KUBUZYA-BUZYA | BA PAOLA CHIOZZI

Basyaazibwene Mumakani Aasayansi Bapandulula Mbobakatalika Kusyoma Muli Leza

Kwamyaka iinda ku 20, ba Dr. Paola Chiozzi bali kubeleka mbuli Syaazibwene mumakani aabubambe bwazyintu zipona ku Yunivesiti ya Ferrara ku Italy. Balembi ba Sinsimuka! bakababuzya kujatikizya lusyomo lwabo alimwi asayaansi.

Amutwaambile kujatikizya buumi bwanu.

Bataata bakali kupanga mabbusu, bamaama bakali kubeleka afaamu. Pele mebo ndakali kuyanda kuyooba syaazibwene mumakani aasayaansi. Zyintu zyakali munsi-munsi aaŋanda mbuli maluba-luba, tuyuni, alimwi atuuka zyakali kundikkomanisya cakuti ndakayandisya kuzyiba zinji kujatizya nzizyo. Ndakayeeya kuti kweelede kuti kuli muntu musongo wakazipanga.

Nkokuti lyoonse mwali kusyoma kuti kuli Mulengi?

Peepe. Alimwi buya, ndakatalika kuzumbauzya kuti naa Leza nkwali nindakacili mwana. Ciindi bataata nibakafwa cakutayeeyela abulwazi bwamoyo, ndakalibuzya kuti, ‘Nkaambo nzi Mulengi wazyintu zibotu boobu ncanga wazumizya kupenga alufwu?

Sena kwiiya sayaansi kwakamugwasya kujana bwiinguzi?

Kutali mpoonya-mpoonya pe. Ciindi nindakaba syaazibwene mukulanga-langa tubeela tusyoonto-syoonto twazyintu zipona, ndakatalika kwiiya kujatikizya kufwa kwamaseelo—cilengwa cakufwa kwamaseelo aapanga mibili yesu. Eeci ciliindene akufwa kwamaseelo akaambo kakuceya kwamuya uutegwa oxygen calo cipa kuzimba. Kwainda buyo myaka misyoonto basayaansi nibakatalika kwaabikkila maano makani aaya, nokuba kuti ajatikizya nseba zyesu.

Ino bubambe bwakufwa kwamaseelo aamumubili bulaampindu nzi?

Mubili wesu upangidwe aamaseelo masyoonto-syoonto manji. Maseelo aaya oonse ayelede kufwa alimwi akunjililwa mubusena amaseelo mapya. Bulamfwu bwaciindi ncaapona maseelo aaya buliindene, amwi alafwa kwainda nsondo zisyoonto buyo, mpoonya amwi kwainda myaka misyoonto. Bubambe oobu bwakufwa kwamaseelo bweelede kweendelezyegwa kabotu kutegwa kakupangwa mweelwe wamaseelo weelene awamaseelo aafwa.

Ino ncinzi cikonzya kucitika kuti maseelo kaatafwi?

Buvwuntauzi bumwi butondezya kuti, ikuti maseelo kaatafwi, alakonzya kutalisya bulwazi bwakkansa naa bulwazi bwakuzimba magondo. Kulubazu lumwi, kuti maseelo afwa kacitanasika ciindi ncaayelede kufwa, cilakonzya kutalisya bulwazi bwakulebuka mubili naa bulwazi bwakuluba, ciindi muntu naacembaala. Buvwuntauzi bwangu bujatikizya kujana busilisi kumalwazi aaya.

Ino kwiiya maseelo mbwaafwa kwamujatikizya buti?

Kwaamba masimpe, kwakandinyonganya. Bubambe oobu butondezya kuti wakabupanga wakali kuyanda kuti katupona buumi buli kabotu. Nokuba boobo ndakacijisi mubuzyo wakuti, Ino nkaambo nzi bantu ncobapenga akufwa? Tiindakali kubujana bwiinguzi.

Sena mwakasyoma kuti bubambe bwakufwa kwamaseelo kwakalengwa buya?

