MAKANI AAYEEME AMUTWE UULI ACIVWUMBYO | SENA BBAIBBELE LILAYANDIKA MAZUBA AANO?
Njiisyo Zigwasya Lyoonse Kubantu Boonse—Luyando
NJIISYO YAMU BBAIBBELE: “Amulisamike luyando, nkaambo ncecaanzyo calukamantano cilondokede.”—Bakolose 3:14.
IBUBOTU BULIKO: Luyando ilwaambwa kapati mu Bbaibbele taluli loolo ilujatikizya makani aakoonana. Muciindi caboobo, nduyando lubonwa kwiinda mubube mbuli lweetelelo, kulekelela, kulicesya, kusyomeka, luzyalo, kubomba moyo alimwi akukkazika moyo. (Mika 6:8: Bakolose 3:12, 13) Kwiindana aluyando lutali lwini-lwini lwalo ilumana mukuya kwaciindi, luyando ilwaambwa kapati mu Bbaibbele lulazumanana kukomena.
Ba Brenda, ibajisi myaka iitandila ku 30 mucikwati baamba kuti: “Luyando ndobajisi banabukwetene bapya talukonzyi kweezyanisyigwa aloolo lujanwa ciindi cikwati nocakkala kwamyaka minji.”
Ba Sam, imwaalumi uujisi myaka iinda ku 12 mucikwati waamba kuti: “Mebo abakaintu bangu lyoonse twalikukkomana, zimwi ziindi akugambwa kubona lulayo lwamu Bbaibbele mbolugwasya alimwi ambolutakatazyi! Lwatobelwa, zintu zyeenda kabotu. Nokuba kuti inga ndaamba kuti lyoonse ndilalutobela, pele zimwi ziindi cilandaalila. Eeci cilacitika ikuti ndafwambaana kunyema, nondiyanda buyo kulikkomanisya ndemwini alimwi aciindi nondikatede. Muziindi zili boobu inga ndilamulomba Jehova kundigwasya kuti nditabi amizeezo mibi. Mpoonya ndilamukumbata mukaintu wangu, kalitanalampa zintu zilabota mbuli kuti kunyina cacitikide!”
“Busongo bulabonwa kuti buliluleme kwiinda mumilimo yambubo”
Jesu Kristo wakaamba kuti “busongo bulabonwa kuti buliluleme kwiinda mumilimo yambubo.” (Matayo 11:19) Aboobo inga twaamba kuti Bbaibbele nkekasensa kabusongo bwini-bwini. Njiisyo zijanika mumo zilagwasya lyoonse, tacikwe makani azilengwa naa cisi nkwazwa muntu. Alimwi zitondezya busongo mbobayandika bantu alimwi zizwa ku Mulengi wesu, Jehova Leza. Tulakonzya kusinizya twaambo toonse ootu ikuti twazitobela njiisyo eezyi. Aboobo Bbaibbele litwaambila kuti “amulabile mubone kuti Jehova mubotu.” (Intembauzyo 34:8) Sena muyoocita oobo?