Bagalatiya 6:9​—“Tutaleki Pe Kucita Zibotu”

“Tutaleki pe kucita zibotu, nkaambo kuciindi ceelede tuyootebula ikuti naa tiitwatyompwa.”​—Bagalatiya 6:9, Bbaibbele lya Busanduluzi Bwanyika Mpya.

“Tutalengaani mukucita kabotu, nkaambo kuciindi ceelede tulatebula, twatafunuka.”​—Bagalatiya 6:9, The Bible in Tonga Lyamu 1963.

Bupanduluzi bwa Bagalatiya 6:9

Mwaapostolo Paulo wakakulwaizya Banakristo kuzumanana kucita zibotu mumeso aa Leza. Ikuti bacita oobo, bakali kukonzya kuba alusyomo lwakuti Leza wakali kuyoobalumbula.

“Tutaleki pe.” Majwi aaya alakonzya kwaambwa kuti “tutalengaani.” Ibbala lyamumwaambo wakusaanguna alimwi lilakonzya kwaamba kutatyompwa naa kuleka kusungwaala. Kwiinda mukulibikkilizya awalo mumajwi aaya, mwaapostolo Paulo wakazumina kuti awalo wakali kutyompwa zimwi ziindi.​—Baroma 7:21-24.

“Zibotu,” zibikkilizya zintu zyoonse Banakristo nzyobeelede kucita mumulimo wa Leza. Alimwi eeci cilabikkilizya amilimo muntu njacita kugwasya bakombinyina abamwi.​—Bagalatiya 6:10.

“Kuciindi ceelede tuyootebula ikuti naa tiitwatyompwa.” Paulo wakakulwaizya basikubala kuti citola ciindi kuti babone mpindu ziboola akaambo kakucita zintu zibotu, mbuli mbocitola ciindi kubalimi kuti zisyango zikomene. Kwiinda mukwaamba zyakutebula, Paulo wakali kukozyanisya kapango aaka kukasimpe kaambidwe mukapango 7 kakuti: “Kufwumbwa cintu muntu ncasyanga, ncencico eeco ncayootebula.” Munzila iimwi, ciindi Munakristo nacita zintu zibotu mumeso aa Leza, uyootebula bulumbu bupati, kubikkilizya abuumi butamani.​—Baroma 2:6, 7; Bagalatiya 6:8.

Makani aayengelede lugwalo lwa Bagalatiya 6:9

Mwaapostolo Paulo wakalemba lugwalo oolu ku Banakristo bakali kukkala ku Galatiya cakuma 50-52 C.E. Wakacita oobu kutegwa akwabilile Banakristo kuti batayungwi abantu bamwi bakali kulyaamba kuti Mbanakristo pele bakali kukazya kasimpe kujatikizya Jesu. (Bagalatiya 1:6, 7) Bamayi aaba bakubeja bakali kukazya Banakristo kuti bakeelede kutobela Mulawo Leza ngwaakapede cisi cabana Israyeli cansiku kwiinda muli Musa. (Bagalatiya 2:15, 16) Paulo wakapandulula kuti Mulawo wakaleka kubeleka akuti bakombi ba Leza tiibakacili kuyandika kuutobela.​—Baroma 10:4; Bagalatiya 3:23-25.

Ciindi Paulo naakali kukulwaizya Banakristonyina kuti bazumanane “kucita zibotu,” taanakali kwaamba kuti bakeelede kutobela Mulawo wa Musa. Muciindi caboobo, wakali kubakulwaizya ‘kuzuzikizya mulawo wa Kristo,’ walo uubikkilizya zintu zyoonse Jesu nzyaakayiisya kujatikizya kucitila bamwi zibotu.​—Bagalatiya 6:2; Matayo 7:12; Johane 13:34.

Amweebelele kavidiyo aaka kutegwa mubone twaambo tupati-pati ituli mubbuku lya Bagalatiya.