati kansondo, bakwesu bakali kubagwasya kutegwa baziswate zibeela zyabo.
Mu May 2019, miswaangano yambungano yakatalika kucitilwa mumunzi mobakali kukkala. Aciindi aawa, kwakali banabukwetene bapainiya baciindi coonse ibakalongela mumunzi ooyu. Banabukwetene aaba bakalibikkila mbaakani yakuyiisya ba Yomara, ba Marcelo aba Hiver kuti bacizyibe kubala akulemba mabala aaboofwu, nokuba kuti abalo tiibakacizyi pe. Aboobo, bakaunka ku library imwi kuyoobweza mabbuku aakali kwaamba kujatikizya mabala aaboofwu kutegwa bazyibe mbobakonzya kuyiisya bamwi.
Ba Marcelo batola lubazu ciindi camuswaangano wambungano
Mumyezi buyo misyoonto, ba Yomara, ba Marcelo aba Hiver bakacizyiba kubala mabbuku aaboofwu, alimwi eeci cakapa kuti bayaambele kumuuya cakufwambaana. Lino ba Yomara, ba Marcelo, aba Hiver mbapainiya baciindi coonse. Kuyungizya waawo, ba Marcelo mbakutausi. Boonse botatwe inga bajisi bubi kucita zintu zyakumuuya nsondo yoonse. Busungu mbobajisi mukubelekela Jehova bwapa kuti abamwi baiye cikozyanyo cabo cibotu.
Ba Yomara, ba Marcelo, aba Hiver balalumba kapati akaambo kalugwasyo lwabasimbungano. Ba Yomara bakaamba kuti: “Kuzwa ciindi cakusaanguna notwakabazyiba Bakamboni, batutondezya luyando lwini-lwini lwa Bunakristo.” Ba Marcelo bakayungizya kuti: “Twajana balongwe babotu kapati mumbungano, alimwi twaba cibeela cabunyina bwanyika yoonse icijisi bantu bakamantene alimwi bayandana.” Ba Yomara abanabakwabo baliyandide kuyoobona ciindi eeco Jehova nayoocinca nyika eeyi kuba paradaiso.—Int. 37:10, 11; Is. 35:5.