MAKANI AAYEEME AMUTWE UULI ACIVWUMBYO
Kulwana Penzi Lyakutazyiba Mwaambo Kulanga-langa Mulimo Uucitwa Kulwana Penzi Eeli
“Zimwi ziindi kwaambwa kuti mulimo wakusandulula ngomulimo uukatazya kapati kwiinda milimo yoonse.”—“The Cambridge Encyclopedia of Language.”
KAUTANATALIKA mulimo wakusandulula mabbuku aa Bakamboni ba Jehova, balembi balalibambila, balavwuntauzya, mpoonya akulemba kabotu-kabotu. Ciindi nokucitwa milimo eeyi, bamu Dipatimenti Iilanganya Zilembwa kumaofesi mapati ku New York balazilanga-langa kabotu-kabotu izyakalembwa kutegwa basinizye naa zililuzi alimwi akubona naa ngomwaambo uubelesyegwa mazuba aano alimwi akuti uli kabotu.a
Mpoonya bamu Dipatimenti Iilanganya Zilembwa balazituma zyakusandulula kutubunga twabasanduluzi nyika yoonse, bunji bwabo bakkala mumasena mwaambo ngobasandulula moukananwa. Bunji bwabo basandulula mumwaambo wabo. Beelede kuumvwisya mwaambo wa Chingisi alimwi amwaambo ngobasandulula.
Ino basanduluzi baubeleka buti mulimo wabo?
Ba Geraint, musanduluzi uukkala ku Britain bakaamba kuti: “Ndibeleka aakabunga kabasanduluzi, aboobo kubelekela antoomwe ncecintu ciyandika kapati. Tubelekela antoomwe kujana nzila mbotukonzya kusandulula zibeela zikatazya. Twanoosandulula, inga tatulangi buyo mabala pele amuzeezo ngotujana twaabika antoomwe mabala. Tulalanga cini ncaamba mabala alimwi amakanze, kumwi katubayeeyede ibalembelwa cibalo cimwi acimwi.”
Ino makanze nzi ngomujisi mbomuli basanduluzi?
“Makanze eesu ngakuti ciindi muntu nabala amvwe mbuli kuti makani akalembwa mumwaambo wakwe. Taayelede kulimvwisya kuti ngakusandulula buya. Aboobo, tulasolekesya kubelesya mwaambo ngobabelesya bantu. Munzila eeyi, sikubala tulamusika amoyo alimwi ulazumanana kubala kamvwide mbuli kuti ulya cakulya cibotu kapati icitakatazyi kutafwuna.”
Ino mbubotu nzi buliko akaambo kakukkala mubusena mowaambaulwa mwaambo?
“Kuba antoomwe abantu bamucilawo kutugwasya kusandulula munzila njobakonzya kumvwa. Okuno ku Wales kwalo bantu banji nkobaambaula mwaambo waci Welsh, tulabamvwa kabaambaula mwaambo ooyu buzuba abuzuba. Kuyungizya waawo, tulababuzya bantu bamucilawo kumvwa mabala naa ali kabotu, alamvwika alimwi naa alakwelelezya. Eeci cilatugwasya kulemba muzeezo wini uuli mu Chingisi.”
Ino mulimo wanu muubeleka buti?
“Kabunga kabasanduluzi kalapegwa mulimo wakusandulula. Cakusaanguna, umwi aumwi mukabunga aaka, ulacibala cibalo camu Chingisi kumvwa caambwa alimwi akuzyiba bantu balembelwa. Tulalibuzya kuti: ‘Ino cibalo eeci cijisi makanze nzi? Ino cibalo eeci cijisi makani nzi? Ino ncinzi ncondilangila kwiiya mucibalo eeci?’ Kucita boobu kutugwasya kuzyiba zintu zikonzya kutugwasya ciindi notusandulula.
“Cabili, bantu ibali mukabunga balabandika antoomwe mizeezo yabo, kumvwa aumwi mbwayeeya. Sena tuli masimpe kuti twacimvwisya cibalo? Ino inga twacisandulula buti kutegwa ceendelane a Chingisi? Makanze eesu ngakuti basikubala mwaambo wasandululwa bakalimvwe mbubwenya mbobatiikalimvwe basikubala Chingisi.”
