Tiibakaleka Kuswaangana Antoomwe

Ciindi coonse mulimo wesu nowakalesyedwe, mbungano zinji zyakazumanana kuswaangana antoomwe mumaanda aabakwesu kutegwa bakombe. Pele kutegwa bantu bambi batazyibi kuti balaswaangana, mbungano zinji tiizyakali kwiimba nyimbo zya Bwami. Masena amwi aakuswaanganina akali kubbukizyigwa abasimfwulumende, pele bunji bwaziindi bakwesu tiibakali kunyongana.

Ziindi zinji bakwesu bakali kubelesya kuswaangana kwamikwasyi naa mapobwe aabwiinga kuba ziindi zyakuba amiswaangano mipati. Ba Tagor Hutasoit bakapandulula kuti: “Banabukwetene bakali kulembya cikwati cabo akubweza pepa kumapulisa ilibazumizya kucita pobwe lipati lyabwiinga. Ciindi capobwe, basikukwatana bakali kukkalila kucibumbili eelyo bakwesu nobakali kupa makani aamu Bbaibbele aaindene-indene.”

Aamuswaangano umwi imupulisa umwi wakabaitila kumbali ba Hutasoit akubabuzya kuti:

“Micado minji itola buyo mawoola obilo naa otatwe. Ino nkaambo nzi micado yanu ncoitola ciindi cilamfwu, kuzwa kuseeni kusikila kumangolezya?”

Ba Hutasoit bakavwiila kuti: “Basikukwatana bamwi bajisi mapenzi manji, aboobo bayandika lulayo lunji lukonzya kubagwasya kuzwa mu Jwi lya Leza.”

Mupulisa wakagunya-gunya mutwe akwaamba kuti: “Kalalimvwisya kaambo aako.”

Kwiinda mukuyubila mumicado minji iyakacitilwa antoomwe mubuzuba bomwe, bakwesu bakabelesya ciindi eeco kubandika cibeela ca Muswaangano Wacooko wamu 1983 wakuti “Lukamantano lwa Bwami” mubbuwa lyakusobanina lipati lyamu Jakarta. Bakwesu abantu bajisi luyandisisyo ibatandila ku 4,000 bakajanika kumuswaangano ooyu, alimwi bantu ibali 125 bakabbapatizyigwa cakusisikizya kautanatalika muswaangano. Kumbele, mfwulumende noyakayozya-yozya kulesya mulimo wesu, bakwesu bakaba amiswaangano mipati kwiinda yooyu, kubikkilizya amuswaangano umwi ikwakajanika bantu bainda ku 15,000.

Kuyaka Ofesi Yamutabi Ciindi Mulimo Wesu Nowakalesyedwe

Kuma 1980 akuma 1990, ofesi yamutabi cakwiinduluka-induluka yakalomba mfwulumende kuti igusye mulawo iwakali kulesya mulimo wa Bakamboni ba Jehova. Bakwesu bamumasi aambi abalo bakalembela mfwulumende yacisi ca Indonesia alimwi abaiminizi bacisi eeci kubabuzya kaambo mulimo wa Bakamboni ba Jehova ncowakalesyedwe mucisi ca Indonesia. Balupati-pati banji bakali kuyanda kubaangulula Bakamboni, pele ziindi zinji nkumenkume zyamumbunga iitegwa Directorate General of Christian Community Guidance zyakali kubasinkilila.

Mu 1990, bakwesu bakabona kuti inga cakonzyeka kuyaka ofesi yamutabi mpya mubusena bumwi butazyibidwe abantu. Mumwaka ngomunya ooyu, ba Kabunga Keendelezya bakazumizya kuti kuulwe busena ibwakali afwaafwi adolopo lisyoonto lya Bogor, ikulampa makkilomita aatandila ku 40 kuya kumusanza kwadolopo lya Jakarta. Pele mbasyoonto buyo bakwesu bamucisi ibakauzyi mulimo wakuyaka. Aboobo, ino ofesi yamutabi eeyo mpya yakali kunooyakwa buti?

Cakakonzyeka kwiinda mubakwesu ibakazwa muzisi zimbi. Mapulani aamayake akapegwa aba Brooklyn Construction Office alimwi aba Regional Engineering Office yaku Australia. Basikulisungula ibali 100 kuzwa mumasi aambi bakabelesya luzyibo lwabo mukuyaka mumyaka yobilo njaakatola mayake aaya.

