“Amukacite Obo Kuti Mukandiyeeye”
Lufwu lwa Jesu Luyooibalukwa mu April 2
1. Nkaambo nzi buzuba bwa April 2, 2007 ncobuyandika kapati?
1 Mu April 2, 2007, tuulunzuma twabantu nyika yoonse bayoobungana kwiibaluka lufwu lwa Jesu ndwaakafwa cakulyaaba. Jesu wakafwa akaambo kakuti wakali kusumpula bweendelezi bwa Bausyi bakujulu akutondezya kuti Saatani Diabolosi nzyaakaamba kuti bantu babelekela Leza akaambo kamizeezo mibyaabi, nzyakubeja. (Job. 2:1-5) Alimwi Mulalilo wa Mwami utuyeezya kuti kwiinda mulufwu lwakwe kali muntu uulondokede, uunyina cibi, Jesu ‘wakaaba buumi bwakwe kuti bube cinunuzyo cabanji.’ (Mt. 20:28) Aboobo, Jesu wakalailila basikwiiya bakwe kuti: “Amukacite obo kuti mukandiyeeye.” (Lk. 22:19) Sena kulumba kucipego eeci citaliboteli ncaakatupa Leza camupa kuti mutalike kulibambila kuyooibaluka citondezyo eeci caluyando?—Joh. 3:16.
2. Mbuti mbotukonzya kupangika myoyo yesu ku Ciibalusyo?
2 Amupangike Moyo Wanu: Kwiinda mukulanga-langa cakacitika mumazuba aamamanino aabuumi bwa Jesu naakali anyika, tulakonzya kupangika myoyo yesu kukucita Ciibalusyo eeci. (Ezr. 7:10) Kutegwa tugwasyigwe mukucita boobu, tulakonzya kujana mulongo wakubala Bbaibbele waalubazu mukabbuku ka Kulingaula Magwalo kamu 2007 amu Kkalenda yamu 2007. Mulongo ooyu wakubala uleendelana azyakali kucitika mumazuba ngaakali kuyanda kufwa Jesu kweelana akkalenda njotubelesya mazuba aano. Mazuba aambwa mu Bbaibbele akazwa mukkalenda yaci Juda mwalo mobakali kubala buzuba kutalikila zuba lyabbila kusikkila buzuba butobela lyabbila zuba. Nzila eeyi njobakali kubelesya yakubala mazuba njiibelesyegwa kweelana amulongo wakubala Bbaibbele wa Ciibalusyo. Ikulanga-langa makani aaya alimwi akukkala ansi kuyeeya luyando lwa Leza lupati kuyootupa kuti tugwasyigwe kapati ku Ciibalusyo.
3. Ino mbuti mbotunga twabagwasya bantu bajisi luyandisyo abaabo bataciswaangani kutegwa bakagwasyigwe ku Ciibalusyo?
3 Amubatambe Bantu Kuyoojanika: Ipepa lyamukati lya Mulimo Wesu wa Bwami wamu February lyakaambilizya kwaambilizya kwaalubazu kwakuyootamba bantu kuyoojanika ku Ciibalusyo eeci ciyandika kapati. Sena mwalibambila kutegwa mukatole lubazu mukwaambilizya ooku? Sena mwakalemba bantu mbomuyanda kuti bakajanike alimwi sena mwatalika kale kubaambila? Amulibambile kuyoosika kakucili ciindi mangolezya aayo aa Ciibalusyo kutegwa mukabatambule aabo mbomwakatamba kubikkilizya abamwi bajisi luyandisyo. Inga mwakkala ambabo akubona kuti balijisi Bbaibbele abbuku lyanyimbo. Amubazibye kubantu bamwi bamumbungano. Waakumana muswaangano amukasolekesye kuyooingula mibuzyo njobajisi. Amubatambe kuyoojanika kumakani aabuleya aalubazu ayookananwa mu April 15. Ikapati baalu beelede kubona kuti aabo bakali kuyanzana ambungano pele bataciswaangani batambwa abalo ku Ciibalusyo akumakani aalubazu.
4. Mbuti mbotukonzya kubagwasya bantu kuzumanana kuyaambele kumuuya caakwiinda Ciibalusyo?
4 Amubagwasye Kuyaambele Bapya Bajisi Luyandisyo Abatacisungweede: Mwaambi wamakani aa Ciibalusyo uyoopandulula mubufwaafwi bubambe bwaciiyo ca Bbaibbele caaŋanda citabbadelwi akukulwaizya bapya bajisi luyandisyo kuzumanana kwiiya makani aamba Jehova. Mulakonzya kubelesya makani ngobaamba kutegwa mubagwasye kumuuya bantu aabo mbomwakatamba. Ikuti naa cino ciindi tabaiyi Bbaibbele, amukabaswaye mbociyoomanina buyo Ciibalusyo akubatondezya mbokuyiigwa Bbaibbele. Alimwi kutegwa bayaambele kumuuya, bayooyandika kujanika kumiswaangano yambungano. (Heb. 10:24, 25) Kutegwa bacikonzye kucita boobo, amubakulwaizye kutalika kunoojanika kumiswaangano lyoonse. Baalu beelede kubaswaya Banakristo bakacileka kuswaangana bakajanika ku Ciibalusyo akubagwasya kuyeeyesya makani aakaambwa lya Ciibalusyo. Eeci cilakonzya kubakulwaizya kutalika mulimo wabo wamumbungano alimwi.
5. Ino mbuti Ciibalusyo mbocikonzya kutugwasya?
5 Ciibalusyo citupa coolwe cakukkala ansi akuyeeya eezyo Jehova a Jesu nzyobatucitila. Ikuyeeyesya kuli boobo kupa kuti luyando ndotujisi kuli mbabo luyume alimwi akupa kuti bukkale bwesu bucince. (2 Kor. 5:14, 15; 1 Joh. 4:11) Lino nceciindi cakutalika kulibambila abaabo bajisi luyandisyo kuyoojanika ku Ciibalusyo eeci ciyandika eelyo ‘notwaambilizya lufwu lwa Mwami.’—1 Kor. 11:26.