Kuyungizya Luzyibo Lwesu Mumulimo Wakukambauka​—Kukambaukila Boofwu

IKAAMBO NCOCIYANDIKA: Boofwu banji tabalimvwi kwaanguluka kubandika abantu mbobatazyi kabotu. Aboobo, kuyandika bupampu kutegwa tubakambaukile bantu bali boobu. Jehova ulababikkila maano kapati boofwu. (Lev. 19:14) Tulakonzya kwiiya cikozyanyo cakwe kwiinda mukubweza ntaamu yakubagwasya boofwu kuba balongwe ba Jehova.

MBOTUKONZYA KUCITA OOBO:

• ‘Amubayandaule’ boofwu. (Mt. 10:11) Sena kuli muntu ngomuzyi uujisi munamukwasyi moofwu? Sena mucilawo canu kuli zikolo, maanda mobakkala boofwu naa masena aambi mwalo mobanga bayanda mabbuku aakabambilwa boofwu?

• Amubabikkile maano. Ciindi nomutondezya kuti mulababikkila maano boofwu, ciyoopa kuti balimvwe kwaanguluka kubandika andinywe. Amusole kutalisya mubandi kwiinda mukubelesya makani ngobakkomanina bantu bakubusena oobo

• Amubagwasye kumuuya. Kutegwa igwasye bantu bataboni kabotu naa boofwu, mbunga yabamba mabbuku aapangidwe mumafomati aasiyene-siyene. Amumubuzye muntu ooyo mbwayanda kunakwiiya. Mulangizi wamulimo weelede kubona kuti mubelesi wamabbuku wabikkilizya mabbuku aali mufomati njaakalomba moofwu mufoomu yakulomba mabbuku.