Ndilikkomene Nokuba Kuti Ndililemene
Akaluulwa aba Paulette Gaspar
Nokuba kuti ndakali kulema buyo makkilo otatwe [3kg] nindakazyalwa, badokota bakalizyi kuti kuli cilubide kulindime. Nindakazyalwa mafwuwa aangu akatyoka. Ndiciswa bulwazi bwiitwa kuti osteogenesis imperfecta naa bulwazi bupa kuti mafwuwa kaalebuka. Bakanditola kucibbadela kutegwa bakandaandule pele bamadokotela bakali kuyeeya kuti ndilafwa. Bakali kuyeeya kuti taliko kubbila.
NDAKAZYALILWA ku Canberra, idolopo mpati yaku Australia mu June 14, 1972. Mukwiimpana ambobakali kuyeeya bamadokotela, tiindakafwa buzuba oobo. Pele ndakatalika kuciswa bulwazi bumwi bwakufwundilila. Akaambo kakuti bakali kuyeeya kuti ndilafwa, bamadokotela tiibakandipa musamu uuli woonse. Pele tiindakafwa pe.
Cakutadooneka, bazyali bangu bakapenga kapati. Akaambo kakuti ndakali kulangilwa kufwa, bamadokotela bakaambila bazyali bangu kuti batani kundibikkili maano. Alimwi myezi yotatwe njondakakkala mucibbadela, bazyali bangu tiibakali kuzumizyigwa kundijata. Bakali kuyeeya kuti balandicisa. Nobakazyiba kuti tandiko kufwa, bamadokotela bakaambila bazyali bangu kuti kandikkala kubusena kuli bana balemene.
Pele muciindi cakunditola kooko, bazyali bangu bakanditola kuŋanda. Aciindi eeci bamaama bakali kwiiya Bbaibbele a Bakamboni ba Jehova. Nzyobakali kwiiya zyakabapa kuti kabandilanganya naa kundibikkila maano. Pele kweelede kuti cakali ciyumu kutalika kumvwana andime akaambo kakuti nguzu zyabo zyoonse bakazimanina kucibbadela nindakali kuciswa. Ziindi zinji bakali kunditola kucibbadela. Mafwuwa aangu akali kulebuka ikuti kandisamba. Nokuba buyo kweesyemuka mafuwa akali kulebuka.
Ndakatyompwa Kapati
Nindakali kukomena ndakali kukkalila akacinga. Tiindakali kulangilwa kuti ndiya kweenda. Nokuba kuti zyintu zyakali boobo, bazyali bangu bakali kundibikkila maano.
Kunze lyaboobo, bamaama bakali kundiyiisya makani aamu Bbaibbele aumbulizya. Mucikozyanyo, bakandiyiisya kuti kumbele Leza uya kupa kuti nyika ibe paradaiso alimwi bantu banakukkomene alimwi kunyina bantu nibani kuciswa. (Intembauzyo 37:10,11; Isaya 33:24) Nokuba boobo, bamaama bakaamba kuti tiibakali kuyeeya kuti ndilakonzya kukkomana ccita kuti Leza akaisandule nyika kuba paradaiso.
Nindakatalika cikolo ndakali kwiiya abalema. Bayi bangu bakali kwaamba kuti kunyina nondiya kuzwidilila, andime mbondakali kuyeeya oobo. Ikuunka kucikolo lyakali penzi. Bana bacikolo tiibakali kabotu. Kumane bakandilonzya akunditola kucikolo cabana batalemene. Ikuzyibilana abantu bamwi cakali kukatazya. Nokuba boobo, ndakali kuyanda kuti ndimanizye cikolo.
Nindakali kusekondali, ndakabona kuti mbondakali kwiiya limwi bakanyina bulangizi alimwi kunyina ncobakali kucita. Alimwi ndakali kuyeeya nzyobakandiisya bamaama kuzwa mu Bbaibbele. Ndakalizyi kuti nzyobakali kwaamba zyakali zyamasimpe. Pele nzyondakali kwiiya mu Bbaibbele aciindi eeco tiindakali kuzibikkila maano. Ndakali kuyanda kuti ndilikkomanisye kakunyina kuyeeya cikonzya kundicitikila.
Nindakakwanya myaka iili 18 ndakalonga aŋanda yabazyali bangu kumane ndakatalika kukkala abeenzuma balema. Ndakali kkomene pesi mumoyo kandiyoowede. Kulikkalila akusobana abeenzuma zyakali kukkomanisya kapati. Beenzuma banji bakakwatwa. Andime ndakali kuyanda muntu uukonzya kundikwata. Pele akaambo kabulema ndakalizyi kuti kunyina muntu uukonzya kundikwata. Ndayeeya boobo ndakali kulila.
Nokuba kuti zyintu zyakali boobu, kunyina nindakamupa mulandu Leza. Kweelana azyintu nzyondakaiya, ndakalizyi kuti Leza takonzyi kucita zyintu zibi. (Jobu 34:10) Ndakalizyi kuti tandikonzyi kubugusya bulema. Nokuba boobo, ndakatyompwa kapati.
Mbondakatalika Kukkomana Alimwi
Bamaama bakazyi kuzyiba kuti tandili kabotu aboobo bakaambila mwaalu wakumbungano iili kufwaafwi ankondakali kukkala. Mwaalu wakanduumina luwaile akunditamba kumiswaangano ya Bunakristo ku Ŋanda ya Bwami ya Bakamboni ba Jehova iili afwaafwi. Kunze lyaboobo, mucizyi umwi mumbungano wakatalika kwiiya Bbaibbele andime ciindi comwe ansondo.
