Ino Zyiba Lyamulilo Ninzi? Sena Ncimwi Buyo a Helo naa Gehena?

Bwiinguzi bwamu Bbaibbele

Zyiba lyamulilo ncitondezyo calunyonyooko lutamani. Ncimwi buyo a Gehena, pele liliindene ahelo, nkaambo yalo ncuumbwe muzikkilwa bantu.

Talili zyiba lyamulilo lini pe

Tupango twamu Bbaibbele tosanwe itwaamba “zyiba lyamulilo” tutondezya kuti ndizyiba lyacitondezyo kutali zyiba lini pe. (Ciyubunuzyo 19:20; 20:10, 14, 15; 21:8) Eezyi zitobela ziyoosowelwa muzyiba lyamulilo:

• Diabolosi. (Ciyubunuzyo 20:10) Mbwaanga ncilenge camuuya, Diabolosi takonzyi kupya mumulilo wini-wini.​—Kulonga 3:2; Babetesi 13:20.

• Lufwu. (Ciyubunuzyo 20:14) Tacili cintu cini-cini, pele ciiminina bukkale bwakutabako, nkokuti kutaba abuumi. (Mukambausi 9:10) Ilufwu talukonzyi kuumpwa mumulilo.

• “Munyama,” alimwi “amusinsimi wakubeja.” (Ciyubunuzyo 19:20) Mbokunga eezyi kuli ncoziiminina, nkokuti cileelela kwaamba kuti zyiba moziyakusowelwa alyalo kuli ncoliiminina.​—Ciyubunuzyo 13:11, 12; 16:13.

Ziiminina lunyonyooko lutamani

Ibbaibbele lyaamba kuti zyiba lyamulilo “liiminina lufwu lwabili.” (Ciyubunuzyo 20:14; 21:8) Lufwu lwakusaanguna ilwaambwa mu Bbaibbele lwakaboola akaambo kacibi ca Adamu. Lufwu oolu inga lwamana kwiinda mububuke alimwi kumbele Leza uyoolugwisya.​—1 Bakolinto 15:21, 22, 26.

Zyiba lyamulilo liiminina lufwu lwabili lwalo ilwiindene alwakusaanguna. Nokuba kuti alwalo lwiiminina bukkale bwakutabako, luliindene mukuti Bbaibbele taaku ncolyaamba kujatikizya makani aabubuke kuzwa kulufwu lwabili. Mucikozyanyo, Bbaibbele lyaamba kuti Jesu ulijisi “makkii aalufwu aa Cikkalilo Cabafwu” icitondezya kuti ulijisi nguzu zyakubusya bantu kuzwa kulufwu lwakaboola akaambo kacibi ca Adamu. (Ciyubunuzyo 1:18; 20:13) Nokuba boobo, kunyina uujisi makkii aazyiba lyamulilo naba Jesu naba muntu uumbi. Izyiba lyacikozyanyo eeli liiminina cisubulo citamani, nkokuti kunyonyweedwa limwi.​—2 Batesalonika 1:9.

Kkuti lya Hinomu lilikozyenye a Gehena

Mumalembe aa Bbaibbele aakusaanguna, ibbala lyakuti Gehena (mu Chigiliki geʹen·na) lilaambwa ziindi zili 12. Mbubwenya mbuli zyiba lyamulilo, ayalo ncitondezyo cakunyonyweedwa limwi. Nokuba kuti busanduluzi bumwi bwaamba bbala eeli kuti “helo,” bbala lyakuti Gehena liliindene ahelo (mu Chihebrayo sheʼohlʹ, mu Chigiliki haiʹdes).

Bbala lyakuti “Gehena” lyaamba kuti “Kkuti lya Hinomu,” ikwaamba kkuti lyakali kunze aamunzi wa Jerusalemu. Kaindi, mukkuti eeli mobakali kusowela tombe bantu bamumunzi. Mubusena oobu, mulilo wakali kuyaka lyoonse ikuumpa mafwuse; azyalo mvwunyu zyakali kulya zyoonse zyatakali kupya amulilo.

