MAKANI AAYEEME AMUTWE UULI ACIVWUMBYO | MBOMUKONZYA KWEENDELEZYA ZILENGWA ZYANU
3 Mutalangili Kuti Mulakonzya Kuzwidilila Mukaindi Kasyoonto
Kanji-kanji kwaambwa kuti citola mazuba aali 21 kutegwa muntu azyibile kucita cilengwa cipya. Mubwini, buvwuntauzi butondezya kuti bamwi cibatolela buyo ciindi cisyoonto, kakuli bamwi cibatolela ciindi cilamfwu kutegwa bazyibile kucita cilengwa cipya. Sena eeci ceelede kumutyompya?
Amulange-lange bukkale oobu: Amweezyeezye kuti muyanda kuba acilengwa cakunyanyaasya mubili ziindi zyotatwe mumvwiki.
Mvwiki yakusaanguna, mwacikonzya kuzuzikizya mbaakani yanu.
Mvwiki yabili, mwaalilwa buzuba bomwe.
Mvwiki yatatu, mwacikonzya alimwi kuzuzikizya mbaakani yanu.
Mvwiki yane, mwaalilwa nociba ciindi comwe.
Mvwiki yasanu, mwacikonzya alimwi kuzuzikizya mbaakani yanu, mpoonya kuzwa waawo mwacikonzya kuzuzikizya mbaakani mvwiki amvwiki.
Cakatola mvwiki zyosanwe kuzyibila kucita cilengwa canu cipya. Eeco inga calibonya mbuli kuti nciindi cilamfwu, pele kufwumbwa buyo kuti mwaizuzikizya mbaakani yanu, muyookkomana kuti mwacikonzya kutalika kucita cilengwa cili kabotu cipya.
NJIISYO YAMU BBAIBBELE: “Mululami ulakonzya kuwa ziindi zili ciloba, nokuba boobo ulanyamuka alimwi.”—Tusimpi 24:16.
Bbaibbele likulwaizya kuti tamweelede kulangila kuti mulakonzya kuzwidilila mukaindi kasyoonto. Kumamanino, iciyandika tazili ziindi zyakuwa pe, pele ziindi zyakunyamuka alimwi.
Kumamanino, iciyandika tazili ziindi zyakuwa pe, pele ziindi zyakunyamuka alimwi
NCOMUKONZYA KUCITA
Mutayeeyi kuti kwaalilwa ciindi comwe caamba kuti inga tamucikonzyi naaceya. Mweelede kuzilangila zintu zityompya ciindi nomubelekela kuzuzikizya mbaakani yanu.
Amubikkile maano kuziindi zintu nozyakeenda kabotu. Mucikozyanyo, ikuti kamuyanda kuyaambele mbomubandika abana banu, amulibuzye kuti: ‘Ino ndilili nondakali kuyanda kubakalalila bana bangu, pele tiindakacita oobo? Ino ncinzi ncondakacita muciindi cakubakalalila? Ino inga ndacita buti oobo alimwi?’ Mibuzyo iili boobu ilakonzya kumugwasya kutegwa muzwidilile muciindi cakubikkila maano kukulezya kwanu.
Sena inga mwayanda kuzyiba mbozikonzya kumugwasya njiisyo zyamu Bbaibbele mumbazu zimwi zyabuumi, mbuli kulibilika, kubamba luumuno mumukwasyi, alimwi akujana lukkomano lwini-lwini? Amubandike aumwi wa Bakamboni ba Jehova, naa kuunka a webbusaiti ya jw.org/toi.