Ba Hosea Mansur, imukwesu waku Indonesia ooyo iwakali kwiiminina bakwesu ikubandika abalupati-pati bamumfwulumende kubusena oobo, wakaamba kuti: “Balupati-pati baba Mozilemu nobakabona mabala aaiminina zina lyangu, H.M., aacimpoompo cangu, bakayeeya kuti bbala lyakuti H lyakali kwiiminina bbala lyakuti ‘Hājjī,’ izina lyabulemu lyaatala kapati ilipegwa baabo ibaunka kuyookomba kubusena bwabo busalala butegwa Mecca. Aboobo bakandilemeka kapati. Bukkale oobu bwakapa kuti cuube-ube kweendelezya mulimo wakuyaka.”

Ofesi yamutabi mpya yakaabwa mu July 19, 1996. Mukwesu John Barr, wamu Kabunga Keendelezya ngowakapa makani aakwaaba. Bantu ibali 285 ibakajanika bakali kubikkilizya abaiminizi bamitabi ibali 118, bakwesu abacizyi ibakali bamisyinali kaindi ibazwa mumasi aambi manji, alimwi abamukwasyi wa Bbeteli wacisi ca Indonesia ibali 59. Nokwakainda mazuba obilo kuzwa ciindi ofesi yamutabi noyakaabwa, bantu ibali 8,793 bakajanika ku Muswaangano Wacooko wakuti “Batumwa Baluumuno lwa Leza” mu Jakarta.

Jehova Wafwutula Bantu Bakwe

Mu 1998, Muleli Soeharto (Suharto) iwakalela cisi ca Indonesia kwamyaka minji wakatula ansi cuuno cakwe, calo icakapa kuti mfwulumende imbi italike kulela. Aboobo bakwesu abalo bakabeleka canguzu kujana nzila yakuti mulimo wesu wakalesyedwe uzumizyigwe alimwi mucisi.

Naakali ku New York mu 2001, mupati wacibeela camfwulumende icilanganya makani aajatikizya bulongwe akati kacisi ca Indonesia azisi zimbi uutegwa Secretary of State, Djohan Effendi, wakeendeenda ku Bbeteli yaku Brooklyn akuswaangana abamu Kabunga Keendelezya botatwe. Nzyaakabona zyakamukkomanisya kapati, alimwi wakazuminizya kuti Bakamboni ba Jehova bajisi mpuwo mbotu munyika yoonse mboizulwa. Ba Effendi bakaliyandide kuti mulimo wesu uzumizyigwe mucisi ca Indonesia, pele bakaamba kuti baloya bamfwulumende yacisi, ba Marzuki Darusman, mbabakajisi nguzu zyakukosola makani aaya.

Awalo loya wamfwulumende wakaliyandide kuti mulimo wesu uzumizyigwe, pele balupati-pati babi moyo mucibeela ncobakali kubelekela bakazumanana kuwayawaya kabalangila kuti ino-ino wakali kuyoonjililwa busena amuntu umbi. Kumamanino, mu June 1, 2001, ba Tagor Hutasoit bakaitwa kuofesi yaloya wamfwulumende. Ba Hutasoit balayeeya ategwa: “Muofesi njimunya eeyo, myaka iili 25 musyule, ndakapegwa cipepa icakali kwaamba kuti mulimo wa Bakamboni ba Jehova walesyegwa. Pele mubuzuba mbubonya oobu, ibuzuba bwakwe bwamamanino bwakubelekela muofesi eeyi, loya ngomunya ooyu wakandipa cipepa icakali kwaamba kuti mulimo wesu wazumizyigwa alimwi.”

Mu March 22, 2002, mbunga ya Bakamboni ba Jehova mucisi ca Indonesia yakalembwa mumulawo acibeela camfwulumende cilanganya makani aabukombi icitegwa Department of Religious Affairs. Mupati wacibeela eeco wakaambila baiminizi bamutabi kuti: “Cipepa eeci icitondezya kuti mbunga yanu ililembedwe mumulawo tacimupi lwaanguluko lwabukombi pe. Lwaanguluko oolo luzwa kuli Leza. Cipepa eeci cipa buyo bumboni bwakuti cikombelo canu cilizumizyidwe amulawo wamfwulumende. Lino mulaangulukide mbubonya mbuli zikombelo zimbi, alimwi mfwulumende inoomugwasya.”