Ino bantu bali mukabunga babelekela buti antoomwe?
“Makanze eesu ngakuti basikubala bacimvwisye cibalo mbobacibalila buyo ciindi cakusaanguna. Kutegwa tusandulule munzila iimvwika, tulacibala cibalo icasandululwa cakwiinduluka-induluka.
“Musanduluzi ulataipa muncali kubelesya kkompyuta, kusandulula kuzwa mu Chingisi kutola mumwaambo ngwasandulula, katubwene amasikkilini aamakkompyuta eesu. Mpoonya tulalanga-langa akubona kuti kunyina muzeezo wasyaala naa wayungizyigwa. Alimwi tulalanga-langa akubona naa cibalo casandululwa kabotu kweelana amwaambo mbowaambaulwa, kulanga mabala kuti aliluzi, alimwi amboulembwa mwaambo. Mpoonya umwi ulaubala muncali ooyo cakupozya. Ikuti ciindi nabala wabbabbalika, tulalanga-langancaacitila boobo. Camana kusandululwa cibalo coonse, umwi ulacibala cakupozya mpoonya bamwi balabikkila maano kumvwa naa kuli mpocinyongene kutegwa bacibambulule.”
Eeco cimvwika mbuli kuti mulimo mupati, tee kayi!
“Inzya! Alimwi casika ciindi cakukotoka, inga tulikatede. Pele tulacilanga-langa alimwi cibalo mafwumofwumo katutakatede. Kwainda nsondo zili mbozibede, bamu Dipatimenti Iilanganya Zilembwa balatutumina kucinca kwamamanino ikuyandika ku Chingisi. Mpoonya tulainduluka kucibala cibalo kutegwa tusinizye kuti cililuzi alimwi akuti tacikatazyi kumvwa.”
Ino nzibelesyo nzi zyaakkompyuta nzyomubelesya?
“Makkompyuta taakonzyi kunjila mubusena bwabasanduluzi. Pele Bakamboni ba Jehova babamba zibelesyo izigwasya kuti mulimo wesu uube-ube. Cibelesyo cimwi, musyobo wadikisyinali mwalo imuli mabala aavwula kubelesyegwa. Mpoonya cibelesyo cimbi citugwasya kuvwuntauzya akujana makani aakasandululwa kale mumwaambo wesu, alimwi akubona mbozyakasandululwa zibeela zimwi zikatazya.”
Ino mulimvwa buti kujatikizya mulimo wanu?
“Mulimo wesu tuubona kuti ncipego kubuleya. Alimwi tuyanda kuti tuubeleke kabotu mulimo ooyu kutegwa bantu kabakkomana kubala nzyotusandulula alimwi akugwasyigwa anzizyo. Tulakkomana kapati kubona kuti cibalo camumagazini naa caa Intaneti kacimusika amoyo sikubala alimwi akucinca buumi bwakwe.”
Zilongezyo Zitamani
Munyika yoonse, bantu banji balagwasyigwa kwiinda mukubala mabbuku mumwaambo wabo aakalembwa aa Bakamboni ba Jehova. Busongo bugwasya ibujanwa mumabbuku amumavidiyo aabo, kubikkilizya aawebbusaiti yabo ya jw.org, buzwa mu Bbaibbele. Kayi mubbuku eeli lisetekene, Leza uujisi zina lyakuti Jehova, utwaambila kuti uyanda kuti mulumbe wakwe waambilizyigwe kubantu ‘bamasi oonse, kumisyobo yoonse, akumilaka yoonse.’—Ciyubunuzyo 14:6.b
a Izisandululwa inga zisaanguna kulembwa mumwaambo wa Chingisi.
b Amuunke a www.jw.org/toi kutegwa mubale mabbuku, zyakuswiilila zyakalekkoodwa alimwi amavidiyo mumwaambo wanu alimwi amyaambo iimwi.