LAIBBULALI YAA INTANETI ya Watchower
Watchtower
LAIBBULALI YAA INTANETI
Chitonga
  • BBAIBBELE
  • ZYAKAMWAIGWA
  • MISWAANGANO
  • g 2/15 map. 10-11
  • Ikuti Mwanaanu Wabuzya Kujatikizya Lufwu

Kunyina vidiyo aawa mpomwasala.

Vidiyo yakaka kulila.

  • Ikuti Mwanaanu Wabuzya Kujatikizya Lufwu
  • Sinsimuka!—2015
  • Makani Aakozyenye
  • Amumugwasye Mwanaanu Kuliyumya Mubuumba
    Ngazi Yamulindizi—2008
  • Ikuti Mwana Kayanda Kulijaya
    Lugwasyo Kumukwasyi
  • Nobazyali, Amubagwasye Bana Banu Kuyumya Lusyomo Lwabo
    Ngazi Yamulindizi Yaambilizya Bwami bwa Jehova (Yakwiiya)—2024
  • Mbomukonzya Kukaka
    Sinsimuka!—2014
Amubone Azimwi
Sinsimuka!—2015
g 2/15 map. 10-11
Usyi ulabandika amwanaakwe

LUGWASYO KUMUKWASYI | KUKOMEZYA BANA

Ikuti Mwanaanu Wabuzya Kujatikizya Lufwu

BUYUMUYUMU

Mwanaanu uujisi myaka iili cisambomwe wamubuzya kuti: “Sena buzuba bumwi muyoofwa?” Kamugambidwe amubuzyo wakwe, mwalyaambauzya akuti: “Sena mwanaangu ulakonzya kubumvwisya bwiinguzi? Ino mbuti mbondikonzya kubandika anguwe makani aajatikizya lufwu?”

NCOMWEELEDE KUZYIBA

Bana balayeeya kujatikizya lufwu. Bamwi nobasobana balicengeezya kuba muntu uufwide. Aboobo, makani aalufwu taayelede kubonwa kuti alatondwa, alimwi mweelede kwiiswiilila kufwumbwa mibuzyo njakonzya kubuzya mwanaanu. Kwiinda mukubandika makani aalufwu cakusalazya ciindi aciindi, muyoogwasya mwanaanu kuzyiba mbwakonzya kuliyumya ciindi nokwafwa muyandwa.

Kubandika makani aalufwu tacikonzyi kupa kuti mwanaanu atalike kuyoowa. Muciindi caboobo, ciyoomupa kucesya-cesya bukandu. Nokuba boobo, muyandika kubambulula twaambo tutaluzi. Mucikozyanyo, basyaazibwene bamwi baamba kuti bana banji ibajisi myaka iitasiki kucisambomwe babona kuti bantu tabafwidilili. Muzisobano zyabo, mwana ulakonzya kulicengeezya kuti wafwa pele kwainda ciindi ulabuka alimwi.

Nokuba boobo ciindi nobakomena asyoonto, bana balatalika kumvwisya ncocaamba kufwa calo icikonzya kubapa kubuzya mibuzyo, kulibilika naa kuyoowa ikapati kuti kuli muyandwa umwi wafwa. Aboobo, cilayandika kuti kamwaabandika makani aaya. Marion Haza, syaazibwene mumakani aajatikizya mizeezo waamba kuti: “Mwana ulakonzya kutalika kulibilika kujatikizya makani aalufwu kuti wabona kuti tazumizyigwi kubandika makani aaya kuŋanda.”

Tamweelede kulibilika kapati kujatikizya nzyomukonzya kwaamba. Kweelana abuvwuntauzi bumwi, bana inga bayanda buyo “kuzyiba makani aamasimpe aambwa munzila iili kabotu.” Amuzyibe kuti mwana takonzyi kubuzya mubuzyo kuti katalibambilide kuswiilila bwiinguzi.

NCOMUKONZYA KUCITA

Amubelesye coolwe cili coonse kubandika makani aalufwu. Ikuti mwanaanu wabona kayuni kafwide kumbali aanzila naa civwube cifwide ncomuyandisya, amubelesye mibuzyo myuuba-uba kumukulwaizya kubandika. Mucikozyanyo, mulakonzya kubuzya kuti: “Sena munyama uufwide ulapenga? Sena ulamvwa kutontola naa kufwa nzala? Ino inga wazyiba buti kuti munyama naa muntu wafwa?”—Njiisyo yamu Bbaibbele: Mukambausi 3:1, 7.

