America Ansumbu Zyeengelede

Ciiyo ca Bbaibbele Cicitilwa Mumumuni Wakkendulo Musyokwe

Banabukwetene bapainiya baalubazu bamwi ibabelekela mucilawo cakulamfwu mucisi ca Brazil bakazyiba kuti ba Valdira, ibakaintu bamwi bakali kwiiya Bbaibbele myaka iili 13 musyule. Nobakeenda musinzo mumugwagwa uutakwe taala wiinda aamilonga yatakajisi mabbiliji mabotu, bapainiya aaba bakabajana ba Valdira, balo ibakayandide kapati kutalika kwiiya Bbaibbele alimwi. Akaambo kakuti ba Valdira bakali kukkala kulamfwu kapati, kwakali kuyandika kubikka bubambe bulibedelede. Nokuba kuti ba Valdira bakalijisi fooni, ibusena bulikke ikwakali netiwekki mbotu mwakali musyokwe ikulamfwu akuŋanda yabo. Kunze lyaboobo, ba Valdira bakali kucikonzya buyo kwiiya masiku kuzwa ciindi ca 21:00hrs. Kamuciyeeyela buyo: Mwana musimbi ujisi fooni alimwi ulikkede alikke masiku musyokwe kaiya Bbaibbele mumumuni wakkendulo.

Ba Valdira alimwi balaswiilila miswaangano yamu Nsondo aafooni yabo. Balaunka musyokwe kabajisi Bbaibbele lyabo, Ngazi Yamulindizi, alimwi abbuku lyanyimbo kutegwa bakaswiilile miswaangano. Ikuti kakuwa mvwula, balabwezelezya aambulela yabo.

Mu March, ba Valdira bakeenda musinzo wamakkilomita aali  90 kuunka ku Ŋanda ya Bwami yakubusena nkobazwa kuyoojanika kumuswaangano waalubazu ooko ikwakali kumwaigwa Bbaibbele lya Busanduluzi Bwanyika Mpya lyamuci Portuguese ilyakalembululwa. Bakakkomana kapati kutambula Bbaibbele lipya. Nobakalumbaizyigwa akaambo kakusoleka nkobacita kutegwa baiye Bbaibbele, ba Valdira bakaamba kuti, “Pesi mpasyoonto, kunyina maningi penzi!”

“Ndakalizyi Kuti Bumwi Buzuba Muyooboola”

Ba Yukpa mbantu ibakkala mucisi ca Colombia pele ibakazyalwa kubana America ibakakwetene abana India. Kabatanaunka kubusena bumwi mucooko eeco, ba Frank, ibapainiya baalubazu bakacenjezyegwa kujatikizya sibbuku wakooko wazina lya John Jairo, walo iwakatandide tukamu tuli mbotubede twabasizikombelo ibakali kuyanda kukambauka kubusena oobo. Cimwi ciindi, ba Jairo nobakaambilwa kuti mupati wacikombelo umwi wakali kubweza milumbo, bakamutandaanya kumwi kabamulizyila ntobolo.

Ba Frank balayeeya ategwa: “Notwakasika mumunzi ooyo, muntu wakasaanguna kuswiilila mulumbe ngotwakajisi wakali mwana musimbi umwi waba John Jairo. Notwakamutondezya bbuku lyakuti Ino Ncinzi Cini Bbaibbele Ncoliyiisya? ndilyonya wakaamba kuti, ‘Eeci ncecikombelo ncondiyanda kunjila!’ Mpoonya wakabalikila kuli bausyi kuyoobaambila kuti kuli beenzu. Cakutasowa ciindi bakatwiita. Katuyoowede, twakaunka kuyoobonana ambabo. Katutanaamba jwi lili lyoonse, bakaamba kuti: ‘Ndilizyi kuti cikombelo canu ncamasimpe. Myaka iili lusele yainda, ndakajana bbuku mucimbotela ku Becerri ilili mbuli leeli ndyomwapa mwanaangu. Ndakalibala, mpoonya kuzwa leelyo, ndakali kulindila buyo kuti mukaboole kuno. Ndakalizyi kuti bumwi buzuba muyooboola. Ndiyanda kuti mundiyiisye Bbaibbele mebo, mukwasyi wangu, alimwi abantu ibali mucilawo eeci. Mulaangulukide kuboola kumaanda eesu.’

“Majwi aayo akatupa kwiibaiba misozi. Bantu bamucilawo eeco boonse bakabungana kutegwa baswiilile mulumbe ngotwakali kukambauka, alimwi ba John Jairo mbabakali kubasanduluda nzyotwakali kwaamba kuzitola mumwaambo wabo. Ciindi notwakali kuzwa kubusena oobu, ba Jairo bakatubbweleka mbongolo kuti itunyamude ntundu zyesu. Lino tweendelezya ziiyo zya Bbaibbele izili 47 kubantu bali 120 akati kaba Yukpa ibamuzilawo ziindene-indene, kubikkilizya aba John Jairo amwanaabo musimbi.”

