Tupepa Twakutamba Bantu ku Ciibalusyo Tuya Kwaabilwa Nyika Yoonse!
1. Ino mulimo nzi mupati uuya kucitwa munyika yoonse Ciibalusyo kacitanaba?
1 “Amukacite oobo kuti mukandiyeeye.” (Lk. 22:19) Kwiinda mukutobela lulayo lwa Jesu oolu, bakombi ba Jehova abantu bajisi luyandisisyo baya kuswaangana mu March 30, 2010, kutegwa bakacite Ciibalusyo calufwu lwa Jesu. Tupepa twakutamba bantu kuti bakajanike ku Ciibalusyo tuya kwaabilwa nyika yoonse kutalikila mu March 13 kusika mu March 30.
2. Ino mbuti mbotukonzya kwaabila kapepa kakutamba bantu?
2 Mbokakonzya Kwaabilwa: Mulakonzya kupa mukamwiniŋanda kapepa kutegwa abone cifwanikiso icili atala akumwaambila kuti: “Kumazuba mu March 30, bantu babalilwa kumamiliyoni kuzinguluka nyika yoonse bayakuswaangana kutegwa bakaibaluke lufwu lwa Jesu. Ndaboolela kuzoomupa kapepa kakutamba ndinywe amukwasyi wenu. Balongwe benu abalo balakonzya kuboola.” Amubaambile ciindi abusena nkuuya kubeda muswaangano ooyu. Kweelana abukkale mbomwajana, mulakonzya kubala lugwalo lwa Luka 22:19 kutegwa mutondezye lulayo lwamu Magwalo. Nokuba boobo, mweelede kuzyiba kuti tweelede kwaamba mubufwaafwi akaambo kakuti tujisi buyo muzuba masyoonto aakwaabila tupepa ootu mucilawo.
3. Ino mbaani mbotukonzya kutamba?
3 Ikuti mbungano yenu kaijisi cilawo cipati, baalu balakonzya kumulailila kuti musiye tupepa ootu amaanda mpomwatajana bantu mulweendo lwenu lwakusaanguna. Ikuti kaceelela kucita boobo, mulakonzya kwaabila amamagazini ciindi nomwaabila tupepa ootu. Amubatambe bantu mbomuswaya munyendo zyakupilukila, mbomuyiisya Bbaibbele, basazinyoko, babelesinyoko, basicikolonyoko, basimukobonyoko alimwi abantu mbomuzyibene limwi.
4. Ikulumba Jehova akaambo kaluyando ndwaakatondezya kwiinda mukutupa cinunuzyo kuya kutupa kucita nzi?
4 Amulibambile Kuyootola Lubazu: Ciindi ca Ciibalusyo nciindi cibotu cakuyungizya ciindi ncotutola mumulimo wakukambauka. Sena mulakonzya kulibambila kutegwa mukacite bupainiya bwakugwasyilizya? Sena mulijisi bana naa bantu mbomuyiisya Bbaibbele ibacita kabotu kumuuya? Ikuti naa mboobo, amubaambile baalu kutegwa babone naa bantu aabo balakonzya kweelela kutola lubazu mumulimo wakukambauka kabali basikumwaya batabbapatizyidwe. Ikulumba Jehova akaambo kaluyando ndwaakatondezya kwiinda mukutupa cinunuzyo kuya kupa kuti tukajanike ku Ciibalusyo alimwi akutamba bantu banji kutegwa abalo bakajanike.—Joh. 3:16.