Lugwalo Luzwa ku Kabunga Keendelezya
Nomuyandwa Bakwesu Abacizyi:
Cakulicesya musinsimi Isaya wakabona kuti Bwami bwa Juda bwakazwidilila alimwi akuba abuvwubi akaambo buyo kakulongezyegwa a Jehova. Kweelana ambotubala kulugwalo lwa Isaya 26:12 wakaamba kuti: “O Jehova, . . . zintu zyoonse nzyotwacita nduwe wapa kuti zizwidilile.” Twalanga zintu zyoonse nzyotwacikonzya kucita mumwaka wamulimo ooyu wainda, andiswe citupa kuzuminizya majwi aaya ngaakaamba musinsimi Isaya. Ncobeni Jehova ucita ‘zintu zigambya izitanacitikide’! (Kul. 34:10) Amuyeeye buyo zilongezyo zimwi nzyotwatambula kuzwa kuli Jehova.
Webbusaiti yesu yamumulawo ya jw.org, yabelesyegwa munzila iigwasya kapati. Webbusaiti eeyi lino ililembedwe mumyaambo yiinda ku 600 alimwi mabbuku alakonzya kubalwa akukkopwa mumyaambo yiinda ku 750. Ino webbusaiti eeyi yazwidilila buti mukugwasya bantu ibayanda kuzyiba kasimpe kuti bakajane? Mucikozyanyo: Banabukwetene bamwi tiibakali kuyanda kunjila cikombelo cili coonse akaambo kakuupaupa ameso nkobakali kubona muzikombelo. Nobakali kuyandaula busolozi bwakumuuya, bakajana webbusaiti yesu. Bakatalika kuunka awebbusaiti yesu ziindi zinji kutegwa babale zibalo kuzwa mumabbuku eesu alimwi akweebelela mavidiyo. Mane buya bakakkopa kabbuku kesu kakuti Kulingaula Magwalo Abuzuba alimwi akutalika kubala lugwalo lwabuzuba antoomwe abana babo baniini bobilo. Mubwini, eeci ncobakali kucita buzuba bumwi mafwumofwumo ciindi Bakamboni ba Jehova nobakabaswaya. Bakamboni aabo bakazyi kubona kuti akaambo kakubala zili aawebbusaiti, mukwasyi ooyu wakalicincide munzila zinji. Bakamboni ba Jehova kabatanabaswaya, banabukwetene aaba bakalizimwaide kale nsimbo zyamadeekko nzyobakajisi amubili, bakazinyonyoona zikozyanyo nzyobakali kukomba, bakalilekede kusekelela mazuba aakulyookezya alimwi akweebelela mafilimu aatali kabotu. Kuzwa ciindi makani aaya naakali kulembwa, bazyali aaba antoomwe amwanaabo umwi mbaasikumwaya alimwi banabukwetene aaba bajisi makanze aakuyoobbapatizyigwa lino-lino.
Twatambula majwi manji aakulumba akaambo kacipego acimbi cibotu kapati capulogilamu yesu yamulisikapepele ya JW Broadcasting. Pulogilamu eeyi yamwezi amwezi lino nkoili mumyaambo iyiinda ku 70, alimwi kumbele ilangilwa kuba mumyaambo aimbi minji. Mikwasyi minji ilakkala antoomwe kulangilila pulogilamu eeyi ciindi nobacita Kukomba Kwamumukwasyi. Ncamasimpe ncaakaamba mukwesu umwi naakati: “Mbunga ya Jehova lino yakomena kapati kwiinda aciindi cili coonse musyule; nokuba boobo tulimvwa kuba afwaafwi kapati abakwesu bakumaofesi mapati!”
Lyoonse miswaangano yacooko ilabakkomanisya kapati bantu ba Jehova, alimwi oobu mbocakabede kujatikizya miswaangano iyakacitwa mumwaka wamulimo wa 2015. Pulogilamu yamuswaangano wacooko ooyu yakajisi mavidiyo aali 42 alimwi azifwanikiso, kubikkilizya azibeela zili cisambomwe zyanyimbo zinonezya kapati izyakali kulizyigwa kumatalikilo kwacibeela cimwi acimwi. Ikujatikizya pulogilamu eeyi, mukwesu umwi iwabelekela Leza kwaciindi cilamfwu wakaamba kuti: “Kulibonya kuti taaku muntu naba omwe iwakali kuyanda kunyamuka ciindi camapulogilamu, nkaambo kakuti tiibakali kuyanda kwiindwa cili coonse.” Kujatikizya muswaangano wamwakali, misyinali umwi uubelekela mumuunda wakaamba kuti, “Mavidiyo akapa kuti ndisinizye kuti ncobeni tulikajisi kasimpe alimwi abwalo Bwami nkobuli ncobeni.”
Kuyungizya waawo, Jehova wakatuleleka mwakali kwiinda mukutupa nyimbo zya Bwami azimbi zipya. Banabukwetene bamwi bakalemba kuti: “Eezyi nyimbo zipya zili mbuli kufwukatilwa aa Jehova. Zyatukulwaizya ziindi zinji zintu nozyatali kutweendela kabotu.” Miswaangano yesu yakatuyeekezya mulimo uutaliboteli wakutembaula Jehova ngobatubelekela caluyando bakwesu abacizyi ibali munkamu ya Watchtower yabasikulizya ziimbyo alimwi abasikwiimba majwi!
Twamukulwaizya nyoonse kuti mwiiye Jehova kwiinda mukubatambula amaanza obilo aabo ibapiluka
Sena mbungano yanu ilatubelesya twakubikkila mabbuku twamubukambausi bwakubuleya? Eelo kaka nzila eeyi yabukambausi yagwasya bantu banji! Bantu bamwi ibakkala kumayaadi naa mumaanda aagatelwa buya bakamvwa kasimpe ciindi cakusaanguna, alimwi bantu banji kubikkilizya a Bakamboni ibatacisungweede abalo bagwasyigwa kumuuya munzila eeyi. Mu January 2015 mwaalumi umwi ku South Korea wakaleya kubusena ikwakali twakubikkila mabbuku ibwakali kucitilwa bukambausi bwakubuleya. Wakapandulula kuti calino-lino wakatalika kuyeeyesya makani aakumuuya. Ciiyo ca Bbaibbele cakatalisyigwa. Mu February, wakajanika kumuswaangano wambungano kwaciindi cakusaanguna; mu March, wakacileka kufweba. Mu April, wakaswaya mutabi waku South Korea, alimwi wazumanana kuyaambele kumuuya. Eezyi nzyakuluula zisyoonto buyo akati kazyakuluula zinji nzyotwakatambula kuno kumaofesi mapati.
Ncotupailila ncakuti makani aakaambwa kumuswaangano wacooko alabakulwaizya banji aabo ibatacisungweede lino kupilukila kuli Jehova siluyando ciindi nocitanamana! Twamukulwaizya nyoonse kuti mwiiye Jehova kwiinda mukubatambula amaanza obilo aabo ibapiluka.—Ezk. 34:16.
Masimpe Jehova wabalongezya kapati bantu bakwe mumwaka wamulimo ooyu wainda. Nzintu nzi azimwi nzyotukonzya kulangila? Atuzumanane buyo kulangila. Kwaciindi cino, tumuzyibya kuti swebo Tobakabunga Keendelezya tulamuyanda kapati nyoonse alimwi tulamupailila ciindi coonse.
Kamupona kabotu,
Tobanyoko,
Kabunga Keendelezya ka Bakamboni ba Jehova