Ikulumba Bubambe bwa Cinunuzyo
1, 2. Nkaambo nzi ncotweelede kulumba bubambe bwacinunuzyo?
1 Kwiinda mukumvwida malailile aa Jesu, Banakristo nyika yoonse baya kubungana mu Mujibelo mu March 22, 2008 lyaakubbila zyuba ikwiibaluka lufwu lwa Jesu Kristo. (Lk. 22:19; 1 Kor. 11:23-26) Tulacita oobo cakulisungula akaambo kakuti tulalumba kuzyintu zyoonse izyakacitwa mubuzuba oobo myaka iili 1,975 yainda. Kwiinda mukuliyumya naakali kupenzyegwa akujaigwa acisamu cakupenzyezya, Jesu wakasalazya zina lya Bausyi akupa bwiinguzi kukukazya kwa Saatani.—Job. 1:11; Tus. 27:11
2 Bulowa bwa Jesu bwakatilwa bwakasinizya cizuminano cipya alimwi bwakapa kuti cikonzyeke kubantu batalondokede kuba bana ba Leza ibajisi bulangizi bwakuya kulela a Kristo mu Bwami bwakujulu. (Jer. 31:31-34; Mk. 14:24) Kunze lyaboobo, luyando lupati ndwajisi Leza kubantu lwakatondezyegwa naakaaba Mwanaakwe uuyandwa, kweelana a Jesu mwini mbwaakapandulula kuli Nikodema.—Joh. 3:16.
3. Mbuti aabo baya kujanika ku Ciibalusyo mbobaya kugwasyigwa?
3 Amubatambe Bantu: Mulimo Wesu wa Bwami wa January wakapa muzeezo wakuti tweelede kubamba mulongo wabantu mbotuzyi akubatamba. Sena mwatalika kale kubatamba aabo bali amulongo ngomwakabamba? Sena mwalibambila kwaakutola lubazu mukwaambilizya kwaalubazu kuya kutalika mu March 1 kutegwa mukatambe bantu ku Ciibalusyo? Aabo baya kujanika baya kumvwa makani aamu Magwalo aakonzya kuyumya lusyomo lwabo mucinunuzyo kwalo kukonzya kusololela kubuumi butamani.—Rom. 10:17.
4. Nkaambo nzi ncociyandika kusika kufwambaana lya Ciibalusyo?
4 Aabo boonse bakonzya, balakonzya kulibambila kwaakusika cakufwambaana kutegwa bakatambule baabo ibakakuzumina kwiitwa ooku kwaalubazu. Akaambo kakuti bantu bajanika ku Ciibalusyo mbanji, kulayandika kuti twabikkila maano kuli baabo basika ciindi cakusaanguna abaabo bajanika kumiswaangano ziindi zimwi.
5. Mbuti mbomukonzya kupangika moyo muciindi eeci ca Ciibalusyo?
5 Amupangike Moyo: Kabbuku ka Kulingaula Magwalo Abuzuba—2008 alimwi a Kkalenda yamu 2008 ijisi mulongo wakubala Bbaibbele kwaalubazu kwa Ciibalusyo kutalikila mu March 17. Ikulanga-langa zyakacitika mumazuba aakumamanino aabuumi bwa Jesu ano anyika kuya kumugwasya kupangika moyo wanu kukwiibaluka Ciibalusyo. (Ezr. 7:10) Kupaila akukkala ansi kuyeeya zibalo eezi zyamu Bbaibbele kuya kupa kuti luyando ndomujisi kuli Jehova a Mwanaakwe lukomene akaambo kakumupa cinunuzyo.—Int. 143:5.
6. Ino mbuti kulumba bubambe bwacinunuzyo mbokukonzya kutugwasya?
6 Ciibalusyo nocilondelela, atulibambile akugwasya bantu bamwi kulibambila kwaakujanika kumuswaangano ooyu uuyandika kapati. Ikulumba bubambe bwacinunuzyo kuya kuyumya cilongwe ncotujisi a Jehova a Mwanaakwe. (2 Kor. 5:14, 15) Alimwi kuya kutupa kubayiya notutondezya luyando lwakulyaaba kubantu bamwi.—1 Joh. 4:11.