Mibuzyo Yabasikubala
Nkaambo nzi bantu bamwi ncobakonzya kwaamba kuti majwi aali ku Intembauzyo 12:7 “majwi aa Jehova,” (kapango 6) kakuli Bbaibbele lya Busanduluzi Bwanyika Mpya litondezya kuti majwi aaya aamba “bantu bapengede” (kapango 5)?
Mabala aayengelede atondezya kuti kapango aaka kaamba bantu.
Ku Intembauzyo 12:1-4, tubala kuti “bantu basyomeka baloba akati kabantu.” Mpoonya ku Intembauzyo 12:5-7, wakaamba kuti:
“‘Akaambo kakuti bantu bapengede baladyaamininwa,
Akaambo kakutongela kwabacete,
Ndilanyamuka akubweza ntaamu,’ mbwaamba Jehova.
‘Ndilabafwutula kuli baabo babasampaula.’
Majwi aa Jehova alasalala;
Ali mbuli nsiliva yasalazyigwa mubbibi lyamulilo lyabulongo, iisalazyidwe ziindi zili ciloba.
Yebo uyoobalinda, O Jehova;
Uyoomukwabilila umwi aumwi wabo kutalikila kuzyalani eeli mane kukabe kutamani.”
Kapango 5 kaamba Leza ncayoocita kubantu bapengede. Uyoobafwutula.
Kapango 6 kayungizya kuti “majwi aa Jehova alasalala,” ‘mbuli nsiliva yasalazyigwa.’ Eeci citondezya mbotulimvwa kujatikizya jwi lya Jehova.—Int. 18:30; 119:140.
Lino amubone kapango katobela, Intembauzyo 12:7 yaamba kuti: “Yebo uyoobalinda, O Jehova; uyoomukwabilila umwi aumwi wabo kutalikila kuzyalani eeli mane kukabe kutamani.” Ino bbala lyakuti “uyoobalinda” lyaamba bani?
Akaambo kakuti kapango 7 katobelwa amajwi aali mukapango 6 akuti “majwi aa Jehova,” ibamwi balakonzya kwaamba kuti majwi aakuti aamba Leza. Alimwi tulizyi kuti Leza wakalikwabilila Bbaibbele kuli basikukazya ibakali kusola kulyuumpa akulinyonyweeda limwi.—Is. 40:8; 1Pet. 1:25.
Pele masimpe kuti, Leza wakabalinda bantu baambidwe mukapango 5. Jehova wakabafwutula “bantu bapengede” abaabo ‘badyaaminidwe’ alimwi uyoozumanana kucita boobo.—Job. 36:15; Int. 6:4; 31:1, 2; 54:7; 145:20.
Aboobo, ino bbala lyakuti “uyoobalinda” ilili mukapango 7 lyaamba bani?
Kuti twaalangisya majwi aali muntembauzyo eeyi, ibbala lyakuti “uyoobalinda” lyaamba bantu.
Kumatalikilo a Intembauzyo 12:1, Davida wakali kwaamba “bantu basyomeka” ibakeenwa abantu babyaabi. Mpoonya, tujana kuti Jehova uyoobanyonyoona aabo baamba zintu zibyaabi. Sintembauzyo utusyomezya kuti tulakonzya kuba alusyomo lwakuti Leza uyoobakwabilila bantu bakwe nkaambo majwi aakwe alasalala.
Aboobo kapango 7 kaamba kuti Jehova uyoobakwabilila alimwi ‘akubalinda’ aabo badyaamininwa akaambo kabubi.
Ibbala lyakasandululwa kuti “uyoobalinda” lili mukapango aaka lyakabelesyegwa mumakkopi a Magwalo aa Chihebrayo. Ibbala lyakasandululwa kuti “swebo” lyakabelesyegwa ziindi zyobilo mukapango 7, mubusanduluzi bwakusaanguna bwa Magwalo aa Chihebrayo kuya mu Chigiriki, ikwaamba bantu bapengede alimwi abadyaaminidwe. Kapango 7 kamanizya kuti “umwi aumwi” wabantu aaba basyomeka uyookwabililwa “kutalikila kuzyalani eeli,” kuzwa kuli bantu basumpula bukkale bubi kapati. (Int. 12:7, 8) Kapango 7 mubusanduluzi bwa Chiaramu kaamba kuti: “Yebo O Mwami; uyoomukwabilila mululami, uyoomulinda kuzyalani eeli libyaabi mane kukabe kutamani. Bantu babi balalyeendela koonse-koonse, mbuli nzengene iiswiinta bulowa bwabantu.” Eeci cipa bumboni bwakuti Intembauzyo 12:7 tayaambi majwi aa Leza.
Aboobo kapango aaka, kapa bulangizi bwakuti Leza uyoobakwabilila “bantu basyomeka.”