1 Amuzilange Kabotu Zintu

Inga mwayanda kucinca zintu zyoonse mubuumi bwanu cakufwambaana. Mulakonzya kwaamba kuti, ‘Nsondo iino ndilacaleka kufweba, kukonka, kumuka koona, ndilatalika kunyanyaasya mubili, kulya kabotu, alimwi akutalika kuswaya bamakaapa.’ Pele kusola kuzuzikizya mbaakani zyanu zyoonse aciindi comwe, kulakonzya kumupa kwaalilwa kuzuzikizya noiba yomwe!

Muntu uulibombya uzilanga kabotu zintu. Ulizyi kuti kuli mpagolela caboola kuciindi, nguzu alimwi alubono ndwajisi. Aboobo, muciindi cakucinca zintu zyoonse aciindi comwe, ulabambulula asyoonto-syoonto.

NCOMUKONZYA KUCITA

Amubambulule zilengwa zyanu kwiinda mulanga-langa cilengwa comwe aciindi comwe. Nzila eezyi zitobela zilakonzya kugwasya:

1. Amulembe ‘milongo’ yobilo umwi uujisi zilengwa zili kabotu nzyomuyanda kutalika kucita alimwi uumwi kaujisi zilengwa zitali kabotu nzyomuyanda kuleka. Amulongo umwi aumwi, amulembe zilengwa zinji kufwumbwa nzyomukonzya kuyeeya.

2. Amilongo yanu, amulembe zilengwa nzyomuyanda kusaanguna kuleka naa kucita kweelana amboziyandika kulindinywe.

3. Amusale zilengwa zisyoonto—ambweni comwe buyo naa zyobilo—kuzwa amulongo umwi aumwi akubikkila maano kuzilengwa eezyo. Mwamana amuunke kucilengwa citobela naa zyobilo izili amulongo umwi aumwi.

Amwaazuzikizye makanze aanu kwiinda mukuleka zilengwa zitali kabotu akutalika kucita zili kabotu. Mucikozyanyo, ikuti mulongo wazilengwa zitali kabotu kaubikkilizya akuciindizya kweebelela TV, mpoonya mulongo wazilengwa zili kabotu kaubikkilizya akuyanzana abayandwa banu, mulakonzya kulibikkila mbaakani mbuli yakuti: ‘Muciindi cakuyasya TV mbondasikila buyo aŋanda kuzwa kumulimo abuzuba, ndinoobandika amulongwe naa wacibbululu.’