Amulibambile Ciibalusyo Amoyo Uukkomene
1. Ino ciindi ca Ciibalusyo nciindi cilibedelede cakucita nzi?
1 Ciibalusyo iciyoocitwa muli Bwabili, March 26, ciyootupa coolwe cakukkomana akaambo kacintu ncaakatucitila Leza kutegwa tufwutuke. (Is. 61:10) Neliba leelyo nocitanacitwa Ciibalusyo, kukkomana kuyootugwasya kulibambila kabotu. Munzila nzi?
2. Ncinzi citukulwaizya kulibambila Ciibalusyo?
2 Kulibambila Ciibalusyo: Mulalilo wa Mwami ncintu ciyandika kapati nokuba kuti cicitwa munzila ngubauba. Nokuba boobo, kuyandika kulibambila kutegwa zyintu ziyandika zitakalubwi. (Tus. 21:5) Ciindi alimwi abusena bweelela zyeelede kusalwa. Kweelede kujanina limwi cinkwa alimwi awaini. Busena bwakuswaanganina bweelede kusalazyigwa akububamba kabotu kakucili ciindi. Mwaambi weelede kulibambila kabotu, alimwi basikwiinzya zitondezyo abasikugwasyilizya beelede kupegwa malailile. Cakutadooneka, bunji bwazyintu eezyi zyakacitwa kale. Kulumba akaambo kalufwutuko luboola kwiinda mucinunuzyo kutupa kulibambila kabotu Ciibalusyo.—1 Pe. 1:8, 9.
3. Mbuti mbotukonzya kulibambila mumoyo kujatikizya Mulalilo wa Mwami?
3 Kulibambila Mumoyo: Alimwi cilayandika kulibambila mumoyo kutegwa tumvwisye cini ncocaamba Ciibalusyo. (Ezr. 7:10) Kutegwa tucite boobo, tweelede kuba aciindi cakubala Magwalo aa Ciibalusyo alimwi akuzinzibala kuyeeya mbobwakabede buumi bwa Jesu bwaanyika kumamanino. Kuzinzibala kuyeeya muuya wa Jesu wakulyaaba kuyootukulwaizya kumwiiya.—Gal. 2:20.
4. Ino ncilongezyo cili cacinunuzyo icimupa kukkomana kapati?
4 Lufwu lwa Kristo lusinizya bweendelezi bwa Jehova. Lulaangununa kucibi alufwu. (1 Jo. 2:2) Lupa kuti bantu kabamvwana a Leza alimwi akupa kuti bakabe abuumi butamani. (Kol. 1:21, 22) Alimwi lutugwasya kuyumya makanzeesu aakupona kweelana akulyaaba kwesu kuli Jehova alimwi akuzumanana kuba basikwiiya ba Kristo. (Mt. 16:24) Lukkomano lwanu alukayungizyigwe, ciindi nomulibambila alimwi aciindi nomuyoojanika ku Ciibalusyo!