Mulimo Waalubazu Wakwaambilizya Ciibalusyo
1. Ino ncinzi bakambausi ba Bwami ncobayoocita nyika yoonse kutalikila mu March 21, 2009, alimwi ino nkaambo nzi?
1 Muli Bwane, April 9, 2009, bakombi ba Jehova Leza nyika yoonse bayoobungana mukwiibaluka citondezyo cipati caluyando Jehova ndwaakacitila bantu. (Rom. 5:6-8) Tulangila kuti tuulunzuma twabantu bajisi luyandisyo bayootusangana mukwiibaluka lufwu lwa Jesu. Kapepa kaalubazu kakutamba bantu ku Ciibalusyo kayakwaabilwa nyika yoonse kutalikila mu March 21.
2. Ino ntwaambo nzi ntomweelede kuyeeya ciindi nomwaabila kapepa kakutamba bantu?
2 Twaambo Itweelede Kuyeeyegwa: Amuzibelesye kapati zifwanikiso, mibuzyo alimwi amagwalo aabikkidwe akapepa kakutamba bantu. Mucikozyanyo, inga mwabatondezya cifwanikiso cili apeeji lyakusaanguna alimwi akwaamba kuti: “Ndamutamba kuti mukatusangane mukwiibaluka lufwu lwa Jesu, kwalo kuyoocitwa muli Bwane, April 9, 2009.” Mpoonya amubatondezye mutwe wamakani uuli akapepa alimwi amibuzyo iitobela. Amube masimpe kuti mwabapandulwida bamukamwini ŋanda kuti balaangulukide kutamba bamumukwasyi wabo alimwi abantu bambi buyo mbobayanda kuti bakaboole limwi.
3. Ino ncinzi ncomunga mwacita kujatikizya baabo mbomwakatamba?
3 Ikuti mbungano yenu ijisi cilawo cipati, baalu inga bamwaambila kunoosiya tupepa twakutamba bantu aminzi aatajanika bantu. Mumazuba aamu Mujibelo alimwi amu Nsondo, amwaabile mamagazini aantoomwe akapepa kakutamba bantu. Amulibikkile mbaakani yakutamba bantu nkomupilukila, mbomwiiya limwi Bbaibbele, basazinyoko, basicikolonyoko, mbomubeleka limwi, basimukobonyoko, alimwi abalongwe bambi mbomujisi. Mwaka wamana, mucizyi umwi wakatamba basazinyina bali 30, mpoonya ciindi aciindi wakali kubayeezya kujatikizya mbociyandika ciibalusyo. Elo kaka wakakkomana kapati kuti bantu ibali 25 bakajanika, alimwi bone akati kabantu aaba bakazoozumina kuba aciiyo ca Bbaibbele!
4. Ino nkulibambila kuli buti nkotweelede kucita lino, alimwi ino nkaambo nzi?
4 Amulibambile Lino: Basikumwaya banji balakonzya kuyungizya ciindi ncobabelesya mumulimo wakukambauka mumwezi wa March a April. Ikuti kamujisi bana naa basikwiiya Bbaibbele ibayaambele, eeci inga caba ciindi cibotu cakuti babe basikumwaya batanabbapatizyigwa. Eecino nceciindi cibotu cakutalika kulibambila kuyootola lubazu kusikila mpomugolela mumulimo ooyu wakwaambilizya ciibalusyo icitondezya nzila zyobile zyaluyando.—Joh. 3:16; 15:13.