“Kamucita Oobu Lyoonse”—Ciibalusyo Ciyoocitwa mu April 5
1. Nkaambo nzi ncociyandika kucita Ciibalusyo?
1 “Kamucita oobu lyoonse kundiibaluka.” (Lk. 22:19) Kwiinda mumajwi aaya, Jesu wakalailila basikumutobela kwiibaluka lufwu lwakwe. Akaambo kazyintu zyakazuzikizyigwa acinunuzyo, kunyina buzuba buyandika kapati ku Banakristo kwiinda buzuba bwa Ciibalusyo cicitwa mwaka amwaka. Mbuti mbotukonzya kutondezya kulumba kuli Jehova mbociyaabuswena Ciibalusyo camwaka uno iciyoocitika mu April 5?—Kol. 3:15.
2. Mbuti mbotukonzya kutondezya kulumba akaambo ka Ciibalusyo kwiinda mukubala akuzinzibala kuyeeya?
2 Amulibambile: Lyoonse tulalibambila notuyanda kucita cintu ncotubona kuti cilayandika. Tulakonzya kulibambila mumoyo kujatikizya Ciibalusyo kwiinda mukubala antoomwe amukwasyi zyintu zyakacitika mumazuba aamamanino aa Jesu anyika alimwi akuzinzibala kuziyeeya. (Ezr. 7:10) Mulakonzya kwaajana magwalo masyoonto mu Kkalenda alimwi amukabbuku ka Kulingaula Magwalo Abuzuba.
3. Mbuti mbotukonzya kutondezya kulumba akaambo ka Ciibalusyo kwiinda mukuyungizya mulimo wesu wakukambauka?
3 Amukambauke: Alimwi tulakonzya kutondezya kulumba kwiinda mukutola lubazu mumulimo wakukambauka kusikila mpotugolela. (Lk. 6:45) Kutalikila mu Mujibelo, March 17, tunootamba bantu nyika yoonse kuti bakajanike ku Ciibalusyo. Sena mulakonzya kucinca mulongo wanu kutegwa mukabeleke ciindi cilamfwu mumulimo, ambweni kucita bupainiya bwakugwasyilizya? Sena inga tiimwabandika amukwasyi kujatikizya makani aaya aciindi ca Kukomba Mumukwasyi?
4. Nimpindu nzi nzyotukonzya kujana kwiinda mukujanika ku Ciibalusyo?
4 Eelo kaka tulagwasyigwa kwiinda mukujanika ku Ciibalusyo mwaka amwaka! Lukkomano lwesu akumuyanda Leza zilayungizyigwa notuzinzibala kuyeeya bwaabi bwa Jehova kwiinda mukwaaba Mwanaakwe simuzyalwaalikke kuba cinunuzyo. (Joh. 3:16; 1 Jo. 4:9, 10) Eeci cipa kuti katutaciliponeni tobeni. (2 Ko. 5:14, 15) Alimwi citupa kuba aluyandisisyo lwakutembaula Jehova mubuleya. (Int. 102:19-21) Masimpe, babelesi ba Jehova ibalumba balangila kucoolwe ncotunoojisi ‘cakwaambilizya lufwu lwa Mwami’ ku Ciibalusyo mu April 5.—1 Ko. 11:26.