Inzya. Bubambe oobu boonse bulakatazya kusyoma, pele butondezya busongo busumpukide kapati. Ndilasyoma kuti mbusongo bwa Leza. Ndibelesya mincini iilaanguzu kapati iitondezya tubeela tusyoonto-syoonto tupa kuti bubambe oobu kabucitika. Bubambe bumwi bulakonzya kunyonyoona maseelo mutuvwalu-vwalu buyo kuti kakuyandika kucita boobo. Maseelo alalinyonyoona alikke. Masimpe ngakuti bubambe oobu bwakalengwa munzila iigambya.

Mwakalijisi mibuzyo iijatikizya Leza alimwi akupenga. Ino mwakabujana buti bwiinguzi?

Mu 1991, Bakamboni ba Jehova bobilo bakubusi bakandiswaya kuŋanda, kumane ndakababuzya kaambo ncotufwida. Bakanditondezya bwiinguzi kuzwa mu Bbaibbele bwakuti: “Cibi . . . cakanjila munyika kwiinda mumuntu omwe alufwu kwiinda mucibi.” (Baloma 5:12) Ikuti muntu wakusaanguna naakamumvwida Leza, naakazumanana kupona kukabe kutamani. Mpoonya aawo ndakazyiba kuti eeci cileendelana anzyondakaiya mubuvwuntauzi. Mubwini, Leza tanaakali kuyanda kuti bantu kabafwa. Akaambo kakuti maseelo oonse aali mumibili yesu alalibambulula, nkokuti kupona kukabe kutamani kulakonzyeka.

Ncinzi cakamupa kusyoma kuti Bbaibbele ndi Jwi lya Leza?

Ndakaiya ncolwaamba lugwalo lwa Intembauzyo 139:16 kuti: “Meso aako akandibona nkencili insalalila; mubbuku lyako zizo zyangu zyoonse kazilembedwe.” Mbuli syaazibwene musayaansi, ndakaiya kujatikizya makani aalembedwe mumaseelo eesu. Ino sintembauzyo wakaazyiba buti makani aaya? Akaambo kakwiiya Bbaibbele, cakandipa kusyoma kuti Bbaibbele lyakalembwa a Leza.

Ino mwakagwasyigwa buti kumvwisya ncoliyiisya Bbaibbele?

Kamboni wa Jehova umwi wakatalika kundiyiisya Bbaibbele. Muciiyo eeci, ndakaiya kaambo Leza ncalekelede kuti katupenga. Alimwi, kweelana a Bbaibbele ncolyaamba, ndakaiya kuti Leza ulijisi makanze ‘aakulumena lufwu kukabe kutamani.’ (Isaya 25:8) Ncuuba-uba kumulengi wesu kupa kuti mubili wesu utalike alimwi kubeleka munzila iilondokede kutegwa tukacikonzye kupona buumi butamani.

Mbuti mbomwalubelesya luzyibo lwamu Bbaibbele kugwasya bamwi?

Ndakaba Kamboni wa Jehova mu 1995, mpoonya kuzwa leelyo ndilabelesya ciindi cili coonse kwaambila bamwi kujatizya zyintu nzyondakaiya mu Bbaibbele. Mucikozyanyo, mubelesima wakalinyongene ciindi mwanookwabo musankwa naakalijaya. Kucikombelo cakwe bayiisya kuti Leza talekeleli bantu balijaya. Pele ndakamutondezya mu Bbaibbele kujatikizya bulangizi bwabubuke. (Johane 5:28, 29) Wakaumbulizyigwa kuzyiba kuti Mulengi ulatulanganya. Muzyiindi zili boobu, ndilimvwa kuti kwaambila bamwi kasimpe kamu Bbaibbele kundipa kulimvwa kukkutila.

[Cifwanikiso icili apeeji 6]

[Cifwanikiso icili apeeji 6]

[Majwi aakwelelezya sikubala aali apeeji 7]

Akaambo kakuti maseelo oonse aali mumibili yesu alalibambulula, nkokuti kupona kukabe kutamani kulakonzyeka