Amubagwasye Boofwu Kwiiya Makani Aajatikizya Jehova
1. Ino Jesu wakalutondezya buti lubomba kubaalumi boofwu?
1 Kwakasyeede buyo mazuba masyoonto kuti Jesu ajaigwe. Naakali kuzwa mumunzi wa Jeriko, boofwu bobilo bakoongolola kabati: “Akaka Mwami, kotufwida luse!” Nokuba kuti Jesu wakalikatazyidwe mumizeezo akaambo kamapenzi aakali afwaafwi kumucitikila, wakaima akubaita baalumi aaba mpoonya wakabaponya. (Mt. 20:29-34) Ino inga twalwiiya buti lubomba ndwaakatondezya Jesu kuboofwu aaba?
2. Mbuti mbotukonzya kukambaukila muntu moofwu ngotwajana mubuleya?
2 Amube Bantu Ibagwasya: Ikuti mwajana muntu moofwu, ambweni mubuleya, amulipandulule mpoonya akumugwasya kuti kayandika lugwasyo. Mbwaanga bantu bali boobu kanji-kanji balaubaulwa, kumatalikilo muntu ulakonzya kuwayawaya kuzumina lugwasyo. Nokuba boobo, kumutondezya luyando lwini-lwini alimwi akumubikkila maano kulakonzya kupa kuti aanguluke. Alimwi kamuyeeya kuti boofwu buliindene, aboobo eeci cilakonzya kumugwasya kubona lugwasyo ndwayandika kupegwa muntu ooyo. Mwamana kumugwasya, ambweni mulakonzya kumwaambila kuti muli mumulimo wakuyiisya bantu Bbaibbele. Amumulombe kuti mumubalile lugwalo lomwe mbuli lwa Intembauzyo 146:8 naa Isaya 35:5, 6. Ikuti naa kakonzya kubala mabala aaboofwu, amumubuzye naa inga wayanda mabbuku aaboofwu aakonzya kumugwasya kwiiya Bbaibbele. Alimwi mulakonzya kumukkopela zyakalekkoodwa zyakuswiilila kuzwa a jw.org. Ikuti naa kkompyuta yakwe kaijisi pulogilamu iikonzya kubala zilembedwe, ambweni inga wakkomana kumupulintila zibalo zimwi zya jw.org antoomwe amabbuku aakonzya kukkopwa mufomati ya RTF (Rich Text Format).—Amubone kabbokesi kakuti “Ciindi Nomugwasya Muntu Moofwu . . . ”
3. Ino mbuti mbotukonzya kubayandaula boofwu mucilawo cesu?
3 Amubayandaule Boofwu: Bantu boofwu tatuvwuli kubajana ciindi notuli mumulimo wakuŋanda aŋanda nkaambo bunji bwabo tabalimvwi kwaanguluka kwaambaula abantu mbobatazyi ibasika aŋanda yabo. Aboobo, kuyandika kusolekesya canguzu ‘kubayandaula’ bantu aaba kutegwa tubakambaukile. (Mt. 10:11) Sena kuli mubelesinyoko naa sicikolonyoko moofwu? Amubweze ntaamu yakwaambaula anguwe. Ikuti mucilawo canu kakuli cikolo caboofwu, mulakonzya kubaabila mabbuku aaboofwu kutegwa baabikke mulaibbulali yacikolo. Sena kuli muntu ngomuzyi uujisi munamukwasyi moofwu? Sena mucilawo canu kuli mbunga izigwasyilizya boofwu naa kupa lugwasyo kumbunga zijisi maanda mobalela boofwu? Amumupandulwide munamukwasyi ooyo, sikutambula beenzu naa umwi wabapati-pati bambunga eeyo kuti Bakamboni ba Jehova baliyandide kapati kugwasya boofwu, alimwi amubasyomezye kuti muyoobatolela mabbuku aaboofwu naa izyakuswiilila zyakalekkoodwa. Amubatondezye cisyomezyo camu Bbaibbele cakuti ino-ino Leza uyoolimana cakumaninina penzi lyakoofwaala. Alimwi mulakonzya kumutondezya vidiyo iijanika a jw.org yakuti Without It, I Would Feel Lost, iyaamba kujatikizya mwaalumi moofwu iwagwasyigwa akaambo kakuba a Bbaibbele lyaboofwu. Kwiinda mukumupandulwida kaambo ncomwamuswaila, eeci inga cagwasya kuti mujane boofwu banji.
4. Ino cakuluula caba Janet cituyiisya nzi?
4 Mucizyi moofwu uutegwa Janet wakaswaya busena nkobakkala boofwu. Wakatalisya mubandi amusimbi umwi mukubusi. Ba Janet bakaambila musimbi ooyu kuti, “Jesu wakaponya bantu boofwu kutegwa atondezye nzyayoobacitila boofwu boonse kumbele.” Bakabala lugwalo lwa Ciyubunuzyo 21:3, 4, mpoonya ba Janet bakapandulula Bwami bwa Leza mbobuyoocizuzikizya cisyomezyo eeci. Musimbi ooyu wakaumuna asyoonto, mpoonya wakaamba kuti: “Tandinaamvwide makani aali boobu kaambwa amoofwu. Bunji bwabantu ibabona basyoma kuti bantu boofweede bali boobo akaambo kakuti kuli cibi ncobakacita balo naa bamasyaanyinakulu.” Ba Janet bakatumina musimbi ooyu bbuku lya Bbaibbele Ncoliyiisya, lino balaiya Bbaibbele amusimbi ooyu ziindi zyobilo ansondo.
5. Nokuba kuti tatukonzyi kubaponya boofwu mbuli Jesu mbwaakacita, ino kubabikkila maano inga kwaleta zilongezyo nzi?
5 Masimpe, tatukonzyi kubasilika boofwu mbuli Jesu mbwaakacita, pele tulakonzya kubagwasya boonse aabo bajisi mizeezo yakoofwaazyigwa aleza wabweende bwazintu obuno kubikkilizya abaabo boofweede ncobeni kuti bazyibe kasimpe kajanika mu Jwi lya Leza. (2Kor. 4:4) Jesu wakaponya baalumi bobilo munsi-munsi amunzi wa Jeriko nkaambo ‘wakeetezyegwa.’ (Mt. 20:34) Ikuti andiswe katubabikkila maano boofwu, tulakonzya kuba acoolwe cakubagwasya bamwi kwiiya makani aajatikizya Jehova walo uuyoomana penzi lyakoofwaala mane kukabe kutamani.