Nzila 5-Amubelekele Antoomwe Amukwasyi Wanu
“Muntu uucenjede ulacita caluzibo.” (Tusimpi 13:16) Kubikkila maano kumalailile mauba-uba aajatikizya buumi kulakonzya kumugwasya kucinca kutegwa nywebo amukwasyi wanu kamupona buumi bubotu.
◯ Kamuzumanana kwiiya. Mumasi manji, tubunga twamfwulumende alimwi atutali twamfwulumende twapanga mapulogilamu amabbuku manji aajatikizya makani aakupona kabotu. Mweelede kwaabelesya kutegwa amugwasye kuzyiba mbomukonzya kusumpula alimwi akukwabilila buumi bwanu. Amube bantu balibambilide kucinca ikuti naa kwajanika kuti kuli mpomweelede kucinca.
Zyintu zibotu nzyomukonzya kwiiya alimwi akuti kamuzicita zilakonzya kubagwasya bana banu kubikkilizya abana babo. Kuti bazyali kabajisi cikozyanyo cibotu mumakani aabulondo, kujana ciindi cakulyookezya, kulya zyakulya zipa busani, kujana ciindi cakoolola mubili alimwi akulikwabilila kumalwazi, eeci cilakonzya kubagwasya bana babo.—Tusimpi 22:6
◯ Ino ncinzi ncomweelede kucita? Kutegwa mube abuumi buli kabotu mweelede kuzikkomanina zyintu nzyomucita. Kucileka kucita ziyanza zibi kulakonzya kukataazya kapati, alimwi kubambulula bukkale bwanu kuyandika kuti kamujisi twaambo tumukulwaizya kucita boobo. Nokuba kuti muntu uciswa bulwazi bupati alimwi ulangilwa kufwa, takonzyi kucita ncazyi kuti cilakonzya kumugwasya kupona. Ino ncinzi ncobeelede kucita bantu bali boobu? Beelede kuzyiba ncobaponena naa mpindu njobujisi buumi.
Banabukwetene beelede kuba abuumi buli kabotu alimwi akuzumanana kugwasyanya. Bazyali beelede kuzumanana kubagwasya alimwi akubayiisya bana babo. Bana bapati beelede kulanganya banamukwasyi bacembeede, akubakulwaizya kubona kuti ncilongezyo kuba ambabo muciindi cakubabona kuti tabajisi mpindu. Zyoonse eezyi zibikkilizya kuba aluyando alimwi akubabikkila maano bamwi.
Cintu cipati cikonzya kutugwasya kuti katubikkila maano kubuumi, nkulumba alimwi akulyaaba kuliyooyo wakatulenga. Bantu bamusyoma Leza balacikwabilila cipego ncobakapegwa anguwe, nkokuti buumi. (Intembauzyo 36:9) Ikuti katujisi buumi bubotu, tulakonzya kumubelekela kabotu Leza. Kunyina kaambo kapati kwiinda kaaka, ikeelede kutukulwaizya kubikkila maano kubuumi bwesu.
[Majwi aakwelelezya sikubala aali apeeji 8]
Amugwasyigwe kwiinda mukupona buumi buli kabotu