Jesu wakabelesya Gehena kuti ncitondezyo cakunyonyweedwa limwi. (Matayo 23:33) Wakaamba kuti mu Gehena ‘mvwunyu tazifwi alimwi mulilo tauzimi.’ (Maako 9:47, 48) Aboobo wakeezyanisya mbomwakabede mu Kkuti lya Hinomu alimwi abusinsimi bulembedwe mubbuku lya Isaya 66:24, ibwaamba kuti: “Bayooinka kuyoobona mitunta yabantu ibakandipapila, nkaambo imvunyu zyabo tazikwe nizifwa, amulilo wabo tuukwe nuuzima.” Cikozyanyo ca Jesu caamba kunyonyoonwa cakumaninina ikutali kupenzyegwa. Imvwunyu zilya mitunta yabantu ikutali bantu baumi, awalo mulilo uumpa mitunta ikutali bantu baumi.

Bbaibbele kunyina nolitondezya kuti kuli ibafwutuka mu Gehena. “Zyiba lyamulilo” a “Gehena muyaka mulilo” zyoonse ziiminina kunyonyweedwa limwi.​—Ciyubunuzyo 20:14, 15; 21:8; Matayo 18:9.

Muunzila nzi ‘mobayoopenzyegwa isyikati amasiku lyoonse mane kukabe kutamani’?

Ikuti naa zyiba lyamulilo liiminina lunyonyooko, nkaambo nzi Bbaibbele ncolyaamba kuti muzyiba eeli Diabolosi, munyama, alimwi amusinsimi wakubeja “bayoopenzyegwa isyikati amasiku lyoonse mane kukabe kutamani”? (Ciyubunuzyo 20:10) Amubone itwaambo tone itutupa kuzyiba kuti kupenzyegwa ooku tacaambi cisubulo cini-cini:

1. Kutegwa Diabolosi apenzyegwe mane kukabe kutamani, nkokuti weelede kuba muumi mane kukabe kutamani. Pele, Bbaibbele lyaamba kuti uyoonyonyoonwa cakumaninina.​—Bahebulayo 2:14.

2. Buumi butamani ncipego kuzwa kuli Leza, ikutali cisubulo.​—Baloma 6:23.

3. Munyama alimwi amusinsimi wakubeja kuli ncoziiminina aboobo tabakonzyi kupenzyegwa cacigaminina.

4. Makani aali mu Bbaibbele atondezya kuti kupenzyegwa kwa Diabolosi caamba kukasyigwa kucita zintu mane kukabe kutamani naa kunyonyweedwa limwi.

Mu Bbaibbele, ibbala ilyaamba “kupenzyegwa” alimwi lilakonzya kwaamba “kuba mubukkale bwakukasyigwa kucita zintu.” Mucikozyanyo, bbala lyamu Chigiliki lyakuti “basikupenzya” ilibelesyedwe mulugwalo lwa Matayo 18:34 lisanduludwe kuti “basintolongo” muma Bbaibbele manji, calo icitondezya mbwaaswaangene mabala aakuti “kupenzyegwa” alimwi “akuba mubukkale bwakukasyigwa kucita zintu.” Mbubwenya buyo, makani aali mulugwalo lwa Matayo 8:29 alimwi a Luka 8:30, 31 akozyanisya bbala lyakuti “kupenzya” “kumulindi uutagoli,” calo iciiminina bukkale bwakutabako, nkokuti kutaba abuumi. (Baloma 10:7; Ciyubunuzyo 20:1, 3) Alimwi ziindi zinji, bbuku lya Ciyubunuzyo libelesya bbala lyakuti “kupenzya” munzila yacikozyanyo.​—Ciyubunuzyo 9:5; 11:10; 18:7, 10.