Amumwaambile masimpe. Ciindi mulongwe naa wacibbululu naafwa, mutanoobelesyi majwi aamaambilambali mbuli aakuti “Watusiya.” Mwanaanu ulakonzya kuyeeya kuti muntu ooyo wamusiya kuli nkwaunka pele ulajokela alimwi. Muciindi caboobo, amubelesye majwi aatakatazyi kumvwa alimwi aagaminide. Mucikozyanyo, mulakonzya kwaamba kuti: “Ciindi bakaapanyoko nobakafwa, mubili wabo wakacileka kubeleka. Tatukonzyi kubandika ambabo, pele tunoobayeeya lyoonse.”—Njiisyo yamu Bbaibbele: Baefeso 4:25.

Mbwaanga mwana muniini inga wabona mbuli kuti lufwu lulatambukila, amumwaambile cakusinizya kuti kunyina cibi citiimucitikile.

Amumuyumye-yumye mwanaanu. Mwanaanu ulakonzya kuyeeya kuti zintu zimwi nzyaakacita naa kwaamba nzizyakapa kuti muntu umwi afwe. Muciindi buyo cakumwaambila kuti talinguwe wakapa kuti muntu umwi afwe, mulakonzya kumubuzya kuti: “Ino nkaambo nzi ncoyeeya kuti nduwe wakapa kuti afwe?” Amuswiililisye kakunyina kuubya-ubya mbwalimvwa. Kunze lyaboobo, mbwaanga mwana muniini inga wabona mbuli kuti lufwu lulatambukila, amumwaambile cakusinizya kuti kunyina cibi citiimucitikile.

Amumukulwaizye kwaamba mbwalimvwa mwanaanu. Amubandike cakwaanguluka kujatikizya bayandwa banu ibakafwa, kubikkilizya abacibbululu mbaatakabona mwanaanu. Mulakonzya kumuyeezya mwanookwanu mukaintu, naa baacisyanyina, naa bakaapanyina akwaamba kaambo kamwi ikakkomanisya kujatikizya mbabo. Nomubandika cakuliiba kujatikizya bantu aaba, mugwasya mwanaanu kumvwisya makani aakuti takuli kuti weelede kucileka kubayeeya naa kubandika kujatikizya mbabo. Alimwi mutamusinikizyi kwaambaula mwanaanu. Mulakonzya kuutalika alimwi mubandi uuli boobu aciindi cimwi, nomwabona kuti cileelela kucita boobo.—Njiisyo yamu Bbaibbele: Tusimpi 20:5.

Cibalo 34 a 35 mubbuku lya Amwiiye ku Mwiiyi Mupati cilakonzya kugwasya bana banu kwiiya ncoliyiisya Bbaibbele kujatikizya lufwu. kakunyina kubbadela. Amubone aalembedwe kuti MABBUKU > MABBUKU AMABROSHUWA

MAGWALO AAYANDIKA

  • Kuli “ciindi cakuumuna aciindi cakwaambaula.”—Mukambausi 3:1, 7.

  • “Umwi aumwi wanu aambe zyamasimpe.”—Baefeso 4:25.

  • “Mizeezo iili mumoyo wamuntu ili mbuli maanzi aali mumugoti mulamfwu, pele mupampu nguukonzya kwiiteka.”—Tusimpi 20:5.

TWAAMBO TUPATI-PATI TUYANDIKA IKWAAMBWA

Ikuti mwafwidwa muyandwa wanu, mulakonzya kumugwasya mwanaanu kutalibilika kujatikizya lufwu kwiinda mukusinizya kuti watumvwisya twaambo itutobela:

  • Kuti awalo takoofwa.

  • Kuti cintu cimwi cacitika kulindinywe, takacaali alikke pe; banamukwasyi bambi bayoomulanganya.

  • Kuti muntu wafwa, tacipengi pe.

  • Muntu iwafwa tunoomuyeeya lyoonse. Mulakonzya kwaamba kuti: “Tokonzyi kubabona alimwi bakaapanyoko, pele inga wazumanana kubayeeya.”

Amuyeeye kuti, kuumuna buyo tacikonzyi kupa mwanaanu kucesya-cesya kulibilika nkwajisi. Muciindi caboobo, cilakonzya kumupa buyo kuyeeyela kufwumbwa caboola mumizeezo yakwe.

    Chitonga Publications (1991-2025)
    Log Out
    Log In
    • Chitonga
    • Amutumine Bamwi
    • Makani Ngomuyanda
    • Copyright © 2025 Watch Tower Bible and Tract Society of Pennsylvania
    • Nzyomweelede Kuzumina
    • Mulawo Uujatikizya Kubamba Maseseke
    • Privacy Settings
    • JW.ORG
    • Log In
    Amutumine Bamwi