Kulumba

Ino kulumba kupa buti kuti mube abuumi bubotu?

NCOBAAMBA BASAYAANSI

Kweelana ambocakaamba cibalo camu Harvard Mental Health Letter, “kulumba kuliswaangene kapati akukkomana. Kulumba kulabagwasya bantu kulikwaya mumizeezo, kulimvwa kabotu, kusumpula buumi bwabo, kulwana mapenzi, alimwi akuba azilongwe zitamani.”

BBAIBBELE NCOLYAAMBA

Ibbaibbele litukulwaizya kuba amuuya wakulumba. Mwaapostolo Paulo walo iwakatondezya cikozyanyo cibotu wakalemba kuti: “Amutondezye kuti mulalumba.” Mucikozyanyo, ‘wakamulumba Leza cakutaleka’ akaambo kakuti bantu bakali kuutambula kabotu mulumbe ngwaakali kubaambila. (Bakolose 3:15; 1 Batesalonika 2:13) Lukkomano lwini-lwini talubooli buyo akaambo kakwaamba buyo kuti ndalumba pele akaambo kakuba abube bwakulumba. Eeci inga catukwabilila kumuuya wakulimvwa kuti zintu zimwi zyeelede ndiswe, kumunyono, alimwi akukubikkilila calo icikonzya kupa kuti bantu batutantamuke alimwi akutupa kubula lukkomano mubuumi.

Mulengi wesu watupa cikozyanyo cibotu cakutondezya kulumba—nokuba kubantu balya maila! Lugwalo lwa Bahebrayo 6:10 lwaamba kuti: “Leza tali Leza uutaluleme pe uunga waluba milimo yanu alimwi aluyando ndomwakatondezya kuzina lyakwe.” Masimpe, Mulengi wesu ubona kuti kwaalilwa kutondezya kulumba, nkutalulama.

“Amukondwe lyoonse. Amulumbe kujatikizya zintu zyoonse.” —1 Batesalonika 5:16, 18.

Ino kulumba kuziyumya buti zilongwe zyesu abamwi?

ZINTU ZICITIKA NCOZIMUYIISYA

Ciindi notutondezya kulumba kwini-kwini—kufwumbwa naa nkaambo kacipego, majwi mabotu, naa lugwasyo lumwi—tupa kuti sikupa alimvwe kuyandika alimwi akulumbwa. Nobaba beenzu balaanguluka kubantu batondezya kulumba kwini-kwini akaambo kakucitilwa mulimo umwi mubotu, mbuli kujatilila cijazyo.

NCOLYAAMBA BBAIBBELE

Jesu Kristo wakaamba kuti: “Amube baabi, abalo bantu bayoomwaabila. Bayoomutilila munkomwe zyanu zyaacamba ceelelo cibotu cisindaidwe, cuumidwe-umidwe alimwi cizwide pamu.” (Luka 6:38) Amubone cakamucitikila Rose, imusimbi musinke matwi waku Vanuatu, insumbu iili ku South Pacific.

Rose wakali kujanika kumiswaangano ya Bakamboni ba Jehova pele kunyina zinji nzyaakali kumvwa nkaambo taakauzyi mwaambo wakutambaika alimwi nomuba mumbungano kunyina uuli woonse wakauzyi mwaambo ooyu. Ciindi banabukwetene bamwi ibakauzyi kabotu mwaambo ooyu nobakaswaya mbungano akubona penzi eeli, bakatalisya kkilasi yakuyiisya mwaambo wakutambaika. Rose wakalumba kapati. Wakaamba kuti: “Ndilikkomene kapati akaambo kakuba abalongwe banji bandiyanda.” Kubona mbobakalumba alimwi akubona mbobatola lubazu lino mumiswaangano ncilongezyo cipati kapati kuli banabukwetene aaba ibakamugwasya. Rose alimwi ulalumba kapati akaambo kakusolekesya kwabamwi kwiiya mwaambo wakutambaika kutegwa kababandika anguwe.—Milimo 20:35.

‘Ooyo uutuula cipaizyo cakulumba nguulemeka [Leza]’—Intembauzyo 50:23.

Mbuti mbomukonzya kuba amuuya wakulumba?

NCOLYAAMBA BBAIBBELE

Mbotulimvwa kuliswaangene kapati azintu nzyotuyeeya. Mulembi wa Bbaibbele Davida wakaamba boobu mumupailo wakwe kuli Leza: “Ndilazinzibala kuyeeya milimo yako yoonse; caluyandisisyo ndilakkala ansi kuyeeya milimo yamaanza aako.” (Intembauzyo 143:5) Inzya, Davida wakabikkila maano kuzintu nzyaakamucitila Leza. Kuba abube bwakulumba kwakaboola akaambo kakuzinzibala kuyeeya nzila zya Leza lyoonse, cilengwa ncaakali kucita mubuumi bwakwe boonse.—Intembauzyo 71:5, 17.

Ibbaibbele litupa lulayo oolu lubotu kapati: ‘Kufwumbwa zintu zyamasimpe, ziyandika kapati, zintu ziyandwa, zilaampuwo mbotu, zintu zyeelela kutembaulwa—kamuzumanana kuziyeeyesya zintu eezyi.’ (Bafilipi 4:8) Majwi aakuti “kamuzumanana kuziyeeyesya” alimwi atondezya mbociyandika kuzinzibala kuyeeya, calo icikonzya kutugwasya kuba amuuya wakulumba.

“Nzyondiyeeya mumoyo wangu zinooli zyamaano.”—Intembauzyo 49:3.