Masunko

Ino sunko ninzi?

Sunko nkukwelelezyegwa kucita cintu cimwi—kwaambisya cintu cibyaabi. Mucikozyanyo, ciindi nomuli mucintoolo, mwabona cintu cimwi cimukkomanisya. Mumizeezo mwayeeya kuti mulakonzya kucibba kakunyina kujatwa. Pele manjezeezya aanu aamba kuti peepe! Aboobo mwaugusya muzeezo ooyo akuzumanana kweenda. Aciindi eeco sunko lyamana, mpoonya mwaba basikuzunda.

BBAIBBELE NCOLYAAMBA

Kusunkwa tacimupi kuba muntu mubi. Bbaibbele lilazuminizya kuti toonse tulasunkwa. (1 Bakorinto 10:13) Mbotucita ciindi notwasunkwa ncecintu ciyandika kapati. Bamwi balazumanana kuyeeya cintu citali kabotu mpoonya mukuya kwaciindi balazundwa acintu eeco. Bambi mpoonya-mpoonya balacigusya mumizeezo kuti ncibi.

“Umwi aumwi ulasunkwa kwiinda mukoongelezyegwa akucegwa azisusi zyakwe mwini.”—Jakobo 1:14.

Nkaambo nzi ncocili cabusongo kufwambaana kubweza ntaamu ciindi notwasunkwa?

Bbaibbele lilaamba zintu zisololela kukucita cibi. Lugwalo lwa Jakobo 1:15 lwaamba kuti: “Zisusi [zibi] zyamita, zizyala cibi.” Mubufwaafwi, ikuti twazumanana kuyeeya zintu zibi, inga catupa kusika antaamu yakwaalilwa kuzitantamuka kusikila mane twazicita buya mbubwenya mbuli mukaintu uumitide mbwatakonzyi kusumpya buzuba bwakutumbuka. Nokuba boobo, tulakonzya kutantamuka kuba bazike bazisusi zibi. Alimwi buya tulakonzya kuzizunda.

BBAIBBELE MBOLIKONZYA KUTUGWASYA

Mizeezo yesu ilakonzya kuzumizya zisusi zibi kuba mulinjiyo, pele alimwi ilakonzya kuzigwisya. Munzila nzi? Kwiinda mukubikkila maano kucita cintu cimwi, kubandika amulongwe, naa kuyeeya zintu zili kabotu. (Bafilipi 4:8) Alimwi inga cagwasya kuyeeya mapenzi aakonzya kuboola ikuti twalekela sunko kuti lituzunde, calo cikonzya kubikkilizya kupenga mumizeezo, kumubili, naa kumuuya. (Deuteronomo 32:29) Mupailo awalo ulakonzya kugwasya kapati. Jesu Kristo wakaamba kuti: ‘Amuzumanane kupaila kutegwa mutanjili mumasunko.’—Matayo 26:41.

“Mutalyeeni pe: Leza takonzyi kufwubaazyigwa. Nkaambo kufwumbwa cintu muntu ncasyanga, ncencico eeco ncayootebula.”—Bagalatiya 6:7.

Ino inga mwaliyumya buti kulwana masunko?

CICITIKA

Masunko amwaabone kuti nkakole naa coongelezyo cikonzya kusololela muntu mufwubafwuba, naa uutacenjede kuntenda. (Jakobo 1:14) Eeci ncamasimpe kwaambisya kumasunko aajatikizya kutalilemeka mumakani aakoonana alo aakonzya kuleta mapenzi aataambiki.—Tusimpi 7:22, 23.

BBAIBBELE MBOLIKONZYA KUTUGWASYA

Jesu Kristo wakaamba kuti: “Lino ikuti liso lyako lyalulyo kalikulebya, kolinonkola akulisowa.” (Matayo 5:29) Bwini mbwakuti, Jesu tanaakali kwaamba kunonkola kwini! Muciindi caboobo, wakali kwaamba kuti ikuti katuyanda kukkomanisya Leza akuba abuumi butamani, tweelede kujaya zizo zyamubili wesu caboola kumakani aakucita cibi. (Bakolose 3:5) Eeci caamba kuti tweelede kubeleka canguzu kutegwa tulitantamuke sunko. Mubelesi wa Leza uusyomeka wakapaila kuti: “Kogwisya meso aangu kukulangilila cintu cabuyo.”—Intembauzyo 119:37.

Masimpe, kulilesya nciyumu kapati. Kayi “mubili unyina nguzu.” (Matayo 26:41) Aboobo, lyoonse tunoolubizya. Nokuba boobo, ikuti tweempwa kuzwa ansi amoyo akubeleka canguzu kutegwa citabi cilengwa cakucita cibi, Mulengi wesu, Jehova Leza, ulakonzya kutulekelela nkaambo “ngusiluse alimwi ngusilweetelelo.” (Intembauzyo 103:8) Eelo kaka eeci cilakatalusya!

“Ikuti nooli kulanga zinyonyoono, O Ja, ino nguni, O Jehova, uukonzya kwiima?”—Intembauzyo 130:3.