Mbuti Kujatikizya Zikonke Zyabunakalindu?

Ino cikonke cabunakalindu ninzi?

Cikonke cabunakalindu ncikonke cilembwa buya naa kwaambwa buya kujatikizya kulilesya koonana kusikila mane mwakwata naa kukwatwa.

Zikonke zyabunakalindu zyakaduma kapati muma 1990 amuswaangano waba Southern Baptist Convention ku United States nobakamwaya bbuku lyakuti “True Love Waits,” ibbuku lyakali kwaamba njiisyo zyamu Bbaibbele alimwi amakani aakulwaizya bakubusi kulilesya mumakani aakoonana kabatanakwata naa kukwatwa.

Amuswaangano umbi, ibantu bakajanika alimwi aabo ibakakonka, bakapegwa nweenwe yansiliva kutondezya kuti bayoolilesya mumakani aakoonana mane kusikila bakakwate naa kukwatwa.

Sena zikonke zyabunakalindu zilabeleka?

Ciyabuyo amuntu ngomwabuzya.

• Kweelana ambobakaamba basikuvwuntauzya ba Christine C. Kim alimwi aba Robert Rector, “malipooti atondezya kuti bakubusi ibakali kukonka zikonke zyabunakalindu bakali kucita oobo akaambo kakumuka kukubuka naa kumuka kuzyiba makani aakoonana.”

• Kweelana abuvwuntauzi bwakacitwa aba Guttmacher Institute, “bakubusi bakonka zikonke zyabunakalindu balalangilwa koonana mbubwenya buyo mbuli baabo batakakonka.”

Nkaambo nzi ncokuli malipooti aateendelani?

• Buvwuntauzi bumwi butondezya kuti aabo bakonka alimwi abaabo batakonki baliindene zintu nzyobasyoma caboola mumakani aakoonana.

• Pele buvwuntauzi bumwi butondezya kuti aabo bakonka alimwi abaabo batakonki, zintu nzyobasyoma zilikozyenye caboola mumakani aakoonana.

Ino buvwuntauzyi bwabili bwakayubununa nzi? Ba Dr.   Janet Rosenbaum, basyaazibwene mumakani aabakubusi baamba kuti kwainda myaka yosanwe, “basikukonka alimwi abaabo batakonki, boonse buyo balaaliwa kulilesya mumakani aakoonana.”

Nzila mbotu

Mapulogilamu aakulwaizya zikonke zyabunakalindu ali buyo kabotu. Nkuti buyo, mapulogilamu aayo taabagwasyi kuzyiba zintu zikonzya kubapa kubamba cikonke cabo. Ba Dr. Rosenbaum bakaamba kuti bantu banji ibakonka kuba nakalindu “inga tacizwi ansi aamoyo. Kulilesya koonana ncintu iceelede kuzwa ansi aamoyo ikutali kwiile kutola lubazu mupulogilamu imwi.”

Muciindi cakulemba buya naa kwaamba buya cikonke cabunakalindu, Bbaibbele lyaamba kuti muntu weelede kuba ‘amaano aayiisyidwe kwaandaanya ciluzi acitaluzi.’ (Bahebrayo 5:​14) Alimwi buya, bantu tabalilesyi koonana kutegwa batabi amalwazi naa kumita, pele balacita oobo kutondezya bulemu kuli Sikutalisya lukwatano.​—Matayo 5:​19; 19:​4-6.

Milawo iibikkidwe mu Bbaibbele igwasya ndiswe. (Isaya 48:17) Inzya, bantu boonse, tacikwe makani aciimo cabo, balakonzya kuba amakanze aakutobela mulawo wa Leza ‘wakubutija bwaamu.” (1 Bakorinto 6:​18) Baakukwata naa kukwatwa, bayooba alukkomano lujanwa mukoonana, kakunyina kupenga mumizeezo akaambo kakoonana kamutanakwata naa kukwatwa.