Amuukake Muuya Wakuliyanda Uudumide Munyika Mazuba Aano
BANTU banji mazuba aano, bayanda kuti kabeendelezyegwa munzila yaalubazu alimwi akuba azyoolwe zimwi. Nociba ciindi nobeendelezyegwa kale munzila yaalubazu, bayeeya kuti beelede kuba azimbi ziinda waawo. Kuyeeya kuli boobu kuyeeme aakuliyanda akutalumba kwalo kutondezya kuti tuli kumazuba aakumamanino.—2Tim. 3:2.
Kwaamba masimpe, ikutondezya muuya wakuliyanda tacili cintu cipya pe. Adamu a Eva bakayanda kulisalila cibi acibotu calo cakapa kuti kube mapenzi. Myaanda yamyaka yakatobela, Mwami Uziya wa Juda wakayeeya kuti wakalijisi nguzu zyakuumpa tununkilizyo mutempele, pele kucita boobo cakalilubide kapati. (2Mak. 26:18, 19) Mbubwenya buyo, ba Farisi aba Saduki bakali kuyeeya kuti Leza wakeelede kubeendelezya munzila yaalubazu akaambo buyo kakuti bakali baluzubo lwa Abrahamu.—Mt. 3:9.
Tuzingulukidwe abantu baliyanda akulisumpula, aboobo andiswe tulakonzya kujatikizyigwa. (Gal. 5:26) Tulakonzya kutalika kuyeeya kuti tuleelela kutambula mukuli umwi naa kweendelezyegwa munzila yaalubazu. Mbuti mbotukonzya kutantamuka kuyeeya kuli boobu? Cakusaanguna, tweelede kuzyiba Jehova mbwaabona makani. Kuli njiisyo zyobilo zyamu Bbaibbele zikonzya kutugwasya.
Jehova nguusala ncotweelede kuba ancico. Atulange-lange zikozyanyo zimwi.
Mumukwasyi, mulumi weelede kulimvwa kulemekwa amukaintu wakwe, mpoonya mukaintu weelede kulimvwa kuyandwa amulumaakwe. (Ef. 5:33) Banabukwetene beelede kutondezyanya luyando. (1Kor. 7:3) Kumane bazyali beelede kuti bana babo kababamvwida, abalo bana beelede kulanganizyigwa akuyandwa abazyali babo.—2Kor. 12:14; Ef. 6:2.
Mumbungano, baalu beelede kulemekwa akaambo kakubeleka canguzu. (1Tes. 5:12) Nokuba boobo, tabeelede kubadyaaminina bakwesu abacizyi.—1Pet. 5:2, 3.
Leza wakapa mfwulumende zyabantu nguzu zyakuti kazibweza mitelo akulemekwa abantu mbozilela.—Rom. 13:1, 6, 7.
Caluyando, Jehova ulatupa zintu zinji kapati kwiinda ali zeezyo nzyotweelede. Akaambo kakuti tuli basizibi, tweelela buyo kufwa. (Rom. 6:23) Nokuba boobo, Jehova ulatupa zilongezyo zinji kapati akaambo kaluyando lwakwe lutamani. (Int. 103:10, 11) Kufwumbwa cilongezyo naa coolwe cili coonse ncotutambula kuzwa kulinguwe, ulatupa akaambo kaluzyalo lwakwe.—Rom. 12:6-8; Ef. 2:8.
MBOMUKONZYA KUWEELEBA MUUYA WAKULIYANDA AKULISUMPULA
Amuucenjelele muuya wanyika. Kakunyina kuzyiba, tulakonzya kutalika kuyeeya kuti tweelede kupegwa zinji kwiinda bamwi. Jesu wakatondezya kuyeeya kuli boobo mbokukonzya kutalika kwiinda mukubelesya cikozyanyo cababelesi ibakapegwa dinari. Babelesi bamwi bakatalika kubeleka mafwumofwumo akubeleka buzuba boonse kababalwa zuba, pele bamwi bakabeleka buyo kwamawoola masyoonto. Aboobo babelesi ibakatalika mafwumofwumo, bakali kuyeeya kuti bakeelede kupegwa mali manji akaambo kakuti balo bakabeleka buzuba boonse. (Mt. 20:1-16) Kwiinda mukwaamba cikozyanyo eeci, Jesu wakatondezya kuti basikumutobela beelede kukkutila acintu cili coonse Leza ncakonzya kubapa.
Bamaalumi ibakabeleka buzuba boonse bakali kuyeeya kuti bakeelede kupegwa mali manji
Amube bantu balumba akutalangila kupegwa zintu abamwi. (1Tes. 5:18) Amwiiye cikozyanyo ca Mwaapostolo Paulo, iwatakalomba bana Korinto kuti bamupe zintu nzyaakali kuyandika nokuba kuti wakalijisi nguzu zyakucita boobo. (1Kor. 9:11-14) Tweelede kulumba kuzintu nzyobatupa bantu akutalangila zinji.
Mwaapostolo Paulo tanaakali kulombelela mali
Amube bantu balicesya. Ikuti muntu kalibikkila buyo maano lwakwe mwini, kanji-kanji ulakonzya kutalika kuyeeya kuti weelede kupegwa zintu zinji. Pele kulicesya ngomusamu kukuyeeya ikutali kabotu kuli boobu.
Kulicesya kwamusinsimi Daniele kwakapa kuti ayandwe kapati a Jehova
Musinsimi Daniele ncikozyanyo cibotu camuntu iwakali kulicesya. Wakali kuzwa mumukwasyi iwakalaampuwo, wakali kulibonya kabotu, wakali musongo alimwi wakalijisi aluzyibo. Aboobo wakali kukonzya kulimvwa kuti wakali kweelela kweendelezyegwa munzila yaalubazu alimwi akuba azyoolwe nzyaakatambula. (Dan. 1:3, 4, 19, 20) Nokuba boobo, Daniele wakazumanana kulicesya alimwi bube oobu bwakapa kuti abe muntu uuyandwa kapati a Jehova.—Dan. 2:30; 10:11, 12.
Aboobo, atuukake muuya wakuliyanda akulisumpula uudumide munyika mazuba aano. Muciindi caboobo, atuzumanane kujana lukkomano azilongezyo zili zyoonse nzyatupa Jehova akaambo kaluzyalo lwakwe.