Mbwaapangidwe Menyo Aankumba Iitegwa Limpet

Nkumba iitegwa Limpet, iikkala mumaanzi alimwi iijisi cipapa cibulungene, ijisi menyo mayumu kapati. Menyo aaya apangidwe aamilambi iisinsikene kapati alimwi mafwuwa aangawo ajisi mineral yiitwa kuti goethite iijanika muzibeela ziteteete zyamenyo.

Amulange-lange: Mulaka wankumba eeyi uzingulukidwe amenyo aacengeme, aatasiki ku 1 sentimita mpoonya abeleka mbuli nswailo. Linyo limwi alimwi lyeelede kuyuma kapati kutegwa licikonzye kupala nyanzabili kumabwe kutegwa nkumba ilye.

Basikuvwuntauzya bakabelesya muncini uukomezya zintu naa microscope kutegwa babone mbwaali mayumu menyo aankumba eeyi. Bakajana kuti menyo aankumba eeyi mayumu kapati kwiinda cintu cili coonse ncobakapimide, kubikkilizya aluubilili. Mupati-pati wabasikuvwuntauzya aaba wakaamba kuti: “Tweelede kusola kwiiya mbwaapangidwe menyo aankumba eeyi ciindi notupanga zintu.”

Basikuvwuntauzya baamba kuti balakonzya kupanga zintu ziyumu mbuli menyo aankumba eeyi zikonzya kubelesyegwa mukupanga myootokala, mato, ndeke, alimwi amenyo aakupanga.

Ino muyeeya buti? Sena menyo aankumba iitegwa limpet akasanduka buya naa akalengwa buya?