Masi Aamulwaanje lwa Pacific (Oceania)

Busicamba Bwakwaambila Bamwi

Emily uujisi myaka yakuzyalwa iili  12 ukkala kucisi ca Australia. Bumwi buzuba bayi bakwe bakaambila basicikolo babo mbociyandika kapati kusala balongwe ibali kabotu. Eeci cakapa kuti Emily atondezye bayi bakwe vidiyo iitondezya zyakudulowa abboodi yakuti Ino Mulongwe Mwini-Mwini Uli Buti? (What’s a Real Friend?) Kumbele bayi aabo nobakatondezya basicikolo babo vidiyo eeyi, boonse bakayeebelela cakubikkila maano kapati. Mpoonya, bakaibandika antoomwe kwawoola lyomwe. Bayi alimwi bakaitondezya vidiyo eeyi kuli basicikolo mumakkilasi aambi aali mbwaabede. Mpoonya Emily wakatondezya bayi bakwe abasicikolonyina webbusaiti ya jw.org. Emily waamba kuti: “Jehova wakandipa busicamba kutegwa ndaambile basicikolo banji kujatikizya webbusaiti yesu. Masimpe wakandilongezya.”

Kutondezya Akusambala Zintu Mubusena Buli Kulamfwu

Basikumwaya bosanwe bakeenda musinzo uutola mawoola aali fwuka mumigwagwa mibi yiinda mumalundu kutegwa bakabikke sitaandi yabo kubusena ikwakali kutondezyelwa zintu zyakusambala ku Suai, mu Timor-Leste. Bantu ibakasika kusitaandi bakagambwa kubona mabbuku aamba zyamu Bbaibbele mumyaambo yamunsumbu eeyo iili 12, mbwaanga taakwe mabbuku manji aamwaidwe mumyaambo eeyo. Mukaintu umwi wakabona mutwe wabroshuwa imwi akukankamuka kuti, “Mwaambo wangu ooyu!” Cakali ciindi cakusaanguna kubala bbuku lilembedwe mumwaambo wakwe uutegwa Bunak. Mumazuba one buyo, basikumwaya aabo bakaabila mabbuku, mabroshuwa amatulakiti aali 4,571 alimwi bantu banji bakalomba kuti Bakamboni bakabaswaye kumaanda aabo. Bunji bwabaabo ibakajisi luyandisisyo tiibakaninga buzuba babandika a Bakamboni ba Jehova. Bana basyoonto bakakkala kwamawoola manji kabeebelela mavidiyo aamutwe wakuti Amube Balongwe ba Jehova mumwaambo uutegwa Tetun Dili. Bana bamwi mane bakazipeta nyimbo izili mucibeela eeci akuziimba calukkomano.

“Eeci Ncobakali Kuyandika Basicikolo”

Bamisyinali ba Brian aba Roxanne bakalomba kuti babikke kakubikkila mabbuku kakukuba kukkoleji imwi kunsumbu ya Palau. Bakaswaangana amupati wakkoleji akumutondezya vidiyo iijatikizya bukambausi bwesu bwakubuleya aawebbusaiti ya jw.org. Alimwi bakamusiila mabbuku amwi ngobakali kuyanda kuyoobikka aakakubikkila mabbuku kakukuba. Mupati wakkoleji ooyo wakaambila ba Brian aba Roxanne kuti bakali kuyandika kuswaangana aweendelezya makani aajatikizya basicikolo. Muswaangano ooyo nowakainda, bakaambilwa kuti bakacili kuyandika kuswaangana amupati wakkoleji umbi.

Ba Brian baamba kuti: “Mubandi wakeenda kabotu, pele twakaambilwa kuti tupiluke kuofesi yamupati wakkoleji, ooko nkotwakaambilwa kuti tulembe lugwalo lwakulomba kuzumizyigwa kubikka kakubikkila mabbuku eesu kakukuba. Twakalimvwa kuti baile kutuzembya buyo alimwi twakatyompwa, pele nokuba boobo twakalulemba lugwalo.”

Kutegwa batobelezye mpozyakasikide zintu, ba Brian aba Roxanne bakaunka kuyoobonana amupati wakkoleji ciindi cabili, kabayeeya kuti bayoobakakila. Ba Brian bakaamba kuti: “Twakagambwa kapati, eelyo mupati wakkoleji naakaamba kuti wakaabala mabbuku ngotwakamusiilide alimwi akuti wakali kuyeeya kuti akali mabotu kapati. Wakaamba kuti eeci ncobakali kuyandika basicikolo.” Inzya, kumamanino bakabazumizya!

Ba Brian balazumanana kwaamba kuti: “Mpoonya mweendelezi uulanganya makani aajatikizya basicikolo wakatuzyibya kuti basicikolo ibakali kukkala aakkoleji mpamunya bakali kukonzya kutolwa amoota wakkoleji kucikombelo cili coonse ncobayanda mvwiki amvwiki mu Nsondo. Wakaamba kuti, ‘Ikuti naa bayanda kuboola kucikombelo canu, taakwe bubi tulakonzya kubaleta ooko.’ Mebo aba Roxanne twakagambwa kapati. Muciindi cakutukakila ncotwakali kulomba, bapati bakkoleji bakatwaambila kuti balakonzya kubatola basicikolo ku Ŋanda ya Bwami!”