Notwakali kwiiya ndakali kuyeeya nzyobakali kundiyiisya bamaama kaindi, aboobo buumi ndakatalika kububona kuti bulaampindu. Ndakali kukkomana kukkala a Banakristoma. Nokuba boobo, tiindakali kubaambila bantu mbondakali kulimvwa akaambo kakuti ndakali kuyoowa kuti inga ndatyompwa. Eeci cakandipa kuti nditamuyandi kapati Leza. Nokuba boobo ndakalizyi kuti ndeelede kulyaaba kuli Leza. Aboobo, mu December 1991 ndakabbapatizyigwa kutondezya kulyaaba kwangu.
Ndakalonga muŋanda mundakali kukkala abeenzuma balema akutalika kukkala ndelikke. Kulonga ooku kwakandigwasya alimwi kwakandiletela mapenzi. Mucikozyanyo, ndakali kulendelelwa. Alimwi ndayeeya makani aabakabwalala naa bantu bajata bana basimbi ndakali kuyoowa kapati. Tiikwakainda ciindi cilamfwu ndakakopana alimwi. Nokuba kuti ndakali kulibonya mbuli kuti ndilikkomene, kwaamba masimpe tiindakali kkomene pe. Ndakali kuyanda muntu uukkalikene uukonzya kundigwasya.
Jehova Leza wakandipa muntu uuli boobu. Baalu mumbungano bakaambila mucizyi uukwetwe wazyina lya Suzie kuti azumanane kundiyiisya Bbaibbele. Ba Suzie tiibakali buyo bayi, bakali beenzuma mbundakali kuyanda kapati.
Ba Suzie bakandiyiisya kwaambila bantu nzyondakali kwiiya—mumulimo wakuŋanda aŋanda amukwiizya. Lino ndakatalika kubumvwisya bube bwa Leza. Pele, nokuba kuti ndakali bbapatizyidwe, tiindakali kumuyanda kapati Leza. Ciindi cimwi ndakali kuyeeya kucileka kumukomba. Ndakabaambila ba Suzie alimwi bakandigwasya.
Ba Suzie alimwi bakandigwasya kuzyiba kuti icakali kundipa kutakkomana kapati ncakuti ndakali kusobana abantu batakali kumuyanda kapati Jehova. Aboobo ndakatalika kumvwana abantu basimide kumuuya ikapati bapati-pati. Alimwi bamaama tiitwakali kumvwana kapati aboobo ndakatalika kumvwana ambabo amupati wangu musankwa. Eeci cakapa kuti ndikkomane kapati kwiinda mbocakabede kaindi. Bakwesu abacizyi, bamukwasyi wangu a Jehova mbabakali kundipa kukkomana alimwi bakali kundiyumya-yumya.—Intembauzyo 28:7.
Mulimo Mupya
Nindakazwa kumuswaangano umwi wacooko ikwakali makani aatondezya lukkomano ndobajana bantu bali mumulimo wa Bunakristo waciindi coonse, ndakabona kuti kunyina cakali kundikasya kutalika mulimo ooyu. Masimpe, ndakalizyi kuti mulimo ooyu muyumu akaambo kambondibede. Pele nindakamwaambila Jehova makani aaya mumupailo, ndakalembela mulimo waciindi coonse wakuyiisya bantu Bbaibbele. Aboobo, mu April 1998 ndakatalika bupainiya, nkokuti mukambausi waciindi coonse wa Bakamboni ba Jehova.
Ino mbuti mbondikonzya kukambauka mbwaanga ndililemene? Masimpe ngakuti ndili muntu uuyanda kulibelekela alimwi tandiyandi kupa bantu mukuli, mbuli kundikkwezyeka mootoka naa milimo imwi buyo. Aboobo ba Suzie abalumi babo ba Michael bakandaambila kuti nduule kahonda. Pele akaambo kakuti ndililemene tiindaali kuyeeya kuti ndilakonzya kukeenzya. Nokuba boobo , kweelana acifwanikiso mbocitondezya, kahonda aaka kakabambilwa buyo ndime. Aboobo ndilakonzya kucita kufwumbwa ncindiyanda kandikkede akacinga aaka.
Akaambo kakuti ndijisi kahonda aaka, ndilakonzya kujana ciindi cakuswaya akwiisya bantu Bbaibbele kweelana aciindi ncotwakamvwana. Ndilakkomana kweenzya kahonda aaka nkaambo ndilaakumwa muwo, cintu cimwi cindikkomanisya mubuumi bwangu.
Ndilaakukkomana kwaambaula abantu munzila, nkaambo balandilemeka. Ndilakkomana kugwasya bantu kwiiya makani aamu Bbaibbele. Ndilayeeya buzuba bumwi nindakali mumulimo wakuŋanda aŋanda amweenzuma mulamfwu. Mweenzuma wakamwaanzya mwiniŋanda walo iwakaile kundilanga kagambwide akubuzya mweenzuma kuti, “Sena mweenzyinyoko ulaambaula?” Twakaile kugwagwamuka kuseka. Nindakamana kumukambaukila, mukaintu ooyu wakazyi kuzyiba kuti anu ndilaambaula.
Ndilikkomene lino alimwi ndayiya kumuyanda Jehova Leza. Ndilabalumba bamaama akaambo kakundiyiisya kasimpe kamu Bbaibbele, ndisyoma kuti ino-ino Leza ‘uyakulengulula zyintu zyoonse’ kubikkilizya amubili wangu muniini.—Ciyubunuzyo 21:4, 5.
Majwi aakwelelezya sikubala aali apeeji 26]
“Ndakalizyi kuti tandikonzyi kubugusya bulema. Nokuba boobo, ndakatyompwa kapati”