Kutamba Bantu ku Ciibalusyo Kulatalika mu April 2
1. Ino ndilili notuyooabila tupepa twakutamba bantu ku Ciibalusyo uno mwaka, alimwi ino mulimo ooyu wakutamba bantu ugwasya buti?
1 Kutalikila mu April 2 kusikila mu April 17, tuyooabila tupepa twakutamba bantu kumuswaangano uuyandika kapati mumwaka—Ciibalusyo calufwu lwa Kristo. Kaindi, bantu banji bakazumina ikubatamba. Mucikozyanyo, mubuzuba bwa Ciibalusyo, umwi mukaintu wakatuma luwaile kuofesi yamutabi akwaamba kuti: “Nindasika aŋanda, ndajana kapepa kunsi aamulyango. Ndilayanda kuunka, pesi tandizyi ciindi.” Mukwesu wakapandulula makani aaya mpaakonzya kwaajana mukapepa. Mukaintu ooyu wakamanizya mubandi kwiinda mukusyomezya kuti, “Ndilaunka kumuswaangano wanu mangolezya!”
2. Ncinzi ncotukonzya kwaamba notwaabila kapepa?
2 Mbotuyooabila Tupepa: Akaambo kakuti tujisi ciindi cisyoonto cakwaabila tupepa mucilawo motubelekela, tweelede kwaamba mubufwaafwi. Tulakonzya kwaamba kuti: “Kamwaamba. Tutamba mukwasyi wanu kumuswaangano uuyandika kapati uucitwa mwaka amwaka nyika yoonse mu Nsondo, April 17. [Amubape kapepa.] Buzuba oobu mbwa Ciibalusyo calufwu lwa Jesu. Kuyoopegwa makani aatabbadelelwi aamu Bbaibbele aapandulula mbotukonzya kugwasyigwa a cinunuzyo ca Kristo. Kapepa aaka kalatondezya busena aciindi nkoutiikabede muswaangano mucilawo cesu.”
3. Mbuti mbotukonzya kutamba bantu banji?
3 Ikuti mbungano kaijisi cilawo cipati cakubelekela, baalu balakonzya kumulailila kuti musiye tupepa ootu ansi amulyango amaanda mpomwatajana bantu. Amubatambe bantu mbomuswaya munyendo zyakupilukila, bacibbululu, babelesinyoko, basicikolonyoko, alimwi abantu mbomuzyibene limwi. Nomwaabila tupepa ootu, mulakonzya kwaabila amamagazini kuti kaceelela kucita oobo. Sena mulakonzya kucita bupainiya bwakugwasyilizya mumwezi wa April kutegwa mubeleke kapati mumulimo ooyu uunoneezya wakutamba bantu?
4. Nkaambo nzi ncotuyanda kuti bantu balaaluyandisisyo bakajanike ku Ciibalusyo?
4 Eelo kaka bayoojanika bayookambaukilwa mulumbe uuyandika kapati! Bayoolimvwida mbwaakatondezya luyando lupati Jehova naakapa cinunuzyo kubantu. (Joh. 3:16) Bayooyiya Bwami bwa Leza mbobuyoogwasya bantu. (Is. 65:21-23) Alimwi bayooambilwa kuti babone basikugwasyilizya kutegwa balombe kuba aciiyo ca Bbaibbele. Tusyoma kuti bantu banji bayanda kwiiya kujatikizya Jehova bayoojanika ku Ciibalusyo!