Amugwasye Bamwi Kuti Bagwasyigwe a Cinunuzyo
Ciibalusyo Calufwu lwa Kristo Ciyoocitwa mu April 12
1. Ninzila nzi imwi bantu ba Leza mobatondezya kulumba kucinunuzyo?
1 “Alumbwe Leza nkaambo kacipo cakwe citaambiki!” (2 Kor. 9:15) Majwi aayo aamba mbotulimvwa kujatikizya bubotu aluzyalo Leza ndwajisi kubantu bakwe kwiinda mu Mwana wakwe, Jesu Kristo. Kulumba ooku kuyootondezyegwa kapati twaakubungana antoomwe mu April 12 lya Ciibalusyo calufwu lwa Kristo.
2. Ino mbaani bajanika ku Ciibalusyo antoomwe ababelesi ba Jehova, alimwi ncinzi ncobeelede kucita kutegwa bagwasyigwe acinunuzyo?
2 Ibantu bamwi babalilwa kutuulunzuma tuli kkumi, balajanika ku Ciibalusyo antoomwe ababelesi ba Jehova amwaka. Mukucita boobo, bantu aaba balatondezya kulumba kapati kucipaizyo ca Kristo. Nokuba boobo, kutegwa bagwasyigwe kucinunuzyo, bayandika kuba alusyomo mulincico. (Joh. 3:16, 36) Mbuti mbotukonzya kubagwasya kuba alusyomo luli boobu? Ciindi ca Ciibalusyo camwaka uuno, tulakonzya kubakulwaizya kuba aciiyo ca Bbaibbele cibageme akujanika kumiswaangano yambungano ansondo. Amulange-lange nzila zitobela.
3. Mbuti mbotukonzya kutalisya ciiyo ca Bbaibbele kuli baabo mbotutamba ku Ciibalusyo?
3 Ziiyo zya Bbaibbele: Nomutamba baabo bajisi luyandisisyo ku Ciibalusyo, mweelede kutalisya ciiyo ca Bbaibbele kuli mbabo mubbuku lya Bbaibbele Ncoliyiisya. Amusoleke kucipandulula Ciibalusyo kumuntu ooyo kwiinda mukujalula kumapeeji 206-208 akulanga-langa makani aamutwe wakuti “Mulalilo wa Mwami—Ncilengwa Cimupa Bulemu Leza.” Mulakonzya kutulanga-langa twaambo ooto mukupilukila kwakusaanguna naa kwabili, ambweni mbuli ciiyo ca Bbaibbele cicitilwa amulyango. Mwaamanizya makani aayo, ooyo muntu inga wayanda kubandika cibalo 5 cijisi mutwe wakuti, “Icinunuzyo—Ncipego ca Leza Ciinda Zyoonse.” Mbomwacitalisyila buyo ciiyo ca Bbaibbele, amujokele akulanga-langa zibalo zyakusaanguna zyone zyabbuku eeli.
4. Nkuuli bani nkotukonzya kutalisya ciiyo ca Bbaibbele ciindi ca Ciibalusyo imwaka uuno?
4 Nkuuli bani nkotukonzya kutalisya ciiyo ca Bbaibbele kwiinda mukubelesya nzila iili atala aawa? Ambweni bamwi mbomubeleka limwi, basicikolonyoko naa basimukobonyoko balakonzya kuzumina kubandika mibandi yamusyobo ooyu. Bakwesu balakonzya kusikila bamaalumi batasyomi ibakwete bacizyi bali mumbungano. Alimwi mutabaindi ambali basazinyoko batali Bakamboni. Mukuyungizya waawo, tuyooyanda kusolekesya kubatamba ku Ciibalusyo aabo bakali kuyanzana lyoonse ambungano. (Lk. 15:3-7) Atujane nzila mbotukonzya kubagwasya bantu aaba kuti bagwasyigwe acinunuzyo.
5. Mbuti mbotukonzya kubakulwaizya basikwiiya Bbaibbele abamwi aabo bajisi luyandisisyo ikujanika kumiswaangano yambungano iicitwa ansondo?
5 Miswaangano Yambungano: Ciibalusyo mmuswaangano wakusaanguna basikwiiya Bbaibbele abamwi aabo bajisi luyandisisyo ngobajanika. Pele mbuti mbotukonzya kubakulwaizya kujanika akugwasyigwa amiswaangano yesu yambungano iimbi? Mulimo Wesu wa Bwami wamu April 2005 apeeji 8, wakapa nzila eezi zitobela: “Amubaambile mutwe wamakani aabuleya uutobela. Amubatondezye makani ayoolangwa-langwa lya Ciiyo ca Ngazi Yamulindizi alimwi alya Ciiyo Cabbuku Cambungano. Amupandulule Cikolo ca Mulimo Weendelezyegwa a Leza alimwi a Muswaangano wa Mulimo. Mwapegwa makani mucikolo ambweni mulakonzya kulibambila antoomwe ambabo. Amubaambile twaambo tupati-pati twabandikwa kumiswaangano. Amubelesye zifwanikiso zili mumabbuku eesu ikubagwasya kubona zitola busena. Mbomwatalikila buyo ciiyo, amubatambe kuyoojanika.”
6. Muunzila nzi zyobile motukonzya kugwasya babombemyoyo kugwasyigwa acinunuzyo?
6 Babombemyoyo nobaba aciiyo ca Bbaibbele calyoonse akujanika kumiswaangano yambungano lyoonse, kanji-kanji balafwambaana kuyaambele kumuuya. Aboobo, atubakulwaizye kutegwa bagwasyigwe abubambe bwakumuuya oobu alimwi akucipego ca Leza ciinda zyoonse—icinunuzyo.