Ndakajana Bulangizi Aciindi Ceelede

NDAKAZYALILWA mudolopo lya Szerencs alimwi ndakakomenena mumunzi wa Tiszaladány kunyika lwaajwe mucisi ca Hungary. Mu June 1991, mebo abeenzuma twakaunkide kukusaya mu Mulonga wa Tisza abusena mbotwatakazyi kabotu. Kandiyeeya kuti maanzi akali malamfwu, ndakasotokela mumo. Ooku kwakali kulubizya kupati! Tufwuwa twangu twamumukosi totatwe twakatyoka alimwi amoongolola wakanyongana. Mweenzuma wakabona kuti tiindakali kucikonzya kuputauka, aboobo cakufwambaana wakandikwela kuzwa mumaanzi kabotu-kabotu.

Mbwaanga ndakalizyi izyakali kucitika, ndakazyiba kuti kuli cintu cimwi calubila. Aboobo, muntu umwi cakufwambaana wakaita basikupa lugwasyo, mpoonya cipolopela cakasika akunditola kucibbadela, kwalo bamadokota nkobakasilika moongolola wangu. Nokwakainda ciindi, ndakalonzyegwa kuyoosilikilwa kudolopo mpati, Budapest. Kwamyezi yotatwe, tiindakali kucikonzya kukkala. Nokuba kuti ndakali kucikonzya kunyanyaasya mutwe, milambi yoonse kuzwa mumakkuko kusikila kumaulu tiiyakali kubeleka. Kandijisi myaka yakuzyalwa iili 20, tiindakali kucikonzya kulicitila zintu ndelikke. Ndakatyompwa kapati cakuti ndakali kuyanda buyo kufwa.

Ciindi nicakasika cakuti nduunke kuŋanda, bazyali bangu bakayiisyigwa kujatikizya mbobakeelede kundilanganya. Nokuba boobo, mulimo wakundilanganya wakali muyumu, alimwi nokwakainda ciindi citandila kumwaka, ndakatalika kuciswa bulwazi bwakutyompwa. Aciindi eeco, ndakatambula lugwasyo kuli basyaazibwene, calo cakandigwasya kucinca mbondakali kukubona kulemana kwangu.

Alimwi ndakatalika kuyeeya kapati kujatikizya buumi. Sena bulijisi mpindu? Nkaambo nzi ntenda eeyi ncoyakandicitikila? Ndakabala mamagazini alimwi amabbuku kuyandaula bwiinguzi. Ndakasola kubala Bbaibbele, pele cakandiyumina kulimvwisya. Aboobo, ndakacileka kulibala. Alimwi buya ndakabandika amupaizi, pele tiindakakkutila azintu nzyaakandaambila.

Mpoonya, lyacilimo mu 1994, Bakamboni ba Jehova bobilo bakaswaya bataata, mpoonya bataata bakabalomba kuti babandike andime. Ndakaswiilila nobakali kupandulula makanze aa Leza aakusandula nyika kuba paradaiso alimwi akugwisya malwazi akupenga. Zintu zyoonse nzyobakandaambila zyakandikkomanisya, pele ndakacili kudooneka. Nokuba boobo, ndakatambula mabbuku obilo aabelesyegwa kwiiya Bbaibbele. Nondakamana kwaabala mabbuku aaya, Bakamboni bakalyaaba kutalika kundiyiisya Bbaibbele, aboobo ndakazumina. Alimwi bakandikulwaizya kuti kandipaila.

Mboyakali kuyaabuzumanana mibandi yesu, ndakabujana bwiinguzi kuzwa mu Bbaibbele kumibuzyo minji njondakajisi. Alimwi ndakazyiba kuti masimpe Leza ulandilanganya. Mpoonya mu September 13, 1997, nondakamana kwiiya Bbaibbele kwamyaka yobilo, ndakabbapatizyigwa mucibbaafa, muŋanda. Oobo bwakali buzuba bukkomanisya kapati kulindime.

Mu 2007, ndakalongela limwi ku Budapest kuŋanda yabalema. Kulonga ooku kwandipa zyoolwe zinji zyakwaambila bamwi zintu zibotu nzyondaiya. Ciindi nobwaca kabotu, ndilacikonzya kuunka aanze akwaambaula abantu, ndilalumba kapati akaambo kakacinga kabalema kalo nkondeenzya kwiinda mukubelesya mweebo wangu.

Akaambo kalugwasyo lwakumubili kuzwa mumbungano mondizulilwa, ndakajana laputopu yalo iibeleka kwiinda mukuzyiba mbondinyanyaasya mutwe. Laputopu eeyi ilandigwasya kutumina bantu fooni kubelesya Intaneti alimwi akulemba magwalo kuli bamukamwini ŋanda ibatakali aŋanda ciindi bakwesu alimwi abacizyi bamumbungano yangu nobakabaswayide. Kugwasya bamwi munzila eeyi kwandigwasya kucizyiba kabotu kubandika alimwi akutayeeya kapati mapenzi aangu.

Alimwi ndilacikonzya kujanika kumiswaangano ya Bunakristo. Alimwi nondisika a Ŋanda ya Bwami, bakwesu balandinyamuna kabotu-kabotu akacinga kangu kabalema akunditola muŋanda yamujulu imucitilwa miswaangano. Lyamiswaangano, ciindi baswiilizi nobapegwa coolwe cakwiingula, mukwesu uukkede munsi-munsi lyangu ulatambika janza akundijatila Bbaibbele naa bbuku ndyotubelesya ciindi nondipa bwiinguzi.

Lyoonse mubili ulacisa alimwi ndiyandika bamwi kundicitila zyoonse nzyondiyandika. Aboobo, ziindi zimwi inga ndilatyompwa. Pele ndilajana luumbulizyo kucilongwe ncondijisi a Jehova Leza, akaambo kakuzyiba kuti ulaswiilila ciindi nondimwaambila camoyo woonse kujatikizya nzyondilibilika. Ndilayumizyigwa kwiinda mukubala Bbaibbele abuzuba alimwi amubakwesu abacizyi. Luyando ndobatondezya kulindime bakwesu abacizyi mumbazu zisiyene-siyene, alimwi amipailo yabo ilandigwasya kuliyumya.

Jehova wakandipa luumbulizyo aciindi ceelede. Alimwi wakandipa bulangizi bwabuumi bulondokede munyika mpya. Aboobo, ndilangila ciindi nondiyakucikonzya ‘kweenda alimwi akusotoka akumutembaula’ akaambo kaluyando alimwi aluzyalo lwakwe luteeli.—Milimo 3:6-9.