Sikupenzya Wacinca Nzila Zyakwe

José, umwi iwakali Katolika imusungu, ukkala mucisi ca Ecuador. Wakalemba kuti: “Tiindakali kubayanda amobainda Bakamboni ba Jehova. Ndakali kubapenzya kwamyaka iili kkumi. Ndakali kubajanina bantu bakubapenzya, kubauma, alimwi akubabejekezya kuti mbaakabwalala. Mpoonya kupolisi, ndakali kukakatila kuti mane ndaibikka ndime loko aacitolokesi cabo. Cimwi ciindi, twakapwaya moota wa Kamboni umwi. Alimwi aciindi cimwi, honda yabo twakaitonkela mujeleele.

“Mpoonya mu 2010, ndakaciswa bulwazi butambukila ibutegwa swine flu. Dokota iwakandisilika wakandaambila kuti ndizwe mucilawo mondakali kukkala mumalundu aa Andes akuunka kubusena ibwakali kukasaala ibwakali kunkomwe yalwaanje kuyooponena nkuko. Ndakaunka kuyookkala kumpulazi nsyoonto yamubbululu umwi kunkomwe yalwaanje, eelyo ndakajanika kuti ndime ndelikke nindakali kukkala ampulazi eeyo. Akaambo kakuti ndakali buyo ndelikke, ndakali kuyandisisya kwaambaula amuntu uuli woonse. Ino mbaani ibakandiswaya kumpulazi eeyo? Mbaakamboni ba Jehova! Akaambo kakulendelelwa, ndakabandika ambabo alimwi ndakagambwa akaambo kambobakali kulibelesya Bbaibbele. Ndakazumina kwiiya Bbaibbele kutegwa ndizyibe buyo nzyobakali kuyiisya. Nokwakainda myezi iili cisambomwe, ndakajanika kumiswaangano kwaciindi cakusaanguna. Ndakakkomana kapati akaambo kambobakanditambula caluyando alimwi akundibikkila maano kapati cakuti ndakalibuzya kuti, ‘Sena aaba mbabelesi ba Leza bakasimpe?’ Ndakazumanana kuyaambele kumuuya eelyo ndakabbapatizyigwa mu April 2014.

“Ndakausa kapati akaambo kakuti ndakali kubapenzya Bakamboni. Nokuba boobo, Jehova wakandipa coolwe cakuti ndilulamike zintu kusikila mpondikonzya. Kumuswaangano wabbazu mu October 4, 2014, ndakabuzyigwa-buzyigwa kujatikizya ciindi camusyule nindakali kukazya Bakamboni, alimwi bakandibuzya kuti: ‘Ikuti naa mwapegwa coolwe cakuti mulilekelele kuli umwi wabaabo mbomwakapenzya, inga mwalilekelela kuli ni?’ Cakutasowa ciindi ndakaingula kuti inga ndacita boobo kumukwesu umwi wazina lyakuti Edmundo, pele tandizyi nkondikonzya kumujana. Kanditazyi, anu mulangizi wabbazu wakalimuletede kusyule lyacibumbili. Baswiilizi yakabeenda misozi nobakatubona mebo aba Edmundo katukumbatana alimwi akulila aacibumbili.”

“Ndalomba Akaka Jehova, Kopa Kuti Bakamboni Bako Bandijane”

Izuba lyakalipide kale acilungulungu, ciindi kakamu kabasikumwaya mu Asunción, kucisi ca Paraguay, nokakamanizya kukambauka mucilawo ncokakapedwe. Nokuba boobo, bakayeeya kuti baliyumye akukambauka kumaanda masyoonto aakalaafwaafwi. Kamboni umwi wakaamba kuti, “Ambweni kuli muntu umwi uupaila.” Kuŋanda imwi iyakali akkona, mukaintu umwi uucili mwana-mwana wakaanzya bacizyi akubamwetela kali amulyango waŋanda yakwe, mpoonya wakababuzya ikuti naa Mbaakamboni ba Jehova. Mukaintu ooyo wakapandulula kuti mwezi omwe wainda wakalongela ku Paraguay kuzwa ku Bolivia akaambo kamulimo wakwe. Katanalonga, wakali kwiiya Bbaibbele ku Bolivia. Kubusena ooko nkwaakalongela kunyina muntu iwakali kukonzya kumwaambila nkwaakali kukonzya kubajana Bakamboni ba Jehova, aboobo wakapaila ulaamba, “Ndalomba akaka Jehova, kopa kuti Bakamboni bako bandijane.” Buzuba mbubonya oobo naakapaila, bacizyi bakamuswaya alimwi bakabikka bubambe bwakwiiya Bbaibbele anguwe.