MAKANI AAYEEME AMUTWE UULI ACIVWUMBYO | MBOMUKONZYA KWEENDELEZYA ZILENGWA ZYANU
2 Amuzitantamuke Zintu Zikonzya Kumupa Kwaalilwa
Mwakalibikkila mbaakani yakulya zyakulya zijisi busani, pele ice cream njiiboola kumoyo.
Mwakasala kucileka kufweba, pele alimwi mulongwe wanu uuzyi kuti muyanda kucileka wamutambika musanga watombwe.
Mujisi makanze aakunyanyaasya mubili abuzuba, pele kuyandaula buyo mabbusu ngomusama nomubalika ulibonya kuba mulimo mupati!
Sena mwakubona kukozyanya kuliko mubukkale oobu? Ciindi aciindi, kulibonya kuti bukkale motubede alimwi abantu mbotujanika limwi zilakonzya kutugwasya kuzwidilila kuba azilengwa zili kabotu akuleka zyeezyo zitali kabotu.
NJIISYO YAMU BBAIBBELE: “Muntu uucenjede abona mapenzi ulayuba, pele aabo batakwe maano balaunka nkukonya ooko, aboobo balapenga.”—Tusimpi 22:3.
Bbaibbele litukulwaizya kuyeeya zintu zili kumbele. Kwiinda mukucita boobo, tulakonzya kweeleba bukkale ibukonzya kunyonganya makanze eesu alimwi tulakonzya kujana bukkale bukonzya kutugwasya kuzwidilila. (2 Timoteyo 2:22) Mubufwaafwi, ncabusongo kutantamuka zintu zikonzya kutupa kwaalilwa.
Amucite zintu zikonzya kumupa kuti cimuyumine kucita cintu citali kabotu alimwi azintu zikonzya kumupa kuti cimuuba-ubile kucita cintu cili kabotu
NCOMUKONZYA KUCITA
Amucite zintu zikonzya kumupa kuti cimuyumine kucita cintu citali kabotu. Mucikozyanyo, ikuti kamuyanda kucileka kulya zyakulya zinyonganya buumi bwanu, amusole kutazibikka muncikini yanu zyakulya eezyo nzyomuzyi kuti zilakonzya kubunyonganya buumi bwanu. Munzila eeyo, ciindi nomwasunkwa, ciyakumuyumina kucita cintu citali kabotu.
Amucite zintu zikonzya kumupa kuti cimuuba-ubile kucita cintu cili kabotu. Mucikozyanyo, ikuti mwalibikkila mbaakani yakusaanguna kunyanyaasya mubili mafwumofwumo, nkokuti mangolezya amubambile limwi zisani zyanu zyakubelesya. Ikuti kacili cuuba-uba kutalika, nkokuti mulalangilwa kuzumanana.
Amusale kabotu balongwe. Kanji-kanji tulangilwa kuba mbuli bantu mbotuyanzana limwi. (1 Bakorinto 15:33) Aboobo, amubatantamuke bantu ibakulwaizya zilengwa nzyomuyanda kuleka, akuyandaula baabo ibakonzya kumugwasya kuba azilengwa zili kabotu.