Kutamba Bantu ku Ciibalusyo Kulatalika mu March 17
1. Ino nkutamba kuli buti kuyootalika mu March 17?
1 Ikucita Ciibalusyo mwaka amwaka ninzila yakwaambilizya lufwu lwa Jesu. (1 Kor. 11:26) Aboobo, tuyanda kuti abamwi bakajanike kutegwa bakalimvwide kujatikizya cipego caluyando ca Jehova cacinunuzyo. (Joh. 3:16) Mwaka uno, ikutamba bantu ku Ciibalusyo kuyootalika mu Mujibelo, March 17. Sena mulilibambilide kuyootola lubazu kusikila mpomugolela?
2. Ncinzi ncotukonzya kwaamba notwaabila kapepa kakutamba bantu?
2 Ncotukonzya Kwaamba: Inga cainda kubota kwaamba mubufwaafwi. Tulakonzya kwaamba kuti: “Mwapona buti? Tutamba mukwasyi wanu kumuswaangano uuyandika kapati wamwaka amwaka uyoocitwa nyika yoonse, mu April 5. Kuyoopegwa makani aa Bbaibbele aatabbadelelwi aayoopandulula ncolwakazuzikizya lufwu lwa Jesu alimwi ancacita lino. Kapepa aaka kalatondezya busena alimwi aciindi nuuyoocitwa muswaangano ooyu mucilawo cesu.” Notwaabila tupepa kumamanino aamvwiki, tweelede kwaabila amamagazini kuti kaceelela.
3. Mbuti mbotukonzya kutamba bantu banji kusikila mpotugolela?
3 Amutambe Bantu Banji: Makanze eesu ngakutamba bantu banji kweelana ambotukonzya. Aboobo, amubone kuti mwabatamba bantu mbomwiiya limwi Bbaibbele, mbomuswaya munyendo zyakupilukila, bacibbululu, mbomubeleka limwi, mbomwiiya limwi, basimukobonyoko, alimwi abantu mbomuzyibene limwi. Baalu bamumbungano yanu bayoomupa malailile kujatikizya mbomukonzya kucibeleka cilawo canu. Kutamba bantu ku Ciibalusyo nkotucita mwaka amwaka kulaampindu. Mukaintu umwi naakanjila muswaanganinwa mwaka wainda, sikugwasyilizya wakali kuyanda kumugwasya kujana sikumwaya wakamutambide. Pele mukaintu wakaamba kuti kunyina ngwaakazyi ooko alimwi akuti wakatambula kapepa kakutamba kumuntu wakali kukambauka kuŋanda aŋanda buzuba oobo.
4. Ntwaambo nzi tuyootupa kubeleka cabusungu mukutamba bantu ku Ciibalusyo?
4 Ambweni akati kabantu bayoojanika ku Ciibalusyo kunooli amuntu ngomwakatamba. Kufwumbwa naa muntu wazumina naa wakaka, kusoleka kwanu kuyoopa bumboni. Tupepa ntomwaabila tuyakwaambilizya kuti Jesu lino Mwami singuzu. Mwaakutola lubazu cabusungu mukutamba bantu, boonse bamulangilila—aabo bali mucilawo canu, basikumwayanyoko, ikapati Jehova—bayoobona kuti mulalumba kapati cipego cacinunuzyo.—Kol. 3:15.