Sena Muyootola Lubazu?
Ciibalusyo Ciyootupa Coolwe Cakutondezya Kulumba
1. Ino Ciibalusyo ciyootupa coolwe nzi cilibedelede?
1 Ciibalusyo iciyooba mu April 14 ciyootupa coolwe cilibedelede cakutondezya kulumba akaambo kabubotu bwa Jehova. Lugwalo lwa Luka 17:11-18 lutondezya Jehova alimwi a Jesu mbobakubona kulumba. Cuusisya ncakuti akati kabasicinsenda bali kkumi ibakaponesyegwa, omwe buyo nguwakatondezya kulumba. Kumbele, cipego cacinunuzyo ciyoopa kuti malwazi oonse amane akupa kuti tube abuumi butamani. Mubwini aciindi eeco tunoomulumba Jehova abuzuba akaambo kazileleko eezyo. Pele ino inga twatondezya buti kulumba munsondo ziboola kumbele?
2. Ino inga twaba buti amuuya wakulumba kujatikizya cinunuzyo?
2 Amube Amuuya Wakulumba: Ikuyanda kulumba kuzwa muzintu nzyotuyeeya. Kutegwa tugwasyigwe kuba amuuya wakulumba, tulakozya kubala Magwalo aa Ciibalusyo aali mu Kkalenda naa mukabbuku ka Kulingaula Magwalo Abuzuba. Alimwi uyoobikkwa a jw.org kacitanasika Ciibalusyo. Mukulwaizyigwa kuti mukaalange-lange makani aaya mbuli mukwasyi. Kuti twacita oobo, ciyootugwasya kutondezya kulumba kapati kujatikizya cinunuzyo. Eeci ciyootupa kuba abukkale bweelede.—2 Ko. 5:14, 15; 1 Jo. 4:11.
3. Ino muunzila nzi motukonzya kutondezya kulumba ciindi ca Ciibalusyo?
3 Amutondezye Kulumba: Kulumba kulatondezyegwa kwiinda mumilimo. (Kol. 3:15) Sicinsenda iwakatondezya kulumba wakamuyandaula Jesu mpoonya akumulumba. Cakutadooneka, wakaambila bamwi camoyo woonse kujatikizya mbwaakaponesyegwa camaleele. (Lk. 6:45) Sena kulumba kuyootupa kubeleka cabusungu mumulimo wakutamba bantu ku Ciibalusyo? Kucita bupainiya bwakugwasilizya naa kuyungizya ciindi ncotubeleka mumulimo ciindi ca Ciibalusyo, ninzila imwi mbotu yakutondezya kulumba. Ikutondezya kulumba kuyootukulwaizya kutambula beenzu ku Ciibalusyo alimwi akwiingula mibuzyo yabo.
4. Ino inga twacita buti kutegwa tutakausi caakwiinda Ciibalusyo?
4 Sena Ciibalusyo eeci ciyooba camamanino? (1 Ko. 11:26) Tatuzyi pe. Pele ncotuzyi ncakuti, mbociyakwiindila buyo, acalo coolwe cakutondezya kulumba kwesu ciyooinda. Sena tuyoocibelesya? Majwi eesu aakulumba alimwi azintu nzyotuyeeya azimukkomanisye Jehova, sikutupa cinunuzyo.—Int. 19:14.