Atutondezye Kulumba Ciibalusyo Ciyoocitwa mu April 17
1. Majwi nzi ngaakaamba sintembauzyo aayelela ikapati ciindi ca Ciibalusyo?
1 Ikulumba Jehova akaambo kazyintu zinji zibotu nzyaakamucitila alimwi akumufwutula, sintembauzyo wakabuzya kuti: “Mpilusyenzi kuli Jehova nkaambo kazyoolwe zyoonse nzyandipa?” (Int. 116:12) Mazuba aano, babelesi ba Leza balijisi twaambo tunji tubapa kulumba. Kakwiindide myaanda yamyaka majwi aaya aakasololelwa amuuya kaalembedwe kale, Jehova wakapa bantu cipego cipati kwiinda zyoonse—cinunuzyo. Notulibambila kuyoojanika ku Ciibalusyo calufwu lwa Kristo mu April 17, tulijisi kaambo kabotu keelede kutupa kulumba.—Kol. 3:15.
2. Ntwaambo nzi tumwi tupa kuti katulumba bubambe bwacinunuzyo?
2 Zilongezyo Nzyotujana Akaambo Kacinunuzyo: Kwiinda mucinunuzyo, tulakonzya “kulekelelwa zibi zyesu.” (Kol. 1:13, 14) Eeci citupa kukomba Jehova katujisi manjezyeezya aasalala. (Heb. 9:13, 14) Tulakonzya kulikwaya kubandika a Jehova mumupailo. (Heb. 4:14-16) Aabo bajisi lusyomo mucinunuzyo balijisi bulangizi bwakuyoopona buumi butamani!—Joh. 3:16.
3. Mbuti mbotukonzya kutondezya kulumba kuli Jehova akaambo kacinunuzyo?
3 Mbotutondezya Kulumba: Nzila imwi njotukonzya kutondezya kuti tulalumba kapati nkutobela bubambe bwakubala Bbaibbele ciindi ca Ciibalusyo buzuba abuzuba akuzinzibala kuyeeya nzyotubala. Mulongo wakubala Bbaibbele lya Ciibalusyo wakabikkwa mukabbuku ka Kulingaula Magwalo Abuzuba naa mu Kkalenda ya 2011 kutalikila mu April 12-18. Alimwi tulakonzya kumwaambila Jehova kwiinda mumupailo uzwa ansi aamoyo mbotulumba kucinunuzyo. (1 Te. 5:17, 18) Ikujanika ku Ciibalusyo kweelana amulawo wa Jesu kuyootondezya kuti tulalumba. (1 Ko. 11:24, 25) Kuyungizya waawo, tulakonzya kwiiya luyando lwa Jehova kwiinda mukutamba bantu banji ku Ciibalusyo.—Is. 55:1-3.
4. Ino tweelede kuba amakanze nzi?
4 Babelesi ba Jehova ibalumba tabakeelanyi ciindi ca Ciibalusyo kumiswaangano eeyi iimbi. Muswaangano uuyandika kapati mumwaka! Notuyaabuswena kuciindi ca Ciibalusyo, atube amakanze mbuli asintembauzyo iwakalemba kuti: “O muuya wangu, kolumba Jehova, akutaluba zyoolwe zyakwe zyoonse.”—Int. 103:2.