Buzuba bwakusaanguna ba Brian aba Roxanne mbobakabikka kakubikkila mabbuku kakukuba kukkoleji, bakaabila mabbuku aali 65, mamagazini aali 8, alimwi amabroshuwa aali 11. Alimwi bakaba amibandi mibotu abasicikolo banji. Bapati bakkoleji alimwi abeendelezi ibalanganya makani aajatikizya basicikolo bakakulwaizya ba Brian aba Roxanne kuti bazumanane kuboola akubikka mabbuku aabo.

Basikuula Beebelela Mavidiyo Eesu

Bumwi buzuba kumazuba, Lipson, umwi wamukwasyi wa Bbeteli wakali kupiluka kumutabi kucisi ca Solomon Islands naakamana kukambauka kuseeni. Naakali kweenda, wakamvwa nyimbo ya Bwami kailila mucintoolo cimwi. Kayanda kuzyiba cakali kucitika, wakanjila mucintoolo eeco. Wakagambwa naakabona nkamu yabana abapati kabalangilila aa TV vidiyo yanyimbo namba 55 yakuti “Ma! Ibuumi Butamani,” kuzwa mucibeela camavidiyo cakuti Amube Balongwe ba Jehova. Nyimbo eeyi noyakamana kulila, mukamwini cintoolo wakaambila nkamu yabantu kuti, “Ndijisi vidiyo imbi njondiyanda kuti mweebelele.” Mpoonya wakatondezya vidiyo yakuti Ncibi Kubba (Stealing Is Bad). Vidiyo eeyi noyakamana, boonse wakabaambila kuti batabbi cintu cili coonse mucintoolo cakwe.

Akaambo kakuti bantu banji bakanjila mucintoolo ciindi noyakali kutondezyegwa vidiyo, mukamwini cintoolo wakaamba kuti, “Ndiyanda kuti nyoonse muswiilile nyimbo njendiyandisya.” Mpoonya wakalizya nyimbo namba 55 alimwi. Kuzwa waawo, mukamwini cintoolo wakatondezya mavidiyo aakuti Nkaambo Nzi Ncomweelede Kwiiya Bbaibbele? alimwi ayakuti Ino Ciiyo ca Bbaibbele Cicitwa Buti? mumwaambo waku Solomoni Islands uutegwa Pidgin.

Mbasyoonto bantu baku Solomon Islands ibabelesya Intaneti akaambo kakuti iladula kapati alimwi taijaniki koonse. Nokuba boobo, mukamwini cintoolo ooyu, walo uutali umwi wa Bakamboni ba Jehova, ulimukugwasyilizya kumwaya kasimpe kwiinda mukutondezya mavidiyo eesu kuli baabo ibanjila mucintoolo cakwe.

Wakajana Zina lya Leza Mubbuku

Lyoonse mu Muhulo, banabukwetene bamwi ibacili bana-bana balanonezyegwa kukambauka kwiinda mukubelesya kakubikkila mabbuku kakukuba mubusena bwadolopo lya Nouméa, idolopo lipati lyacisi ca New Caledonia. Bumwi buzuba, mukaintu umwi cansoni-nsoni wakasika kwakali kakubikkila mabbuku, mpoonya kakunyina kwaamba cili coonse wakabweza bbuku lyakuti Ino Ncinzi Cini Bbaibbele Ncoliyiisya? Nokwakainda maminiti aali 30, mukaintu ooyo wakapiluka kalijisi bbuku eelyo mumaanza. Wakabuzya banabukwetene kuti, “Sena mwalibona bbala eeli?” Wakajalula bbuku akutondeka zina lyakuti Jehova. Mpoonya wakaamba kuti: “Ndizina lya Leza! Kwamvwiki zili mbozibede ndali kuvwuntauzya kulaibbulali kutegwa ndizyibe kasimpe kujatikizya Leza. Mpoonya sunu nindabweza bbuku lyanu eeli, akunjila mumoota wangu, cintu cakusaanguna ncondabona nindalijalula ndizina lya Leza lyakuti Jehova. Aboobo ndayeeya kuti ndipiluke akumulumba.” Banabukwetene aaba bakaba amubandi mubotu amukaintu ooyu, mpoonya bakamutondezya cibalo cakuti “Zina lya Leza—Mbolibelesyegwa Ancolyaamba” mumakani aayungizyidwe aabbuku lya Bbaibbele Ncoliyiisya. Mukaintu ooyu wakapandulula kuti wakali kuyanda kusaanguna kuunka kuyoovwuntauzya kulaibbulali, pele lino ulizyi nkokajanika kakubikkila mabbuku lyoonse mu Muhulo!